Prezident İlham Əliyev İqtisadiyyat Nazirliyinin tabeliyindəki İqtisadi Zonaların İnkişafı Agentliyinin fəaliyyətinin təmin edilməsi haqqında fərman imzalayıb. Fərmana əsasən, Agentliyin nizamnamə fondu 60,500 milyon manat təşkil edir.
Pərviz Heydərov: “Agentliyin nizamnamə fondunun 60,500 milyon manat müəyyən edilməsi qarşıya qoyulan missiyanın yerinə yetirilməsinə kifayətedici vəsaitdir”
Yeni yaradılan agentliyin əhəmiyyəti haqqında danışan iqtisadçı ekspert Pərviz Heydərov “Bakı-Xəbər”ə açıqlamasında bunları dedi: “İqtisadi Zonaların İnkişafı Agentliyi bu il yanvarın 22-də Prezidentin sənaye parklarının, sənaye məhəllələrinin və aqroparkların idarə edilməsinin təkmilləşdirilməsi ilə bağlı tədbirlər haqqında imzaladığı Fərmanla yaradıldı. Fərmana əsasən, İqtisadiyyat Nazirliyinin tabeliyindəki “Sumqayıt Kimya Sənaye Parkı” Məhdud Məsuliyyətli Cəmiyyətinin əsasında yaradılan bu publik hüquqi şəxs statuslu qurumun təşkilində məqsəd ölkədə aparılan iqtisadi islahatları davam etdirmək, mövcud sənaye parkları, sənaye məhəllələri və aqroparklar sahəsində idarəetməni, habelə nəzarət mexanizmlərini daha da təkmilləşdirmək, habelə bu sahədə həyata keçirilən tədbirlərin səmərəliliyini artırmaq, daha sıx koordinasiya və sistemlilik təmin etmək olub. Fərmanla Nazirlər Kabinetinə tapşırıldı ki, Agentliyin nizamnaməsinin layihəsini, habelə nizamnamə fondunun miqdarı barədə təkliflərini hazırlayıb Prezidentə təqdim etsin.
Agentliyin nizamnamə fondunun 60,500 milyon manat müəyyən edilməsi qarşıya qoyulan missiyanın yerinə yetirilməsinə kifayətedici vəsaitdir”.
Həmsöhbətimizin sözlərinə görə, İqtisadi Zonaların İnkişafı Agentliyinin publik hüquqi şəxs kimi yaradılmasının əsas məqsədi sənaye parklarının (Balaxanı Sənaye Parkı istisna olmaqla), sənaye məhəllələrinin (Naxçıvan Muxtar Respublikasında yaradılan sənaye məhəllələri istisna olmaqla) və aqroparkların fəaliyyətinin təşkili, onların idarə olunması və inkişafı ilə bağlı tədbirlər hazırlamaq, həyata keçirilməsini təmin etmək, o cümlədən bu istiqamətdə göstərilən dövlət dəstəyi tədbirlərini keçirməkdir.
Aydın Hüseynov: “Agentlik rəqabətqabiliyyətli məhsul ixracına, sərmayələrin və məşğulluğun artmasına töhfə verəcək”
Millət vəkili Aydın Hüseynov “Bakı-Xəbər”ə açıqlamasında bildirdi ki, Prezident İlham Əliyevin müəyyən etdiyi sənayeləşmə siyasətinə uyğun olaraq ölkəmizdə müasir sənaye müəssisələrinin yaradılmasının dəstəklənməsi, sənaye parklarının və məhəllələrinin yaradılması işləri genişlənib. Hazırda Azərbaycanda 5 sənaye parkı - Sumqayıt Kimya, Balaxanı, Mingəçevir, Qaradağ və Pirallahı sənaye parkları fəaliyyət göstərir. İndiyədək sənaye parklarında 40-dan çox rezident qeydiyyata alınıb: “Bu proses regionlarda da genişlənməkdədir. Gəncədə və digər şəhərlərdə müasir tipli sənaye kompleksinin yaradılması işləri aparılır. Bütün bu tədbirlər Azərbaycanın sənaye ölkəsi kimi imicini formalaşdırıb və iqtisadiyyatda sənaye istehsalının əhəmiyyətli dərəcədə artmasına səbəb olub. İqtisadi Zonaların İnkişafı Agentliyinin yaradılması isə sənayeləşmə siyasətinin daha da genişlənməsinə səbəb olacaq”.
Millət vəkilinin sözlərinə görə, müasir iqtisadi idaretmə və yeni iqtisadi reallıqlar institusional islahatlarla bərabər, ölkəmizdə iqtisadi tərəqqinin tələbləri və innovativ iqtisadiyyat quruculuğunda yeni modellərin, ən qabaqcıl iqtisadi layihələrin tətbiqinə ehtiyac artır. Bu çağırışların ahənginə uyğun olaraq, azad iqtisadi zonaların yaradılması prosesi genişlənməkdədir. Bu baxımdan İqtisadi Zonaların İnkişafı Agentliyinin fəaliyyətinin təmin edilməsi həmin çağırışların tələbindən meydana çıxan reallıqdır. Agentlik, Balaxanı Sənaye Parkı istisna olmaqla, ölkəmizdəki sənaye parkları və sənaye məhəllələrinin və aqroparkların fəaliyyətinin təşkili, onların idarə olunması və inkişafı ilə bağlı tədbirlər hazırlayacaq, yeni inkişaf layihələrini həyata keçirəcək: “İqtisadi Zonaların İnkişafı Agentliyinin yaradılması dövlətin ən müasir iqtisadi modellər olan sənaye texnoparkları, aqroparklar, sənaye məhəllələri və digər bu tipli layihələrin həyata keçirilməsi, təşviqedici siyasətin yürüdülməsi, xarici investorlarınn AİZ-lərə cəlb olunması sahəsində vahid dövlət siyasətini koordinasiya edəcək, idaretmənin səmərəliliyini yüksəldəcək. Həyata keçirilən çevik və effektiv siyasət Azərbaycanda azad iqtisadi zonaların iqtisadi inkişafın əsas sütunlarından biri olmaqla milli rəqabətqabiliyyətli məhsul ixracını artıracaq, ölkəmizə investorların sərmayələrini artıracaq, məşğulluq imkanları güclənəcək, yeni iş yerləri açılacaq, milli iqtisadiyyatın dünya iqtisadiyyatı sisteminə inteqrasiyası sürətlənəcək.
Xatırladım ki, bir müddət əvvəl Cənab Prezidentin sərəncamı ilə Qaradağ rayonunun Ələt qəsəbəsində yeni Bakı Beynəlxalq Dəniz Ticarət Limanının ərazisi də daxil olmaqla azad ticarət zonası tipli xüsusi iqtisadi zonanın yaradılmasına başlanılıb. Bu layihə də qabaqcıl iqtisadi model kimi ölkə iqtisadiyyatının davamlı inkişafı və rəqabət qabiliyyətinin artırılması, Azərbaycanın logistika və nəqliyyat mərkəzi kimi mövqeyinin gücləndirilməsi və ölkədə çoxşaxəli nəqliyyat infrastrukturunun fəaliyyətinin daha səmərəli təşklini nəzərdə tutur. Təcrübə göstərir ki, azad iqtisadi zonalar xarici ticarət strategiyasının vacib halqalarından birini təşkil edir və ölkə iqtisadiyyatına cəlb olunması ilə yanaşı, ixrac səbətinin həm çeşidini, həm də coğrafiyasını genişləndirməyə şərait yaradır. Bu da birbaşa və dolayısı ilə valyuta daxilolmalarının artmasına, müasir texnologiyalara çıxış imkanına pozitiv təsir göstərir ki, son nəticədə milli iqtisadiyyat dayanıqlı inkişaf edir və dünya bazarına daha səmərəli inteqrasiya olunur. Belə iqtisadi zonaların yaradılması ayrı-ayrı ərazi və regionların iqtisadiyyatının inkişafı baxımından təsirli mexanizmdir. Bu modellər ölkədə iqtisadi modernizasiya siyasətinin parlaq nümunəsidir”.
Günel CƏLİLOVA
