Akif Nəsirli:“...Aqrar sektorda yeni inkişaf mərhələsinin başlanğıcına çevrilə bilər”
Azərbaycan Prezidentinin 2026-cı il 25 may tarixli Sərəncamı ilə təsdiq edilmiş “Azərbaycan Respublikasında kənd təsərrüfatı, balıqçılıq və akvakultura məhsullarının istehsalı və emalı sahələrinin inkişafına dair 2026-2030-cu illər üçün Dövlət Proqramı”nın müzakirəsi məqsədilə silsilə regional müşavirələr keçirilir.
Regional müşavirələrin rolu, əhəmiyyəti nədir?
Liberal İqtisadçılar Birliyinin sədri Akif Nəsirli baki-xeber.com-a bildirdi ki, Dövlət Proqramı ilə bağlı regional müşavirələrin əsas rolu proqram prioritetlərinin yerlərdə çevik, əlaqəli və səmərəli icrasını təmin etməkdir. O, vurğuladı ki, bu görüşlər mərkəzi icra hakimiyyəti ilə yerli qurumlar, eləcə də sahibkarlar və fermerlər arasında birbaşa dialoq və koordinasiya platforması rolunu oynayır. “Regional müşavirələrin keçirilməsi formal tədbirdən daha çox, Dövlət Proqramının regionlarda necə icra olunacağını müəyyənləşdirən mühüm mərhələ kimi qiymətləndirilə bilər. Əgər bu görüşlər real problemlərin dinlənilməsi və qərarların qəbuluna təsir göstərməsi ilə müşayiət olunarsa, aqrar sektorda yeni inkişaf mərhələsinin başlanğıcına çevrilə bilər.
Müsbət tərəflərdən biri odur ki, fermerlər, sahibkarlar və dövlət qurumları bir platformada toplanaraq sahədəki problemləri birbaşa müzakirə etmək imkanı əldə edirlər”.
A.Nəsirli qeyd etdi ki, bu, regionlar üzrə fərqli ehtiyacların müəyyənləşdirilməsinə, dövlət dəstəyinin daha məqsədli istiqamətləndirilməsinə və investisiya imkanlarının genişlənməsinə şərait yarada bilər: “Su ehtiyatlarından səmərəli istifadə, müasir aqrar xidmətlərin tətbiqi, emal və logistika infrastrukturunun inkişafı kimi məsələlərin gündəmə gətirilməsi kənd təsərrüfatının məhsuldarlığını və rəqabət qabiliyyətini artırmaq baxımından əhəmiyyətlidir.
Bununla yanaşı, müşavirələrin real nəticə verməsi üçün səsləndirilən təkliflərin praktik addımlara çevrilməsi vacibdir. Əks halda, tədbirlər yalnız hesabat xarakteri daşıya bilər. Aqrar sektorda əsas problemlərdən olan su çatışmazlığı, torpaqların deqradasiyası, kiçik fermerlərin maliyyə resurslarına çıxış imkanlarının məhdudluğu, kənd təsərrüfatı məhsullarının satış bazarları ilə bağlı çətinliklər təkcə müzakirələrlə həll olunmur və ciddi icra mexanizmləri tələb edir”.
A.Nəsirlinin sözlərinə görə, digər mühüm məqam odur ki, regionlarda qəbul edilən qərarların icrasına nəzarət mexanizmi güclü qurulmalıdır: “Çünki əvvəlki illərin təcrübəsi göstərir ki, bəzi hallarda qəbul edilən proqramlarla onların yerli səviyyədə icrası arasında fərqlər yaranır. Fermerlərin problemlərinin operativ həlli, subsidiya və dəstək mexanizmlərinin şəffaflığı, yeni texnologiyaların tətbiqinin sürətləndirilməsi əsas prioritetlərdən olmalıdır.
Ümumilikdə, regional müşavirələr Dövlət Proqramının məqsədlərinin yerli səviyyədə izah edilməsi, fermerlərlə birbaşa dialoqun qurulması və problemlərin operativ müəyyənləşdirilməsi baxımından mühüm əhəmiyyət daşıyır. Bu görüşlər real qərarlar və icra mexanizmləri ilə müşayiət olunarsa, Azərbaycanın aqrar sektorunda yeni mərhələnin əsasını qoya bilər. Əks halda, onların təsiri məhdud qalacaq və gözləntiləri tam doğrultmayacaq”.
İradə SARIYEVA
