“Azərbaycan iş adamlarına bu gün burada – Ağdam Cümə məscidinin önündə çağırış edirəm ki, gəlsinlər həm Ağdama, həm də azad edilmiş bütün digər ərazilərə sərmayə qoysunlar, vəsait qoysunlar”. Bu müraciəti Prezident İlham Əliyev Ağdam rayonuna səfəri zamanı səsləndirib.
Dövlət başçısı qeyd edib ki, Azərbaycanda biznes üçün, sahibkarlar üçün çox gözəl şərait yaradılıb: “Dövlət sahibkarları dəstəkləyir və həm mənəvi-siyasi dəstək verilir, eyni zamanda, güzəştli kreditlər verilir. Əlbəttə ki, bölgələrdə infrastruktur layihələrinin icrası sahibkarlıq üçün də gözəl imkanlar yaradır. Ona görə Azərbaycan sahibkarları gərək azad edilmiş torpaqlara gəlsinlər və burada müəssisələr qursunlar, iş yerləri yaratsınlar. Biz azad edilmiş torpaqları ancaq bu yolla tezliklə canlandıra bilərik”.
Prezident onu da bildirib ki, dövlət öz tərəfindən lazımi addımları atır və atacaq, özəl sektorun nümayəndələri də bu işlərdə fəal olmalıdırlar.
İl yarınmdır ərazilərimiz işğaldan azad edilib. Bu müddət ərzində dövlət həm minatəmizləmə işləri həyata keçirir, paralel olaraq həm də infrastruktur yenidən qurulur. Yeni yollar salınır, elektrik xətləri çəkilir, elektrik stansiyaları tikilir, bir sıra yaşayış məntəqələrinin bərpası həyata keçirilir, müasir istehsalat sahələri yaradılır və s. Özəl sərmayənin qoyulması üçün başlıca amil infrastrukturun qurulmasıdıır ki, bunu da dövlət öz imkanları hesabına edir. Ancaq bütün bunlara baxmayaraq, azad olunan ərazilərdə özəl sektor gərəkən fəallığı göstərmir. Halbuki, buna çox ciddi ehtiyac var.
Maraqlıdır, sahibkarlar sözügedən məsələlərdə niyə fəal deyil?
“Hamı, o cümlədən sahibkarlar üzərlərinə düşən işi yerinə yetirməli və əlini daşın altına qoymalıdır”
Məsələyə aydınlıq gətirən iqtisad üzrə fəlsəfə doktoru Firdovsi Şahbazovun fikrincə, sahibkarlar azad olunmuş ərazilərdə sosial məsuliyyət prinsipindən çıxış edərək fəaliyyət göstərməlidilər: “Ancaq təəssüflər olsun ki, iş adamlarının timsalında biz bunu müşahidə etmirik. 15 aydan çoxdur kifayət qədər böyük miqyasda ərazilərimiz işğaldan azad edilib. Həmin ərazilər zəngin həm yerüstü, həm də yeraltı sərvətlərə malikdir. Ancaq sanki sahibkarlarımız hələ gözləmə mövqeyindədilər. Gözləyirlər ki, bütün infrastruktur işləri başa çatsın, əhali geri qayıtsın, ondan sonra bunlar sərmayə qoyuluşu ilə məşğul olsunlar. Hesab edirəm ki, bu yanlış yanaşmadır. Hamı, o cümlədən sahibkarlar üzərlərinə düşən işi yerinə yetirməli və əlini daşın altına qoymalıdır. Orada görülən işlərin miqyası həddən artıq böyükdür. Bu səbəbdən bütün yükü dövlətin üzərinə qoymaq doğru deyil. Hər şeyi dövlətdən umsaq, o zaman bərpa prosesi çox böyük vaxt aparacaq. Yöx, yerli və xarici sahibkarlar fəallıq göstərsələr, özəl sektorun müxtəlif sahələrinə investisiya qoysalar, oradakı potensial imkanları və sərvətləri düzgün dəyərləndirsələr, o zaman bərpa prosesi, yeni-yeni iş yerlərinin açılması daha sürətlə gedəcək. Bir müddət sonra qoyduqları sərmayə müqabilində sahibkarlar gəlir əldə edəcək. Bu baxımdan prezident tamamilə düzgün qeyd etdi ki, azad edilmiş torpaqları ancaq bu yolla tezliklə canlandırmaq olar. Ona görə də yerli sahibkarlar sosial məsuliyyət prinsipindən çıxış edib fədakarlıq göstərməlidir. Bu işə öz töhfələrini verməlidilər. Ən nəhayət, təklif edirəm ki, sözügedən məsələ ilə bağlı respublika miqyaslı biznesforum keçirilsin. İqtisadiyyat Nazirliyi sahibkarları sərmayə qoyuluşuna cəlb etmək üçün proqram hazırlamalıdır. İşğaldan azad edilən rayonlara sərmayə yatıran sahibkarlara güzəştlər edilməlidir. Bu güzəştlərin parametrləri üzərində işləmək lazımdır”.
Bir sözlə, ekspert hesab edir ki, səyləri artırmaq vacibdir.
Vidadi ORDAHALLI
