Azərbaycanda sahibkarlığın inkişaf etdirilməsi üçün kifayət qədər imkanlar var və bu sahə birbaşa dövlət tərəfindən dəstəklənir. Aidiyyəti qanunvericilik aktlarında sahibkarlığın inkişafına dəstək mexanizmləri formalaşdırılıb.
Prezident İlham Əliyevin sərəncam və fərmanları ilə Azərbaycanda sahibkarlığın inkişafına, tərəqqisinə hərtərəfli diqqət yetirilir. Prezident İlham Əliyevin 11 oktyabr 2021-ci il tarixində imzaladığı “ Sahibkarlığın inkişafına dövlət dəstəyi sahəsində idarəetmənin təkmilləşdirilməsi haqqında” Fərman son dövrlər u sahəyə ciddi fayda verib. Bundan əvvəl imzalanan sənədlər də bu istiqamətə müsbət təsir edib.Son dövrlər sahibkarlığın inkişafı sahəsində ciddi islahatlar da aparılıb ki, bu da prosedur qaydalarının sadələşməsinə, bürokratik, süründürməçilik kimi halların aradan qaldırılmasına səbəb olub. Bu gün dövlət sahibkarlığa, liberal iqtisadiyyatın təşviqinə ciddi diqqət göstərir. Azərbaycanın hər yerində sahibkarlığın inkişafı istiqamətində işlər görülür, dövlət pandemiyadan və sairdən zərər çəkdiklərinə görə onlara dəfələrlə maliyə yardımları ayırıb, maliyə dəstəyi göstərib. Dövlət öz öhtəliyini yerinə yetirir. Sahibkarların da dövlət, cəmiyyət qarşısında ictimai-sosial məsuliyyəti olmalıdır.
Azərbaycanda sahibkarlığın inkişafına dövlət dəstəyi göstərilir və sahibkarlara geniş imkanlar yaradılır. Sahibkarlar necə, dövlətin qayğı siyasətinə müsbət cavab verə bilirmi? Sahibkarın ictimai məsuliyyəti qənaətbəxşdirmi?
Ekspertlər hesab edirlər ki, sahibarlara dəstək üçün qəbul edilən dövlət proqramları onlara böyük dəstək olur. Ümumiyyətlə, sahubkarların özləri də dövlətin onlara göstərdiyi dəstəyə öz fəaliyyəti ilə cavab verməlidir, dövlət əhəmiyyətli layihələrdə yaxından iştirak etməlidir. Ekspertlərin sözlərinə görə, Vətən müharibəsi dövründə Azərbaycan sahibkarları orduya dəstək göstərmək istiqamətində böyük işlər görüblər və sonrakı mərhələdə də şəhid ailələrinə, qazilərə dəstək göstərən sahibkarlar az deyil.
“Sahibkarların sosial və ictimai məsuliyyəti onların könüllü təşəbbüsüdür”
Ekspertlərin bildirdiyinə görə, bəzi sahibkarlar dövlətə ciddi dəstək versə də, öz ictimai-sosial məsuliyyətini dərk edib müxtəlif fəaliyyətlər ortaya qoysalar da, amma dövlətdən bəhrələnib xalqa xeyir verməyən sahibkarlar da var. Əlbəttə, sahibkarlıq fəaliyyəti ilə məşğul olan şəxslər heç zaman öz ictimai-sosial məsuliyyətini yaddan çıxarmamalıdır.
Məhz Prezident İlham Əliyevin də “Sahibkarlığın sosial məsuliyyəti məsələləri vardır. Mən sahibkarların bu sosial məsuliyyəti məsələlərinə olan diqqətini alqışlayıram. Mənə aydındır ki, bir çox yerlərdə sahibkarlar öz təşəbbüsü vasitəsi əsasında sosial layihələr yetirirlər məktəblər, bağçalar tikirlər. Həyata keçirilənlər çox gözəl və təqdirəlaiq hallardır. Lakin bütün bu işlər könüllü olaraq həllini tapmalıdır. Sahibkarların sosial və ictimai məsuliyyəti onların könüllü təşəbbüsüdür” deməsi məhs sahibkarlıq fəaliyyətinin sosial nəticələrinin tədqiqinin və araşdırılmasının aktual olduğunun göstəricisidir. Qeyd edək ki, sahibkarların sosial məsuliyyətinin daha da artırılması vacibdir. Ekspertlər hesab edir ki, güzəştlərin tətbiqi zamanı şəffaf, vicdanlı, sosiallıq nümayış etdirən biznes nümayəndələrinə, sahibkarlara üstünlük verilməsi çox zəruridir. Çünki onlar sosial məsuliyyətlərini dərk edirlər və cəmiyyətə faydalı olmaqdan qaçmırlar. Ekspertlərin fikrincə, sahibkarlarda sosial məsuliyyət yaratmaq üçün maatifçilik tədbirlərinə də ciddi ehtiyac var.
“Fəaliyyətdə olan sahibkarlar dövlətdən dəstək alırlar”
Mövzu ətrafında “Bakı-Xəbər”ə danışan Liberal İqtisadçılar Mərkəzinin rəhbəri Akif Nəsirlinin sözlərinə görə, Azərbaycanda hökumət sahibkarlara kifayət qədər dəstək verir: “Fəaliyyətdə olan sahibkarlar dövlətdən dəstək alırlar. Onların bir hissəsinə güzəştli kredit verilir, bəzilərinə vergi güzəştləri edilir. Məsələn, bu il ərzində sahibkarların dövlətdən 2 milyard manatdan çox kredit alması planlaşdırılır. Kiçik və orta sahibkarlara bu qədər güzəştli kredit veriləcəkdir. Bunlar sahibkarların fəaliyyətinin daha da güclənməsinə, bizneslərinin çiçəklənməsinə səbəb olur. Bunlar sahibkarların ümumi iqtisadi siyasətə töhfəm vermələri üçün nəzərdə tutulub”.
A.Nəsirli qeyd etdi ki, lakin onların dövlət dəstəyinə qarşılıq verməsi bir qədər fərqli məsələdir. Sahibkarın ictimai məsuliyyəti dedikdə biz bunu adi insan mədəniyyəti kimi qəbul etməməliyik. A.Nəsirli deyir ki, hökumət onlara dəstəyi onların ictimai məsuliyyətinin artması üçün vermir, o yardımı, güzəştli krediti ona görə verir ki, onlar istehsalı artırsınlar: “Onlara o güzəştlər ona görə edilir ki, onlar istehsalla məşğul olsunlar, məhsul bolluğu olsun, yeni iş yerləri açılsın və sair. Bunun üçün sahibkara yardım edilir. Amma iqtisadiyyatda sahibkarın ictimai məsuliyyət kimi görünən xarakterini formalaşdıran tamam başqa bir mexanizm var. Bu rəqabət mexanizmidir. Yəni bazar iqtisadiyyatında sahibkarın bizə ictimai məsuliyyət kimi görürən xarakterini məhz rəqabət mühiti formalaşdırır, rəqabət mühiti yaradır. Amma çox təəssüf ki, Azərbaycanda rəqabət mühitindən çox inhisarçılıq var. Yəni bazarın bir əldə toplanması var”-deyə qurum rəhbəri bildirdi.
İradə SARIYEVA Yazı Azərbaycan Respublikasının Medianın İnkişafı Agentliyinin maliyyə dəstəyilə çap olunur.
