Məlum olduğu kimi, Azərbaycan manatı və Birləşmiş Ərəb Əmirlikləri dirhəmi Türkiyə Mərkəzi Bankı tərəfindən “Ticarətə aid xarici valyutalar” siyahısında yer alıb. Türkiyə Mərkəzi Bankının “Ticarətə aid xarici valyutalar” siyahısına Azərbaycan manatı və Birləşmiş Ərəb Əmirlikləri dirhəmi daxil edilib.
Məlumdur ki, Türkiyə həm ticarətdə, həm də investisiya yatırımlarında Azərbaycanın ən mühüm tərəfdaşlarından biridir. Hazırda Türkiyə Azərbaycanda daha çox qeyri-neft sektoruna, Azərbaycan isə Türkiyədə, əsasən, energetika və kimya sahələrinə kapital axını yaradır. Türkiyədən Azərbaycana investisiya qoyuluşları 12 milyard dollar, Azərbaycandan Türkiyəyə sərmayə yatırımları isə 19,5 milyard dollar təşkil edir. Hazırda Türkiyədə 2000-ə yaxın Azərbaycan, ölkəmizdə isə 4100-dən artıq Türkiyə şirkəti fəaliyyət göstərir. Türkiyədəki həm şirkət sayı, həm də investisiya həcminə görə Azərbaycan Mərkəzi Asiya və Qafqaz ölkələri arasında ilk yerdədir.
Dövlət Gömrük Komitəsinin məlumatına görə, bu ilin yanvar-sentyabr aylarında Azərbaycanın Türkiyə ilə apardığı ticarət mübadiləsinin həcmi 3,248 mlrd. ABŞ dollar təşkil edib. Bu da 2020-ci ilin analoji dövrü ilə müqayisədə 0,3% çoxdur. Azərbaycandan Türkiyəyə ixracın həcmi 1,938 mlrd. dollar, idxal isə 1,310 mlrd. dollar təşkil edib. Ötən ilin eyni dövrü ilə müqayisədə ixrac 8,1% azalıb, idxal isə 15,9% artıb. 2020-ci ildə Azərbaycanın Türkiyə ilə apardığı ticarət mübadiləsinin həcmi 4,161 mlrd. ABŞ dolları təşkil edib, bu da 2019-cu illə müqayisədə 7,7% azdır.
Qeyd etdiyimiz kimi, Azərbaycan manatı və Birləşmiş Ərəb Əmirlikləri dirhəmi Türkiyə Mərkəzi Bankı tərəfindən “Ticarətə aid xarici valyutalar” siyahısında yer alıb. Ekspertlər hesab edir ki, Türkiyənin bu qərarı manatın beynəlxalq dəyərini artıracaq.
İlham Şaban: “Türkiyə Mərkəzi Bankının qərarı o deməkdir ki, Azərbaycanla ticarətdə yerli valyutadan istifadə ediləcək”
Neft Araşdırmaları Mərkəzinin rəhbəri İlham Şaban bildirdi ki, Türkiyə Mərkəzi Bankının qərarı o deməkdir ki, Azərbaycanla ticarətdə yerli valyutadan istifadə ediləcək.
Ekspertin sözlərinə görə, Türkiyə ilə enerji daşıyıcılarının ticarəti birbaşa olaraq Azərbaycan Respublikası ilə həyata keçirilmir: “Ticarət xarici konsorsiumlarla aparılır, onların valyutası da Amerika dollarıdır”.
Natiq Cəfərli: “Məlum qərar Azərbaycan manatının beynəlxalq pulköçürmələrdə daha çox istifadə olunmasına səbəb olacaq”
Iqtisadçı ekspert Natiq Cəfərli qeyd etdi ki, Türkiyə hökumətinin belə bir qərar verməsi Azərbaycan manatının beynəlxalq pulköçürmələrdə daha çox istifadə olunmasına gətirib çıxara bilər: “Məlumdur ki, Azərbaycan hökuməti ilə Türkiyə hökuməti arasında bu ilin aprel ayında 15 anlaşma imzalanıb. Həmin anlaşmalardan biri də ondan ibarət idi ki, Türkiyə və Azərbaycan şirkətlərinin bir-biri ilə ticarətində yerli valyutalardan - həm manat, həm də türk lirəsi istifadə edilsin. Ona görə də Azərbaycanda türk lirəsi banklar tərəfindən qəbul olunurdu. Mərkəzi Bank və bankların hesab açılma və pulköçürmə imkanları da vardı. Əvəzində Azərbaycan manatının da Türkiyədə eyni qaydada tətbiq olunması ilə bağlı qərarın olması gözlənilirdi. Yəni gözlənilməz bir şey deyildi, qərar bundan öncə bağlanmış müqavilələr çərçivəsində baş verdi”.
Günel CƏLİLOVA
