Milli Məclis “Azərbaycan Respublikasında 2023-cü il üçün yaşayış minimumu haqqında” Azərbaycan Respublikası qanununun layihəsini birinci oxunuşda müzakirəyə çıxarıb. Qanun layihəsi birinci oxunuşda müzakirələrdən sonra qəbul olunub.
Qeyd edək ki, layihəyə əsasən, əhalinin əsas sosial-demoqrafik qrupları üzrə yaşayış minimumunun məbləği 2023-cü ildə 246 manat təşkil edəcək. Əmək qabiliyyətli əhali üçün bu məbləğ 261 manat, pensiyaçılar üçün 199 manat, uşaqlar üçün isə 220 manat təşkil edəcək.
- Aydın Hüseynov: “Hökumət hədəf seçdiyi sosial meyarların müasir yaşayış normalarına çatdırılması istiqamətində əhəmiyyətli addımlar atır”
Yaşayış minimumunun 246 manat olması barəsində fikir bildirən millət vəkili Aydın Hüseynov “Bakı-Xəbər”ə açıqlamasında qeyd etdi ki, Azərbaycanda 2023-cü ildə pensiyaçılar üçün yaşayış minimumu 199 manat olacaq. Növbəti il üzrə pensiyaçılar üçün yaşayış minimumu 23 manat və ya 13,1% artırılaraq 199 manat məbləğində nəzərdə tutulub. Bu da minimum pensiya göstəricinin 82,9%-i həcmində olmaqla pensiya həddinə yaxınlaşma deməkdir: “Hökumət hazırda çalışır ki, minimum pensiya ilə yaşayış minumum arasındakı fərqi tamamilə bağlasın. Necə ki, gələn ildən etibarən yaşayış minimumu və ehtiyac meyarının məbləği eyni həcmdə olmaqla bərabərləşəcək. “2023-cü il dövlət büdcəsi haqqında” Qanun layihəsinə əsasən, növbəti ildə yaşayış minimumu 2022-ci illə müqayisədə 17,15%, ehtiyac meyarı isə 23% artaraq 246 manat təşkil edəcək. Bu o deməkdir ki, hökumətin hədəf seçdiyi sosial meyarların müasir yaşayış normalarına çatdırılması istiqamətində əhəmiyyətli addımlar atılır”.
Millət vəkilinin sözlərinə görə, son illərdə aparılan sosial islahatlar çərçivəsində pensiyaçıların sosial müdafiəsinin gücləndirilməsinə yönəlmiş addımlar atılır: “Bir müddət əvvəl “Əmək pensiyaları haqqında” Qanunda dəyişiklik edildi və bütün əmək pensiyalarının indeksləşdirilməsi ilə bağlı qərar qəbul edildi. Bu istiqamətdə digər sosial xarakterli layihələrin icrası davam etdirilir ki, bunlardan biri də minimum pensiyaların normal həyat şəraitinə uyğunlaşdırılmasından ibarətdir. Ona görə də, pensiyaçılar üçün yaşayış minimumunun artırılması sosial dəstək paketləri qəbul olunan zaman minimum aylıq əmək pensiyasının məbləğinin artmasına da müsbət təsirini göstərəcək. Bu isə on minlərlə pensiyaçının əhatə olunması deməkdir”
- Kamran Məmmədli: “Yaşayış minimumunun ehtiyac meyarına bərabərləşdirilməsinin nəzərdə tutulması doğru addımdır”
Iqtisadçı Kamran Məmmədli bildirdi ki, yaşayış minimumunun ehtiyac meyarına bərabərləşdirilməsinin nəzərdə tutulması doğru addımdır: “17 faiz artımın olması hazırkı inflyasiya şəraitində vacib addımdır. Hazırda bizdə ümumi inflyasiya göstəricisi, rəsmi statistikaya əsasən, 13 faiz üzərində olduğundan, yaşayış minimumunun 17 faiz artırılması kifayət edər. Amma bir məsələ var ki, rəsmi inflyasiya göstəricisi ilə əhalinin alıcılıq qabiliyyəti arasında real fərq var. Belə ki, məhsulların, xidmətlərin, qida inflyasiyasının yüksək həddə olması əhalinin alıcılıq qabiliyyətinə ciddi təsir göstərib”.
Günel CƏLİLOVA
.jpg)
