Məlumatlara görə, məcburi köçkünlərə verilən yanvar ayı üzrə aylıq sosial müavinətdən 3 manata yaxın vəsait tutulub. Məcburi köçkünlər onlar üçün nəzərdə tutulan müavinətdən vəsait tutulmasından narazılıq edirlər.
Məcburi köçkünlərin dediyinə görə, “Kapital Bank” ötən ildə onlara verilən müavinətdən xidmət haqqı tutub.
Məcburi köçkünlər onu da qeyd edirlər ki, birinci tutulmada müavinətin bank xidmətləri üçün çıxıldığı əsas gətirildi. Ancaq bu xidmət ildə bir dəfə olur.
Kəlbəcər rayonunda olan Natavan Əliyeva qeyd etdi ki, mütamadi olaraq “Kapital Bank” onlar üçün verilən müavinətdən xidmət haqqı adı ilə vəsait tutur: “Adını xidmət haqqı qoyublar. Xidmət haqqı ildə bir dəfə olar, daha 3 dəfə yox! Dəfələrlə banka müraciət etmişik. Yanvar ayının 28-də kartımıza pul köçürülüb. 2022-ci ilin ilk ayında Bank növbəti dəfə sosial ödənişdən 3 manat çıxıb”
Qeyd edək ki, sosial müavinətlərdən bankların xidmət haqqı cəlb etməsi qanunvericilikdə nəzərdə tutulmayıb. Təxminən 600 minə qədər məcburi köçkünün plastik kartla “çörək pulu” aldığını nəzərə alsaq, bu, təqribən 3 milyon manata yaxın vəsait edir. Nəzərə alsaq ki, sözügedən tutulma bir ildə üç dəfə baş verib, bu, il ərzində təxminən 9 milyon manata yaxın vəsait edir.
Kapital Bank - Pərviz Sədrəddinov: “Məcburi köçkünlərin müavinat kartlarından tutulan 3 AZN vəsait 2022-ci il üzrə olan xidmət haqqı ilə bağlıdır”
Kapital Bankın İctimaiyyətlə əlaqələr şöbəsinin rəisi Pərviz Sədrəddinov isə qeyd edib ki, məcburi köçkünlərin müavinat kartlarından tutulan 3 AZN vəsait 2022-ci il üzrə olan xidmət haqqı ilə bağlıdır: “Qeyd edim ki, bu vəsait ildə bir dəfə kart sahiblərindən tutulur”.
Kamran Məmmədli: “Məcburi köçkünlərin müavinətindən müəyyən məbləğdə pulun tutulması düzgün deyil”
İqtisadçı Kamran Məmmədli qeyd etdi ki, müqavilələrdən asılı olaraq bankların hansısa formada xidmət haqqı tutmaq səlahiyyəti var: “Ancaq bu tipli sosial müavinətlərdən bankların xidmət haqqı cəlb etməsi qanunvericilikdə nəzər. də tutulmayıb. Xidmət haqqı ildə bir dəfə tutulur. Bildiyim qədərilə qanunda bununla bağlı xüsusi bir qeyd var. Sosial müavinətlərdə bank xidmət haqqı tuta bilməz”.
Ekspert onu da əlavə etdi ki, məcburi köçkünlər əvvəl məskunlaşdıqları ərazilərə geri döndükdə onlara verilən müavinətdən 3 il müddətinə yararlana bilərlər: “Hazırda məcburi köçkünlər və onlara bərabər tutulan şəxslər üçün yemək xərci müavinətinin və kommunal xidmətlər üzrə güzəştlərin əvəzinə vahid aylıq müavinət verilir. Məlumat üçün bildirim ki, bu gün məcburi köçkünlərin 81 min 476 nəfəri 33, 415 min 81 nəfəri isə ayda 60 manat olmaqla vahid aylıq müavinət alır. Məcburi köçkünlərin müavinətindən müəyyən məbləğdə pulun tutulması düzgün deyil. Xidmət haqqı ildə bir dəfə tutulur. Müqavilələrdən asılı olaraq bankların hansısa formada xidmət haqqı tutmaq səlahiyyəti var. Amma bu tipli sosial müavinətlərdən bankların xidmət haqqı cəlb etməsi düzgün deyil”.
Günel CƏLİLOVA
