Rusiyaya qarşı iqtisadi təzyiqlərin miqyası hər gün genişləndirilir. Bu isə ölkə iqtisadiyyatının çökdürülməsinə hesablanıb. Bu vəziyyət dolayısı ilə bizə də zərər vuracaq. Məsələ ondadır ki, Neft Fondu Rusiya bazarlarına, oradakı səhmlərə və daşınmaz əmlaka 633 milyon dollar həcmində investisiya yatırıb.
Bu arada Standard and Poor's (S&P) Beynəlxalq Reytinq Agentliyi Rusiyanın kredit reytinqini BB-dən CCC-yə endirdi, D-ə (defolta) bir neçə addım qaldı. Fitch Ratings isə xarici valyutada artıq defolta endirib. Moody's Agentliyi hökümətin dövlət borclarını ödəmə qabliyyətini itirdiyini bildirib. Yandex, VTB və digər səhmdarlarına defolt risqi barəsində xəbərdarlıq edib. Microsoft, Hermes, Swarovski, Panasonic də Ukraynadakı hadisələrdən narahatlığını ifadə edib, Rusiyada fəaliyyətini dayandırdı. BP, Shell və Exxon da Rusiya enerji bazarını bəyanatla tərk edib. S7 aviaşirkəti martın 6-dan bütün istiqamətlər üzrə beynəlxalq reyslərini təxirə salıb.
Bütün bu baş verənlərin fonunda Azərbaycan vəsaitlərini hansı təhlükələr gözləyir?
“Azərbaycan belə bir addım atsa, Rusiyanın narazılığına səbəb olacaq”
Məsələyə münasibət bildirən iqtisad üzrə fəlsəfə doktoru Firdovsi Şahbazovun fikrincə, Rusiya iqtisadiyyatının çökdürülməsi Neft Fondunun vəsaitlərini təhlükə altına atır: “Nəinki Neft Fondunun, ümumiyyətlə Rusiyanın səhm, əmlak bazarına vəsait qoyan bütün xarici tərəfdaşların vəsaitlərini risq altına atır. Bu səbəbdən müharibə başlamamış bir çox xarici şirkətlər vəsaitlərini Rusiyadan çıxarıb. Fikrimcə, Azərbaycan da belə addım ata bilərdi. Məsələn, Neft Fondu VTB bankına yarım milyard dollar vəsait yatırıb. Ancaq məsələ ondadır ki, Azərbaycan belə bir addım atsa, bu, Rusiyanın narazılığına səbəb olacaq. Bu da dövlətlərarası münasibətlərə təsir edə bilər. Biz nəzərə almalıyıq ki, Rusiya avtoritar ölkədir. Ukraynada baş verənlər bir daha bunu sübut etdi. O baxımdan məsələnin bu tərəfi də var. Bəzən deyirlər ki, Azərbaycan niyə vəsaitlərini Rusiyadan çəkmir? Bunu deyənlər məsələnin digər tərəfini görmək istəmir. Bütün hallarda, Rusiya iqtisadiyyatının çökməsi Neft Fondunun oradakı vəsaitlərini zərbə altında qoyur. Zərəri azaltmaq üçün müəyyən çıxış yolları barədə düşünmək lazımdır. Fikrimcə, Neft Fondu bununla bağlı ciddi düşünməlidir”.
Ekspert onu da qeyd etdi ki, sanksiyaların Azərbaycan üçün də mənfi fəsadları özünü göstərəcək.
Vidadi ORDAHALLI
