Fikrət Yusifov: “Bu, orta yolun nə qədər əhəmiyyətli və iqtisadi cəhətdən nə qədər səmərəli olduğunu bir daha göstərir”
Dənizə çıxışı olmayan Özbəkistan Naxçıvan üzərindən keçəcək və ölkə üçün Türkiyəyə, eləcə də Qara və Aralıq dənizlərindəki Türkiyə limanlarına əlavə nəqliyyat marşrutu təmin edə biləcək dəmir yolunun tikintisində iştirak imkanlarını nəzərdən keçirir.
Bu barədə Özbəkistan Prezidenti Şavkat Mirziyoyevin sədrliyi ilə bu gün keçirilən iri nəqliyyat-logistika layihələrinə dair müşavirənin yekunları ilə bağlı məlumat verilib.
Prezidentin mətbuat xidmətinin məlumatına görə, Özbəkistan tərəfi Naxçıvan üzərindən keçəcək və Türkiyənin Samsun və İstanbul limanlarına çıxış təmin edəcək dəmir yolunun tikintisində iştirak imkanlarını araşdırır. Layihə Özbəkistanın malların beynəlxalq bazarlara daşınması marşrutlarını şaxələndirmək və ayrı-ayrı tranzit dəhlizlərindən asılılığı azaltmaq istiqamətində daha geniş səyləri çərçivəsində nəzərdən keçirilir. Naxçıvan üzərindən keçən marşrut Özbəkistanın Azərbaycan və Türkiyə ilə genişlənən logistika əməkdaşlığını da tamamlayaraq Mərkəzi Asiyanı Cənubi Qafqaz və Türkiyə ilə birləşdirən daha bir potensial yol yarada bilər.
Özbəkistanın Naxçıvan üzərindən Türkiyə dəmiryollarına çıxışı regionumuzun, o cümlədən Orta Dəhlizin imkanlarına necə təsir edər?
Sözügedən məsələ ilə bağlı fikirlərini baki-xeber.com-la bölüşən sabiq maliyyə naziri, professor Fikrət Yusifov hesab edir ki, Özbəkistanın prosesə qoşulması ümumi işə yalnız fayda verəcək: “Bu gün Özbəkistan sürətlə inkişaf edir. Ölkə daxilində aparılan iqtisadi islahatlar yerli və xarici investisiyaların həcminin durmadan artması ilə müşayiət olunur. Azərbaycanla dost, qardaş olan bir ölkənin bu qaydada inkişafı bizi sevindirir. Nəzərə almaq lazımdır ki, Özbəkistan Orta Dəhlizin bir seqmentidir. Çünki Orta Dəhliz vasitəsi ilə təkcə Qazaxıstan üzərindən əlaqə qurulmur. Çin-Qırğızıstan-Özbəkistan dəmir yolu sürətlə tikilməkdədir. Sözügedən dəmir yolunun tikintisini Çin maliyyələşdirir. Coğrafi yerləşməsi Özbəkistana dənizlərə çıxışa imkan verməsə də sözügedən ölkə bu çıxışın ən optimal yollarının axtarışındadır. Hesab edirəm ki, Naxçıvan üzərindən Türkiyəyə, oradan Aralıq dənizinə çıxış Özbəkistan üçün ən etibarlı bir marşrut olacaqdır. Bu, Orta Dəhliz üzərindən daha çox tranzit yükün daşınmasına təkan verəcək. Nəzərə alsaq ki, Zəngəzur dəhlizinin davamı Naxçıvan üzərindən keçəcək, bu, Muxtar Respublikanın iqtisadi inkişafına yalnız fayda verəcək. Bu yol əsasən iki qardaş ölkənin – Azərbaycan və Türkiyənin ərazisindən keçəcəkdir. Bu həm də orta yolun nə qədər əhəmiyyətli və iqtisadi cəhətdən nə qədər səmərəli olduğunu bir daha göstərir. Yol həm də Azərbaycanla Mərkəzi Asiya ölkələri arasında ticarət əlaqələrinin daha səmərəli daşımalarla müşayiət olunmasına şərait yaradacaqdır”.
Vidadi ORDAHALLI
