"İcbari tibbi sığortanın tətbiqi ilə bağlı çətinliklərdən biri də qeyri-rəsmi işlərlə məşğul olan əhalinin sığortalanması ilə bağlıdır. Bu problem tək Azərbaycanda deyil, bütün inkişaf edən ölkələrdə var". Trend-in məlumatına görə, bunu Nazirlər Kabineti yanında İcbari Tibbi Sığorta üzrə Dövlət Agentliyinin monitorinq, təhlil və informasiya texnologiyaları şöbəsinin müdiri İsa Əliyev jurnalistlər üçün keçirilən təlimdə çıxış edərkən deyib.
Onun sözlərinə görə, belə şəxslər çox zaman sığorta sisteminə çox gec, yaşlandıqda və ya səhhətləri ilə bağlı müəyyən risk yarandıqda qoşulurlar. Ancaq bir sıra ölkələr buna qarşı tədbirlər görür: "Misal olaraq, Türkiyə və Almaniyada belə şəxslərə deyirlər ki, siz istədiyiniz zaman sığorta sisteminə qoşula bilmərsiniz. Əgər onlar ötən 5 il ərzində tibbi sığortaya görə heç bir ödəniş etməyibsə və işsiz olmamayıblarsa, onlardan bu sistemə qoşulmaq üçün çox yüksək məbləğ tələb edirlər. Demirəm ki, bizdə də belə mexanizm olacaq, ancaq dünya təcrübəsində belədir".
İ.Əliyev deyib ki, tibbi xidmətlərin satınalması iki formada - passiv və strateji formada ola bilər. Passiv satınalma tibbi sığorta sisteminə uyğun gəlmir: "Passiv satınalma o deməkdir ki, tibb müəssisələri xidmət göstərir və ödəyiciyə invoys göndərirlər ki, mənə pul ödə. Nəzarət olunmur ki, orada xidmət göstərilib, ya yox. Yaxud bu xidmət orada lazimi səviyyədə göstərilib, ya yox. Strateji satınalmada isə keyfiyyət standartlarına uyğun ödənişlər edilir. Bütün vəsaitlər İcbari Tibbi Sığorta Agentliyində toplandığı və burada alıcılıq qüvvəsi çox olduğu üçün strateji satınalmanın əhəmiyyəti artır və bunun mümkünlüyü daha çoxdur".
İ.Əliyev qeyd edib ki, icbari tibbi sığorta sisteminin əsas prinsipi sosial həmrəylikdir: "Bu o deməkdir ki, xəstə-sağlam, qoca-cavan, bir sözlə hər kəs bu sistemdə iştirak etsin. Əsas məqsəd odur ki, bütün risklər bir yerdə cəmlənsin. Bizim üçün əsas məqsəd icbari tibbi sığortanın tətbiqindən əhalinin razı qalmasıdır".
Azərbaycanda icbari tibbi sığortanın tətbiqi ilə bağlı ilkin model layihə mayın sonu, iyunun əvvəlində ölkə rəhbərliyinə təqdim ediləcək. bunu isə Nazirlər Kabineti yanında İcbari Tibbi Sığorta üzrə Dövlət Agentliyinin direktoru Zaur Əliyev deyib.
Z.Əliyev bildirib ki, model ilk növbədə vətəndaşların maraqlarına xidmət etməlidir: "Gecikmənin obyektiv və subyektiv səbəbləri olub. Ancaq biz gələcəyə baxsaq, daha yaxşı olar. Aidiyyəti üzrə qurumlarla müzakirələr aparılıb və işlər yekunlaşmaq üzrədir. Mayın sonu iyunun əvvəlində ilkin model layihə ölkə rəhbərliyinə təqdim ediləcək. Yalnız bundan sonra bütün suallar öz cavabını tapmış olacaq".
Z.Əliyev deyib ki, bu ilin sonu, gələn ilin əvvəlindən icbari tibbi sığorta üzrə pilot layihənin həyata keçirilməsi planlaşdırılır: "Pilot layihə 6-7 ay davam edəcək. Hansı rayonların seçilməsi və işin necə qurulması yaxın gələcəkdə məlum olacaq. Bu işin daha düzgün qurulması üçün ekspertləri də prosesə cəlb etmişik".
Agentlik direktoru əlavə edib ki, icbari tibbi sığortanın tətbiqi zamanı vətəndaş daha az vəsait ödəməklə daha geniş tibbi təminata nail ola biləcək.
Nazirlər Kabineti yanında İcbari Tibbi Sığorta üzrə Dövlət Agentliyinin İcbari tibbi sığorta şöbəsinin müdiri Vüqar Qurbanov isə bildirib ki, icbari tibbi sığorta Azərbaycan vətəndaşları və ölkədə müvəqqəti qeydiyyatda olan əcnəbiləri əhatə edəcək. Xidmət paketinin müddəti hər il yenilənmək şərti ilə 1 il müəyyən olunub.
V.Qurbanov qeyd edib ki, icbari tibbi sığorta xidmətlərinin keyfiyyətinə nəzarət Səhiyyə Nazirliyi və Dövlət Agentliyi tərəfindən həyata keçiriləcək.
Agentliyin hüquq şöbəsinin müdiri Aysel İbayeva isə qeyd edib ki, agentliyin gələcəkdə tibb müəssisələrinin akkreditasiya məsələsində iştirak etmək hüququ olacaq: "Buna görə də gələcəkdə tibb müəssisələrinə qarşı onların fəaliyyəti və bizim fəaliyyətin kəsişdiyi nöqtələr üzrə tələblər qoya bilərik. Biz bununla Səhiyyə Nazirliyinin işinə qarışmayacağıq. Biz sadəcə, bu məsələdə iştirakçı qismində olub bizə aid məsələləri həll edəcəyik".
