MDB Statistika Komitəsinin yaydığı məlumatdan belə məlum olur ki, ötən il yəni, 2021-ci ildə iqtisadiyyatda işləyənlərin orta aylıq əmək haqqı ən az Azərbaycanda artıb.
Qurumun yaydığı məlumata görə, ötən il iqtisadiyyatda işləyənlərin orta aylıq əmək haqqı Azərbaycanda 2,9 faiz, Ermənistanda 7 faiz, Rusiyada 9,2 faiz, Qırığızıstanda 9,4 faiz, Moldovada 11,3 faiz, Tacikistanda 11,6 faiz, Belarusda 14,4 faiz, Özbəkistanda 15,3 faiz, Qazaxıstanda 16,7 faiz, Ukraynada 20,4 faiz artıb. Qiymətlərin artım tempinə görə də Azərbaycan ön sıralardadır.
O da məlumdur ki, bir sıra MDB ölkələri ilə müqayisədə Azərbaycanın iqtisadi imkanları daha böyükdür. Həm ölkəmizin resursları daha çoxdur, həm də Azərbaycanda bir sıra sosial xarakterli proqramlar, layihələr həyata keçirilir. Belə olan halda sadalanan rəqəmlər nə dərəcədə reallığı əks etdirir? Azərbaycan sözügedən göstəricilərə görə bir sıra MDB ölkələrindən niyə geri qalsın ki?
Sözügedən məsələyə aydınlıq gətirən millət vəkili Aydın Hüseynovun fikrincə, həmin hesablama subyektiv olduğu üçün reallığı əks etdirmir: “Pandemiya bütün dünya iqtisadiyyatına bu və ya digər dərəcədə öz təsirini göstərib. Ancaq konkret statistika ondan ibarətdir ki, Azərbaycan iqtisadiyyatı ötən il 3,2 faiz artıb. Bununla yanaşı, ümumi daxili məhsul istehsalı daha çox artıb. Aydın məsələdir ki, artım varsa, bu, əhalinin pul gəlirlərinə öz müsbət təsirini göstərəcək. İl ərzində çosaylı sosial paketlər həyata keçirilib. Bütün bunlardan sonra necə ola bilər ki, iqtisadiyyatda işləyənlərin orta aylıq əmək haqqı MDB üzrə ən az Azərbaycanda artsın? Bu, mümkün olan iş deyil. O baxımdan hesab edkirəm ki, məlum dəyərləndirmə reallığı əks etdirmir. Azərbaycan bu sahədə Ermənistandan, Tacikistandan və digərlərindən neçə geri qala bilər? Ermənistanın xarici borcu 70 faizi ötübsə, büdcə gəlirləri kəskin aşağı düşübsə, milli valyutası dəyərdən düşübsə, o zaman bu ölkənin orta aylıq əmək haqqına görə Azərbaycanı üstələməsi mümkün deyil. Baxmayaraq ki, Ermənistanın əhalisi Azərbaycandan 3 dəfə aşağıdır. O baxımdan hesab edirəm ki, bunların hamısı subyektiv hesablamalardır və reallığı əks etdirmir. Reallıq isə tamam fərqlidir. Azərbaycanda həm gəlirlər artıb, həm də sosial paket çərçivəsində görülən işlərin miqyası genişlənib”.
Bütün bunlardan çıxış edən millət vəkili hesab edir ki, deyilənlərin reallıqla əlaqəsi yoxdur.
Vidadi ORDAHALLI
