Azərbaycanda gələn il yaşa görə pensiyanın məbləği 455 manat olacaq. Bu barədə Milli Məclisin Əmək və sosial siyasət komitəsinin sədri Musa Quliyev bildirib.
Onun sözlərinə görə, “Dövlət Sosial Müdafiə Fondunun 2023-cü il büdcəsi haqqında” qanun layihəsinə əsasən, növbəti ildə Fondun həm gəlir, həm xərc hissəsi 6,3 milyard manat təşkil edəcək.
Komitə sədri qeyd edib ki, gələn il orta aylıq pensiyanın məbləği 423 manat, yaşa görə pensiyanın məbləği 455 manat, əlilliyə görə pensiya 369 manat, ailə başçısını itirməyə görə pensiyanın məbləğinin isə 374 manat olacağı proqnozlaşdırılır.
Maraqlıdır, yaşa görə orta aylıq pensiyanın gələn il 455 manat olması nə deməkdir?
Vüqar Bayramov: “Yaşa görə orta aylıq pensiya məbləğinin 455 olması müsbət addımdır”
Millət vəkili Vüqar Bayramov “Bakı-Xəbər”ə açıqlamasında qeyd etdi ki, yaşa görə orta aylıq pensiya ölkədəki orta aylıq pensiyanın məbləğini göstərir: “Burada minimum və digər pensiya alan vətəndaşların adlığı təqaüdün orta vəsaitindən söhbət gedir. Orta aylıq yaşa görə pensiya təqaüdçülərin sosial təminatı baxımından vacib göstəricilərdən biridir. Bu pensiya növündə artımın olması pensiya məbləğlərinin artması ilə bağlıdır”.
Millət vəkili hesab edir ki, yaşa görə orta aylıq pensiya məbləğinin 455 olması müsbət addımdır. Növbəti illərdə də orta aylıq pensiya məbləğinin artması gözlənilir.
Xalid Kərimli: “Azərbaycanda pensiyalar hər ilin əvvəlində indeksləşdirilir”
İqtisadçı-ekspert Xalid Kərimli də qeyd edib ki, Azərbaycanda pensiyalar hər ilin əvvəlində indeksləşdirilir: “Pensiyaların indeksləşdirilərək artırılması hər ilin 1 yanvar tarixinə ondan əvvəlki il üzrə muzdla çalışanların Dövlət Statistika Komitəsinin (DSK) açıqladığı orta aylıq əməkhaqqının illik nominal artımına uyğun olaraq reallaşdırılır. Statistik məlumatlara görə, 2022-ci ilin 9 ayı ərzində Azərbaycanda muzdla işləyən işçilərin orta aylıq əməkhaqqı təxminən 14,4 faiz artıb. Bu artımın ilin sonunadək də davam edəcəyi gözlənilir. Təqribən bu artım 14-15 faiz həcmində olacaq. Bu barədə dəqiq məlumat dördüncü rübün nəticələri açıqlandıqdan sonra bilinəcək. Amma görünən budur ki, orta aylıq əmək haqqı bir qədər artıb. Hökumət də bu istiqamətdə rəqəmlər dəqiq bəlli olandan sonra pensiyaları təxminən 14-15 faiz arası artıracaq. Pensiyalar artandan sonra təbii ki, orta aylıq pensiyaların məbləğində də artım olacaq. Yəqin ki, əmək və əhalinin sosial müdafiəsi nazirinin bununla bağlı əlində detallı məlumatlar var ki, belə bir rəqəmi hesablayaraq ictimailəşdirib. Mən nazirin bu proqnozuna heç bir şübhə etmirəm. Bir məqamı da vurğulayım ki, burada söhbət orta pensiyadan gedir. Tutaq ki, bir pensiyaçının pensiyası 700 manat olacaq, digərinin 350 manat olacaq. Amma orta pensiya nazirin dediyi rəqəm ətrafında ola bilər və bu rəqəm realdır. Artımlar isə 2023-cü ilin yanvarın əvvəlində hesablanaraq pensiyaçılara veriləcək”.
Günel CƏLİLOVA
