“Azərbaycanda və xüsusilə Bakıda açılan yeni böyük müəssisələrdə və xidmət sektorundakı müəssisələrdə menecerlər, top menecerlər xaricilərdir”. Bu fikirləri Prezident İlham Əliyev gənclərlə görüşdə xaricdə təhsil proqramı ilə bağlı sualı cavablandırarkən bildirib.
Ölkə başçısının başçısının sözlərinə görə, hazırda Azərbaycan iqtisadiyyatı dünya iqtisadiyyatının bir parçasıdır, əmək resurslarımız da həmçinin: “İndi bir çox azərbaycanlılar var ki, xaricdə işləyirlər, yaşayırlar. Mən bunu ancaq alqışlayıram. Nə qədər çox olsa, necə deyərlər, bizim adımızı onlar ucaldırlar. Amma, eyni zamanda, Azərbaycanda və xüsusilə Bakıda açılan yeni böyük müəssisələrdə və xidmət sektorundakı müəssisələrdə menecerlər, top menecerlər xaricilərdir. Bu, belədir. Mən demirəm ki, bu yaxşıdır, ya pisdir. Yenə deyirəm, Azərbaycan çox qonaqpərvər ölkədir, hər kəs üçün burada yer var və bunu alqışlayıram, onlar gəlirlər təcrübəni bölüşürlər. Amma, eyni zamanda, nə üçün xaricilərdir, çünki yerli kadrlar hələ ki, tam uyğun deyillər. Ona görə xaricdə aparıcı ali məktəblərdə təhsil alanlar gəlib burada həmin bu vakansiyalarda işləsinlər və Vətənə burada xeyir gətirsinlər”.
Görünən odur ki, 30 ildir müstəqil olsaq da, hələ də bir sıra sahələrdə xarici mütəxəssislər üstün çəkiyə malikdir. Hansı ki, həmin sahələrdə milli kadrların olmasına çox ehtiyac var.
“Bəzi müəssisə rəhbərləri qohumbazlıq prinsipindən çıxış edərək işçi götürür”
Ekspert Rəsul Cahangirli hesab edir ki, belə vəziyyətin yaranmasının kökündə bir sıra amillər dayanır: “Bunun başlıca səbəbi onunla əlaqədardır ki, Azərbaycanda fəaliyyət göstərən ali məktəblər dünyadakı universitetlərdən geri qalır. Görürsən ki, dünyanın qabaqcıl aparıcı ali məktəbləri siyahısında bizim universitetlərin adı yoxdur. Ancaq Gürcüstanın, bəyənmədiyimiz Ermənistanın bəzi ali məktəblərinin adı həmin siyahıdadır. Problem ondadır ki, bizim ali məktəblər böyük müəssisələri idarə edə biləcək keeyfiyyətli mütəxəssis hazırlaya bilmir. Niyə? Çünki tədrisin səviyyəsi aşağıdır, praktiki olaraq yüksək tələblərə cavab vermir. Adicə dünyada nəşr olunan elmi jurnallar Azərbaycan Milli Elmlər Akademiyasına gəlmir. Hansı ki, bu jurnalları əldə edib tərcümə etmək lazımdır. Baxırsan ki, əksər ali məktəblərin iqtisadiyyat üzrə adı təmtəraqlı səslənən fakültələri var, amma orada hazırlanan milli kadrların səviyyəsi aşağıdır. Digər problem odur ki, xaricdə təhsil alan yüksək ixtisaslı azərbaycanlı tələbələr ali məktəbi bitirəndən sonra geri dönmür. Yüksək məvacib və daha çox qazanc əldə etdikləri üçün xaricdə işləməyə üstünlük verirlər. Çünki onların bəziləri geri qayıdandan sonra burda iş tapa bilmir. Bəzi müəssisə rəhbərləri qohumbazlıq prinsipindən çıxış edərək işçi götürür. Bu və digər problemlər olduğu üçün böyük müəssisələrdə menicerlər əsasən xarici vətəndaşlardır”.
Ekspert hesab edir ki, bu kimi problemlər həll edilməlidir.
Vidadi ORDAHALLI
