Maliyyə Nazirliyi tərəfindən Biləsuvar, Cəlilabad və Şəmkir rayon İcra hakimiyyətlərində və tabeli qurumlarında nəzarət tədbirləri aparılıb.
Maliyyə Nazirliyindən verilən məlumata görə, Biləsuvar, Cəlilabad və Şəmkir rayon icra hakimiyyətlərində və tabeli qurumlarında aparılan nəzarət tədbirləri nəticəsində inzibati binalarda, həmin rayon ərazilərindəki avtomobil yollarında təmir-tikinti işlərinin həcmlərinin sənədləşmələrdə artırılması, büdcə təşkilatları tərəfindən vəsaitin köçürülməsinə baxmayaraq, material qiymətlilərinin alınmaması, binaların qızdırılması üçün dizel yanacağının alınmasına ayrılmış vəsaitin mənimsənilməsi halları müəyyən olunub.
Həmçinin, adıçəkilən icra hakimiyyətləri başçılarının aparatlarına maddi təminatı zəif olan sakinlərə yardımların verilməsi məqsədilə ayrılmış vəsaitlərin, habelə müvəqqəti işə qəbul edilən işçilərə müvafiq iş və ya xidmətləri yerinə yetirmədikləri halda adlarına hesablanaraq ödənilmiş vəsaitlərin aidiyyəti rayon icra hakimiyyətinin məsul şəxsləri tərəfindən geri alındığı və bu kimi digər hallara yol verildiyi, bununla da büdcə vəsaitinin təyinatından yayındırıldığı aşkar edilib.
Üç rayonda baş verən bu neqativliklərlə bağlı hansı formada hüquqi ölçü götürülməlidir?
Hüquqşunas Mehman Muradlı “Bakı-Xəbər”ə açıqlamasında bildirdi ki, Maliyyə Nazirliyinin üç rayonla bağlı təqdim etdiyi hesabatda ciddi qanun pozuntularının olduğunu görürük:
“Həmin qanun pozuntuları mənəvi deyil, hüquqi aspektlidir. Bu səbəbdən də onlara mütləq mənada hüquqi qiymət verilməlidir. Yayılan hesabatdan görünür ki, ortada vəzifədən sui-stifadə, dövlət əmlakını talama, saxtakarlıq və başqa cinayət əməlləri var. Maliyyə Nazirliyi bunları açıqlayırsa, onda əldə olunan ilkin araşdırma materiallarının hüquq-mühafizə orqanına təqdim ediləcəyi də gözlənilir. Aidiyyəti üzrə Korrupsiyaya Qarşı Mübarizə İdarəsinə təqdim edilməlidir. Bu yalnız bir bəyanatla yekunlaşan məsələ deyil. Məsələyə mütləq hüquqi qiymət verilməlidir. Görünən budur ki, bu İcra hakimiyyətləri hələ də əvvəlki baş verənlərdən nəticə çıxarmayıblar. Adı çəkilən üç rayonun hər birinin sabiq başçıları elə vəzifə başında yaxalanıblar. Hazırda hər üçü həbsdədir. Dəhşətli mənzərədir. Onlar tutulub, yerdə qalanlar yenə də korrupsiya ilə məşğuldur. Belələri ilə bağlı hüququn imkan verdiyi bütün səviyyələrdə mübarizə aparılmalıdır. Ümumiyyətlə, praktika göstərir ki, icra hakimiyyətləri ilə bağlı ciddi struktur islahatları aparılmalıdır”.
Məhəmmədəli QƏRİBLİ
