Azərbaycan Mərkəzi Bankı ölkədə ilk dəfə olaraq avtomobillərin icbari sığortası üzrə şikayət indeksini açıqlayıb.
Avtomobillərin icbari sığortası sahəsində istehlakçıların məlumatlılığının və sığortaçıların istehlakçılara münasibətdə ədalətli davranışının yüksəldilməsi məqsədilə bu sahədə Mərkəzi Banka daxil olan şikayətlər üzrə hesablanan "şikayət indeksi"nin ictimaiyyətə açıqlanması qərara alınıb. Beləliklə, son bir ildə avto-icbari sığorta üzrə Mərkəzi Banka 1872 sayda şikayət daxil olub. Ən çox şikayət (5,08) "AtaSığorta" şirkəti ilə bağlı olub. "Günay Sığorta" siyahıda ikinci, "Azərsığorta" isə üçüncü olub. AMB-yə görə, son bir ildə Azərbaycan avtosığorta bazarında şikayət daxil olmayan yegana şirkət "Naxçıvan Sığorta" şirkəti olub.
Mərkəzi Bankın yaydığı məlumatda qeyd olunur ki, sığorta bazarı iştirakçılarının sığorta istehlakçılarına münasibətdə ədalətli davranışının daha da yaxşılaşdırılması, sığorta sahəsində ictimai məlumatlılığın genişləndirilməsi məqsədilə qabaqcıl beynəlxalq təcrübələrə əsaslanan tədbirlərini davam etdirəcək.
Ekspertlər hesab edir ki, sığorta şirkətləri üzrə şikayət indeksinin açıqlanması şirkətlərin məsuliyyətini daha da artıracaq. Beləliklə, sığorta şirkətləri daim məsuliyyət hiss edəcəklər ki, müştərilərini itirməmək üçün bu indeksdə reytinqləri aşağı düşməsin.
“Bu analizdən sonra sığorta şirkətləri vətəndaşların sorğularına kifayət qədər həssas yanaşmağa çalışacaqlar”
İqtisadçı Xalid Kərimli bildirdi ki, vətəndaşlar sığorta şirkətlərini seçəndə bu meyarlara əsaslanacaq, hansı sığorta şirkətindən narazılığın olub-olmadığını təyin edəcəklər: “Bu, vətəndaşların seçiminə təsir göstərən bir indeksdir. Sığorta şirkətləri bu indeksi analiz edəcəklər. Bu analizdən sonra sığorta şirkətləri vətəndaşların sorğularına kifayət qədər həssas yanaşmağa çalışacaqlar. Amma sığorta şirkətləri görsələr ki, bu indeks işləmir, obyektiv deyil, təhrif olunur, o zaman bu, o qədər də effektiv olmayacaq. Eyni zamanda bunun geniş təqdimatı olmalıdır".
Günel CƏLİLOVA
