Azərbaycanda kölgə iqtisadiyyatı ilə mübarizənin son mərhələsi başlanır... İdeya var...
Məlum olduğu kimi, Yeni Azərbaycan Partiyasının (YAP) yaradılmasının 30 illiyi münasibətilə tədbir keçirilib. Keçirilən tədbirdə çıxış edən Prezident İlham Əliyev bir sıra məsələlərə toxunub.
O cümlədən, artan iqtisadi göstəriciləri qeyd edən ölkə başçısı bu sahədə bir sıra neqativ halların hələ də mövcud olduğuna deyib: “Əlbəttə ki, bu gün hələ də görüləsi işlər çoxdur. İqtisadiyyatımızın şəffaflaşdırılması, xoşagəlməz hallara qarşı mübarizə, kölgə iqtisadiyyatının həcminin əhəmiyyətli dərəcədə azaldılması, biznes mühitinin yaxşılaşdırılması, inhisarçılığa qarşı daha ciddi mübarizə - bütün bunlar gündəlikdə duran məsələlərdir. O cümlədən dövlət şirkətlərində korporativ idarəetmə üsulunun tətbiq edilməsi bu günün reallıqlarını əks etdirir. Əminəm ki, bu gün aparılan iqtisadi islahatlar - strateji xətt üzrə aparılan bu islahatlar yaxın gələcəkdə də bizə əlavə imkanlar verəcək. O cümlədən Qarabağı və Şərqi Zəngəzuru öz hesabımıza yenidən qurmaq və bütün məqsədlərə çatmaq üçün bizə mütləq güclü iqtisadiyyat bundan sonra da lazım olacaq. Çünki bu əsasdır”.
Təbii ki, inhisarçılıq, kölgə iqtisadiyyatı və bu kimi digər neqativ hallar aradan qaldırılmadan, qarşıya qoyulan iqtisadi hədəflərə çatmaq çətin olacaq.
Məsələyə münasibət bildirən iqtisadçı-ekspert Fuad İbrahimovun fikrincə, təəssüf ki, iqtisadiyyatda bir sıra problemlər hələ də qalmaqdadır: “Bu baxımdan cənab Prezidentin fikirləri ilə tam razıyam. İqtisadiyyatda mövcud olan neqativ hallarla mübarizə sonsuza qədər davam edə bilməz. Müvafiq qurumlar bu yöndə səylərini artırmalıdır. Hər şeyi prezidentdən gözləmək doğru deyil. İnhisarçılığı müəllim, həkim, mühəndis yaratmayıb. İnhisarçılığı məlum olan bir neçə şəxs yaradıb və bu sistemi qurub. Bunu cənab Prezident qeyd edir. Bəs müvafiq qurumlar hara baxır? Əsasən də İqtisadiyyat Nazirliyinin üzərinə böyük məzuliyyət düşür. İnhisarçılıq və kölgə iqtisadiyyatı elə bir şeydir ki, müasirlik gəldikcə o şaxələnir. Necə ki müasir texnologiyalar, informasiya vasitələri həyatımızı “zəpt” edirsə, onlar da iqtisadiyyatımızı ələ keçirir. Bütün bunlar xərçəng xəstəliyi kimi bir şeydir. Sonra onu təmizləmək çox çətin olur. Həmin neqativ halları aradan qaldırmaq üçün yeni sistemlər qurulmalıdır. Bu isə vaxt itkisi, xərclərin çoxalmasına gətirib çıxaran göstəricilərdir. Bu gün Azərbaycanda kölgə iqqtisadiyyatının bazasını təşkil edən inhisarçılıq və kölgə iqtisadiyyatıdır. Biz bunun tədqiqatlarını aparmışıq. Rəqəmlərin üzərində 20-30 faiz məlum olmayan qiymətəmələgəlmə artımı var. Nəyə görə belə olmalıdır? Cənab Prezident hər bir şərait yaradıb. Açıq şəkildə problemləri bəyan edir və fikirlərini söyləyir. Deyir ki, belə hallara qarşı mübarizə aparılmalıdır. Dövlət Təhlükəsizliyi Xidməti istisna olmaqla, digər dövlət nəzarət orqanlarının bu yöndə fəaliyyəti zəifdir. Əsasən də İqtisadiyyat Nazirliyi bu yöndə üzərinə düşən işləri həyata keçirmir. Əfsuslar olsun ki, ölkə iqtisadiyyatında monopoliya, inhisarçılıq qalmaqdadır. Sözdə qanunvericilik bazamız əladır, hər şey var, amma ortada real hərəkət yoxdur. Hamı gözləyir ki, bütün problemləri prezident həll eləsin”.
Bu baxımdan iqtisadçı-ekspert hesab edir ki, konkret addımlar atılmalıdır.
Vidadi ORDAHALLI
