Rəqəmsal İnkişaf və Nəqliyyat Nazirliyinə məxsus “Azərpoçt” MMC 2020-ci ili 7 milyon 747 min manat xalis zərərlə başa vurub. Halbuki, şirkət 2019-cu ildən 2 milyon 721 min manat xalis mənfəətlə çıxıb. Bununla da, şirkətin yığılmış zərəri 54,6% artaraq 21,935 milyon manata çatıb.
Xatırladaq ki, “Azərpoçt” kommersiya qurumu kimi 2009-cu ildə eyni adlı dövlət müəssisəsinin bazasında yaradılıb. Onun nizamnamə kapitalı 73,345 milyon manatdır. Şirkət ölkənin milli poçt operatorudur.
Məlumat üçün bildirək ki, 2020-ci ildə “Azərpoçt”un poçt xidmətlərindən gəlirləri 18,344 milyon manat (2019-cu illə müqayisədə 15,8% çox), maliyyə xidmətlərindən gəlirləri 13,915 milyon manat (0,2% az), digər xidmətlərdən gəlirləri 8,888 milyon manat (5,9% az), əməliyyat xərcləri 25,68 milyon manat (20,6% çox), ümumi və inzibati xərcləri 19,122 milyon manat (15,8% çox), köhnələmə və amortizasiya xərcləri 5,835 milyon manat (13,8% az), digər əməliyyat gəlirləri 1,628 milyon manat (46,3% az), maliyyə xərcləri 56 min manat (8% az), maliyyə aktivləri üzrə ehtimal olunan kredit zərərlərinin geri qaytarılmasından gəlirlər 4 min manat (1 il bundan əvvəl zərər olub), xarici valyutadan gəlirləri 17 min manat (1 il bundan əvvəl zərər olub), mənfəət vergisi ödəmələri üzrə qənaəti isə 149 min manat (1 il bundan əvvəl vergi ödəyib) təşkil edib. 2021-ci il yanvarın 1-nə “Azərpoçt”un aktivləri 155,321 milyon manat olub ki, bu da 1 il əvvələ nisbətən 16,7% azdır. Hesabat dövründə şirkətin öhdəlikləri 18,3% azalaraq 103,855 milyon manata, balans kapitalı isə 13,1% azalaraq 51,466 milyon manata düşüb.
Maraqlıdır, "Azərpoçt”un zərərə uğramasının səbəbi nədir və bu vəziyyətdən necə çıxa bilər?
“Şirkətlər ziyanla işlədiklərini bəyan etdikdən qısa müddət sonra məhsulun qiymətinin artırılmasına şərait yaradırlar”
Iqtisadçı ekspert Natiq Cəfərli bildirdi ki, dövlət şirkətlərinin, o cümlədən “Azərpoçt”un ziyanla işləməsinin səbəbi onların xərcləri ilə bağlıdır. Yəni xərc hissələrinin şişirdilməsi, bu sahəyə nəzarətin edilməməsi onların zərərlə işləməsinə səbəb olur: “Bu səbəbdən də dövlət şirkətlərində ciddi audit yoxlamalara ehtiyac var, həmçinin, “Azərpoçt”da da. Qurumların özləri də nə səbəbdən ziyanla işləmələrini ictimaiyyətə açıqlamalıdır”.
Həmsöhbətimiz onu da əlavə etdi ki, şirkətlər ziyanla işlədiklərini bəyan etdikdən qısa müddət sonra məhsulun qiymətinin artırılmasına şərait yaradırlar: “Qiymət artımı üçün öncədən hazırlıq işi görürlər. Ona görə də ziyanla işləmə məsələsi dövlətin üzərindən götürülməlidir. Xərclərə ciddi nəzarət olunarsa, dövlət şirkətlərinin normal fəaliyyət göstərməsi təmin edilməlidir”.
Günel CƏLİLOVA
