Azərbaycanda şirkətlər tərəfindən fermerlərdən pambığın alış qiyməti 50 manat artırılıb. Bunu kənd təsərrüfatı naziri İnam Kərimov deyib.
O qeyd edib ki, fermerlərdən pambıq alan şirkətlər alış qiymətini 50 manat artırmaq qərarına gəliblər: “Pambığın alış qiyməti 700 manat idi. Şirkətlər 2022-ci il mövsümü üçün qərara gəlib ki, pambığın alış qiymətini 50 manat artırsınlar. Hazırda şirkətlərin qərarı pambıq alışının 750 manat olması ilə bağlıdır, amma biz qərara gəlmişik ki, avqust ayında qiymətlərə bir də baxaq. Ümid edirik ki, avqust ayında şirkətlər fermerləri bir daha sevindirəcək, ancaq bu məsələ birjalarda olan vəziyyətdən asılı olacaq”.
Fermerlər pambığın alış qiymətinin 50 manat artırılmasından narazıdırlar. Fermerlər qeyd edir ki, pambıqçılıq kənd təsərrüfatının ən ağır sahəsidir: “Bitkiçilikdə ən çox xərc aparan məhz pambıqçılıqdır. Məlumdur ki, ötən il dizel yanacağının qiymətinin qalxması bizim işimizi daha da çətinləşdirdi. Belə ki, əvvəllər bir hektar pambıq yerinin şumlanmasına 33 manat verirdiksə, indi qiymət qalxıb, 40 manat olub. Torpağa mala çəkilməsi keçən il 14 manat olduğu halda, bu il 23 manat , toxum səpini 12 manat idisə, bu il 18 manat olub. Hələ maşınla pambığın yığımının nə qədər xərc aparacağı məlum deyil. Ümumiyyətlə, bir hektar pambığın becərilməsi üçün çəkilən xərc keçən il üçün 1200 AZN idi, bu il isə 1800 manatı ötür. Artırılan 50 manat hansı problemimizi düzəldə bilər?”
Ekspertlər də hesab edir ki, pambığın alış qiyməti artsa da, mənfəətlilik azalacaq.
“Pambığın alış qiymətinin 50 manat artırılması müsbətdir, əkin sahələri arta bilər, lakin məhsuldarlıq səviyyəsinə elə də…”
Iqtisadçı ekspert Kamran Məmmədli qeyd etdi ki, nəzərdə tutulan qiymət artımı pambıq əkinlərinin mənfəətinə mənfi təsir göstərəcək: “Yeni qiymət hər ton xam pambıq üçün 750 manat müəyyən edilib. Başqa xərclərdəki artımları isə demirəm. Bu xərclərə işçi qüvvəsi, texnika ilə becərmə və s. daxildir. Son bir ildə gübrələrin qiymətində baş verən az qala 50 faizlik artım müqabilində, hər halda, 7 faiz çox yüksək artım deyil. Son 2 ildə dünya bazarında da pambığın qiymətləri davamlı olaraq artıb. Hazırda hər ton pambığın ixrac qimyəti 2600 dollardan yüksəkdir. Bu qiymət 2020-ci ilin mart ayına nisbətən 35 faiz yüksəkdir”.
Ekspert onu da əlavə etdi ki, fermerlərin içərisində bəziləri pambıq əkininə görə razılıq edirlər və sərfəlidir deyirlər. Bəzilərinə görə isə pambıq əkini sərfəli deyil. Yəni fermerlərin pambığa münasibəti birmənalı deyil, razı olan da var, narazı olan da. Onun fikrincə, hansı fermerin əkini, məhsuldarlığı yaxşıdırsa, onlar bu işdən razıdırlar. Məqsəd məhsuldarlığın əldə edilməsidir. Pambığın alış qiymətinin 50 manat artırılması müsbətdir, əkin sahələri arta bilər, lakin məhsuldarlıq səviyyəsinə elə də ciddi təsiri olmaz.
Günel CƏLİLOVA
