Pandemiya uzun müddətdir ki, bir çox sahələrdə durğunluq yaratsa da, öncəki aylarla müqayisədə hazırda daşınmaz əmlak bazarında - alqı-satqıda canlanma müşahidə olunur. Son zamanlar daşınmaz əmlak bazarında qiymət dəyişikliyi müşahidə olunur.
Daşınmaz əmlak bazarında qiymətin yüksəlməsi ipoteka ilə verilən evlərin sayına da təsir edib. Belə ki, İpoteka və Kredit Zəmanət Fondunun müvəkkil bankları Fondun bu il yanvarın 24-də onlara ayırdığı kredit limitini realizə etməkdə çətinlik çəkirlər. Məlumdur ki, ipoteka kreditlərinin illik faiz dərəcəsində güzəştə getməyən, kreditləri illik 8%-lə verməyə çalışan bankların çoxu hazırda illik 7%-lə kredit təklif edir. Bundan başqa, Elektron Hökumət Portalında (e-gov.az) demək olar ki, bütün banklar üzrə ipoteka kreditləşməsinin açıq olduğu görünür. Doğrudur, söhbət yalnız adi ipoteka kreditlərindən gedir (güzəştli ipoteka kreditləri üzrə bütün banklarda limit yoxdur), amma hər halda kredit götürmək üçün vətəndaşların banklar arasında seçim etmək imkanları genişdir.
Ekspertlər hesab edir ki, son vaxtlar ölkədə daşınmaz əmlak qiymətləri kəskin artdığından, ipoteka krediti ilə mənzil almaq istəyənlərin sayı məhduddur.
“Dövlətin müəyyən etdiyi limit adi ipoteka kreditləri üçün 150 min manat, güzəştli ipoteka kreditləri üçün isə 100 min manatdır, odur ki…”
Daşınmaz əmlak bazarı üzrə ekspert Elnur Fərzəliyev bildirdi ki, son vaxtlar xüsusilə yeni tikilmiş binalardakı (göydələn) mənzillərin qiyməti xeyli artıb. Banklar isə ipoteka kreditlərini daha çox yeni mənzillərə verməyə çalışırlar: “Məlumdur ki, Bakının ətrafında, mikrorayonlarda tikilmiş çoxmərtəbəli binalarda belə mənzillərin qiyməti azı 100-150 min manatdır. Dövlətin müəyyən etdiyi limit isə adi ipoteka kreditləri üçün 150 min manat, güzəştli ipoteka kreditləri üçün isə 100 min manatdır. Odur ki, evi kreditlə almaq istəyənlər problemlə üzləşir. Bankdan 100 min manat kredit götürə bilən vətəndaş yeni binalardan 1 otaqlı mənzil ala bilər. SSRİ dövründə tikilmiş və ipotekaya yarayan evlər 9-10 mərtəbəli binalardır ki, onlarda normal qiymətə 2-3 otaqlı ev tapmaq olur. Onları da kreditləşdirməyə bankların marağı azdır”.
Günel CƏLİLOVA
