Rusiyanın Azərbaycandakı səfiri Mixail Boçarnikov jurnalistlər üçün keçirdiyi mətbuat konfransında bildirdi ki, Rusiyanın 14 şirkəti Qarabağda yenidənqurma işlərində iştirak etmək üçün müraciət edib. Diplomat qeyd edib ki, bu sahələrə kənd təsərrüfatı, tikinti materialları istehsalı, dəmir yolu xəttinin, enerji obyektlərinin tikilməsi daxildir. Lakin bu şirkətlərdən neçəsinin müraciətinin qəbul olunacağı hələlik məlum deyil.
Səfir həmçinin deyib ki, bu il Hökumətlərarası Komissiyanın 20-ci yubiley iclası keçiriləcək: “Bununla bağlı Tədbirlər Planı artıq hazırdır. Biz bu məsələ ilə yaxından məşğul oluruq. Ən yüksək səviyyədə görüşlərin keçirilməsi planlaşdırılır. Həmçinin bir sıra mühüm sazişlərin imzalanması nəzərdə tutulur”.
Belə aydın olur ki, Türkiyədən sonra işğaldan azad olunan ərazilərin bərpasında ikinci ən çox şirkətlə təmsil olunacaq ölkə Rusiya olacaq. Çünki ən son məlumata görə, Türkiyənin 20-dən çox şirkəti orada fəaliyyət göstərir. Bir sıra türk şirkətləri yol infrastrukturunun, hava limanlarının tikintisində fəal iştirak edirlər. Eyni zamanda, oradakı mineral resursların hasil edilməsi ilə bağlı türk şirkətləri ilə kontraktlar imzalanıb. Rusiya kimi böyük dövlətin də azad olunan ərazilərin bərpasına maraq göstərməsi ora daha çox xarici sərmayənin yönəlməsi, sağlam rəqabətin güclənməsi, bərpa işlərinin daha tez həyata keçieilməsi baxımından nə kimi əhəmiyyət kəsb edir?
“Rusiyanın sənaye və kənd təsərrüfatı ilə məşğul olan böyük, təcrübəli şirkətləri var”
Məsələyə münasibət bildirən ekspert Rəsul Cahangirlinin fikrincə, nə qədər çoxsaylı xarici şirkət bərpa prosesinə qoşulsa, bu bir o qədər bizim xeyrimizə olacaq: “Məsələ ondadır ki, daha çox xarici şirkət, daha sərfəli seçim imkanı deməkdir. Hansı şirkət daha münasib şərtlərlə çıxış edəcəksə ona üstünlük verəcək. Rəqabət artacaq və bu, özlüyündə yeni imkanlar açacaq. Düzdür, Azərbaycan dövləti öz imkanları hesabına bərpa işlərini aparır. Ötən il bu məqsədlə büdcədən 2 milyard, bu il isə 2,2 milyard manat vəsait ayrılıb. Ancaq təkcə dövlətimizin ümidinə qalsa, bərpa prosesi vaxt çox aparacaq. Ona görə də mütləq xarici şirkətlərin bu işə cəlb olunmasına geniş şərait yaratmaq, onları həvəsləndirmək üçün vergi güzəştləri etmək lazımdır. Region ölkələrindən Rusiyadan sonra İran da maraq göstərir. Rusiyanın sənaye və kənd təsərrüfatı ilə məşğul olan böyük, təcrübəli şirkətləri var. Hər halda maksimum bütün vasitələrdən istifadə edilməlidir ki, proseslər sürətlənsin. Zatən qardaş Türkiyə bu prosesin içindədir. Digər ölkələri də bu işə cəlb etmək lazımdır. Çünki həmin ərazilərdə dağıntıların miqyası çox böyükdür”.
Bu baxımdan ekspert hesab edir ki, davamlı olaraq bu məsələlər diqqət mərkəzində saxlanılmalıdır.
Vidadi ORDAHALLI
