06/02/2023 13:34
728 x 90

Bank kreditinin inzibati cərimələrə nə dəxli var?..

img

Azərbaycanda inzibati cərimə edilmiş şəxslər banklardan kredit alarkən problemlə üzləşəcəklər. Bu yenilik gələn ildən tətbiq ediləcək. Azərbaycanda vətəndaşların kredit məlumatlarının toplandığı qurum – Azərbaycan Kredit Bürosu (AKB) "Elektron Hökumət"in inkişaf mərkəzi ilə birlikdə bu prosesə artıq başlayıb.

Xatırladaq ki, Azərbaycan Kredit Bürosunda ölkə vətəndaşlarının bank, BOKT və digər qurumlara olan kredit borcları, həmin kreditlərin necə qaytarılması vəziyyəti, eləcə də kommunal qurumlara edilən ödənişləri barədə məlumatlar toplanır.

Bu məlumatlar əsasında vətəndaşların kredit qabiliyyəti müəyyən olunur, eləcə də kredit reytinqi tərtib edilir. Nəticədə banklar vətəndaşların kredit müraciətlərinə baxdıqda ilk növbədə AKB-nin məlumatlarını araşdırırlar və kreditin ayrılıb-ayrılmaması barədə qərar bu məlumatlara əsaslanır.

İndi isə AKB-yə toplanan məlumiatların siyahısına təkcə bank kreditləri deyil, həm də cərimələr barədə məlumatlar əlavə ediləcək. Vətəndaşların ödənişləri – o cümlədən inzibati cərimələr barədə məlumatlar da Kredit Bürosuna yerləşdiriləcək. Nəticədə banklar vətəndaşların kredit müraciətlərinə baxarkən Azərbaycan Kredit Bürosuna sorğu verdikdə onun təkcə kreditlərini və kredit tarixçəsini deyil, həm də yol polisi və digər qurumlar tərəfindən yazılan cərimələrini də görəcəklər. Bura yol polisi ilə yanaşı, BNA-nın yazdığı cərimələr də aiddir. Banklar müştəriyə kredit verilməsi barədə qərar verəndə belə hallar olmasına da diqqət yetirəcəkər.

Yeni qərar ictimaiyyət arasında narazılığa səbəb olub. Ekspertlər isə hesab edir ki, yeniliyə səbəb vətəndaşları inzibati öhdəlikləri vaxtında yerinə yetirməyə təşviq etməkdir.

  • Əkrəm Həsənov: “Vətəndaşlar daha məsuliyyətli şəkildə üzərinə düşən öhdəlikləri icra edəcək”

Bank sahəsi üzrə ekspert Əkrəm Həsənov “Bakı-Xəbər”ə açıqlamasında qeyd etdi ki, Kredit Bürosunun vəzifəsi odur ki, ondan borc almaq istəyənin maliyyə vəziyyətini, borclarını qiymətləndirə bilsin. Kredit Bürosunun təyinatı, məqsədi gələcəkdə problemli kreditlərin qarşısını almaqdır: “Burda narazılığa əsas yoxdur. Banklarla gələcəkdə hər hansı bir problemin olmaması üçün belə bir addım atılır. Inzibati cəriməsi olan şəxslərin kredit əldə etmək işi çətinləşəcək”.

Həmsöhbətimiz hesab edir ki, bu yenilik sayəsində vətəndaşlar inzibati öhdəlikləri vaxtında icra edə biləcək. Vətəndaşlar daha məsuliyyətli şəkildə  üzərinə düşən öhdəlikləri icra edəcək.

  • Vüqar Bayramov: “Kommersiya bankları kreditləri təqdim edən zaman risq faktorunu nəzərə almağa çalışır”

Millət vəkili Vüqar Bayramov bildirdi ki, kommersiya bankları kreditləri tədqim edən zaman risq faktorunu nəzərə almağa çalışırlar. Praktik olaraq biz bank kreditləri üzrə şərtlərin xeyli dərəcədə sərtləşdirilməsini müşahidə edirik: “Nəticə etibarı ilə bu gün bankların aktiv sərəncamında təxminən 5 milyard manata yaxın passiv vəsaitlər var. Bankların həmin vəsaitləri kredit formasında real sektora, eləcə də digər istiqamətlərə yönətməsi və yeni qaydaların müəyyənləşdirilməsi praktik olaraq şərtlərin sərtləşdirilməsinə gətirib çıxaracaq. Bu baxımdan, kommersiya bankları şərtləri sərtləşdirmək deyil, daha çox əlçatanlığın artırılması ilə bağlı qaydaların müəyyənləşdirilməsinə çalışmalıdır. Birmənalı şəkildə biz həm vətəndaşların, həm də biznesdə, xüsusən real sektorun kreditlərə çıxış imkanlarının artırılması, onların maliyyə resurslarının daha geniş şəkildə paylanmasının tərəfdarıyıq və təkliflərimiz bu istiqamətdədir”.

Günel CƏLİLOVA

Peşə etikası

Son xəbərlər