Azərbaycan iqtisadiyyatı son bir ildə 1.4 faiz artıb, son bir ayda geriləyib. 2025-ci ildə ölkədə 129.1 milyard manatlıq və ya əvvəlki illə müqayisədə 1.4 faiz çox Ümumi Daxili Məhsul (ÜDM) istehsal olunub. Bu barədə Dövlət Statistika Komitəsi məlumat yayıb.
İqtisadiyyatın neft-qaz sektorunda əlavə dəyər 1.6 faiz azalıb, qeyri neft-qaz sektorunda isə 2.7 faiz artıb. Əhalinin hər nəfərinə düşən ÜDM 12 min 602.2 manata və ya 7 min 413 ABŞ dollarına bərabər olub. Qonşu Gürcüstanda bu göstərici 10 min 181 dollar, Ermənistanda 9 min 433 dollar proqnozlaşdırılır. Fərdi sahibkarlar 2025-ci ildə 63.1 milyard manatlıq və ya 2024-cü illə müqayisədə 1 faiz az sənaye məhsulu istehsal ediblər. Hökumət 2025-ci ilin əvvəlində artımı 3.5 faiz proqnozlaşdırırdı. 2024-cü ildə isə ölkədə ÜDM 4.1 faiz artmışdı. Ekspertlər Azərbaycan iqtisadiyyatındakı indiki vəziyyəti ölkənin neft hasilatının azalması və "qara qızıl"ın 2024-cü illə müqayisədə ucuzlaşması ilə izah edirlər. Üstəlik, Azərbaycanda ötən il əsas kapitala yönəldilən investisiya 2024-cü illə müqayisədə 5.6 faiz azalıb. DSK vurğulayır ki, 2025-ci ildə əsas kapitala 21 milyard 226.1 milyon manat investisiya yatırılıb. Neft-qaz sektoruna qoyulan investisiyaların həcmi 10.3 faiz, qeyri neft-qaz sektoruna isə 3.9 faiz azalıb.
Ramil QULİYEV
