Əlavə dəyər vergisi (ƏDV) əlavə yaranan dəyərə görə hesablanan istehlak vergisi növüdür. Əlavə dəyər adətən ticarətdə malların alışı ilə satışı, istehsalatda malların maya dəyəri ilə satış dəyəri arasında yaranır.
Ancaq onlayn şəkildə kreditlə alınan məhsullarda ƏDV qaytarılmır. Qeyd edək ki, məlum məsələ ilə bağlı son vaxtlar çoxlu sayda şikayətlər səslənir. Bildirilir ki, elekton mağazalardan alınan hər hansı bir avadanlıq üçün ƏDV verilmir. Istehlakçılar məhsulun məbləğini hər ay hissə-hissə ödəniş terminalları vasitəsilə şirkətin kassasına ödəsələr də, ödəniş terminalları fiscal kodlu qəbz vermir.
Maraqlıdır, onlayn ödənişlər zamanı vətəndaşlara ƏDV geri qaytarıla bilərmi?
Dövlət Vergi Xidməti: “Ödəniş terminalları vasitəsilə həyata keçirilən ödəmələr zamanı vətəndaşlar yalnız ödəniş qəbzini əldə edirlər”
Məsələ ilə bağlı Dövlət Vergi Xidmətindən bildirildi ki, ödəniş terminalları vasitəsilə həyata keçirilən ödəmələr zamanı vətəndaşlar yalnız ödəniş qəbzini əldə edirlər. Həmin qəbzlər fiskal çek olmadığına görə, bu zaman ƏDV-nin geri qaytarılması da mümkün olmur. Müvafiq qaydalara əsasən, vətəndaşın ƏDV-ni geri qaytarması üçün fiskal çek əldə edilməlidir. Vergi Məcəlləsinə əsasən, fiskal çeklərlə bağlı konkret tələblər mövcuddur. Xidmətdən o da əlavə olunub ki, bununla bağlı vətəndaşın müraciəti istənilən halda araşdırılacaq. Huquq pozuntusu qeydə alınarsa, aradan qaldırılacaq.
Kamran Məmmədli: “Elektron mağazalardan onlayn və ya əyani kredit şəklində alınan məhsula ƏDV verilmir”
Iqtisadçı Kamran Məmmədli qeyd etdi ki, elektron mağazalardan onlayn və ya əyani kredit şəklində alınan məhsula ƏDV verilmir. Yalnız nəğd şəkildə ödəniş edilən zaman ƏDV çeki verilir: “Malların kreditlə satılmasına yanaşma belədir ki, vergi ödəyicisi mülkiyyətində və ya istifadəsində olan malları əsasən əhaliyə satır, amma ödəniş tam olaraq həmin anda yox, qısamüddətli və ya uzunmüddətli ödəniş şərtləri ilə həyata keçirilir. Bəzi hallarda malların kreditə satılması ilə məşğul olan ƏDV ödəyicilərində hesabatlılıqla bağlı müəyyən problemlər yaranır”.
Günel CƏLİLOVA
