Azərbaycanda insanların sosial müdafiəsinin gücləndirilməsi hər zaman prioritet məsələdir. Prezident İlham Əliyevin bu günlərdə imzaladığı yeni Fərman və Sərəncamlar fikirlərimizin əyani sübutu kimi dəyərləndirilə bilər. Belə ki, ölkə başçısının yeni imzaladığı sənədlərə əsasən bir sıra müavinət və təqaüdlər artırılıb. Bu artım 732 min şəxsi, o cümlədən, uşaqları da əhatə edir. Belə ki, ölkə başçısı uşaqların sosial müdafiəsinin gücləndirilməsi məqsədilə də Fərman imzalayıb.
Imzalanan fərmana əsasən, sağlamlıq imkanları məhdud uşaqlar və onlara qulluq edənlər, müddətli hərbi xidmətdə olanların uşaqları, uşaqların qəyyumları, beşdən çox uşağı olan qadınlar, bir yaşadək uşağı olan (ünvanlı sosial yardım alan) aztəminatlı ailələr, övladlığa uşaq götürənlər, həmçinin, uşağın doğulmasına görə verilən və dəfn üçün olan birdəfəlik müavinətlər də çoxaldılıb.
Yeni fərmanlara əsasən, əlilliyi olan şəxslər və sağlamlıq imkanları məhdud uşaqlar üçün müavinətlər 2022-ci ilin əvvəlindən I dərəcə üzrə - 150 manatdan 220 manata, II dərəcə üzrə - 130 manatdan 180 manata, III dərəcə üzrə - 110 manatdan 120 manata çatdırılacaq.
Sağlamlıq imkanları məhdud 18 yaşınadək uşaqlara müavinət də 150 manatdan 200 manata çatdırılıb. Onlara qulluğa görə 2019-cu ildə Prezidentin aylıq təqaüdü də təsis olunub ki, yeni Fərmanla həmin təqaüd də 60% artımla 50 manatdan 80 manata çatdırılıb.
Sağlamlıq imkanları məhdud uşaqlar üçün sosial ödəniş 2019-cu ilin əvvəlində cəmi 82 manat idisə, gələn ilin əvvəlindən həmin məbləğdən 3,4 dəfə çox olmaqla onlar üçün müavinət (200 manat) və təqaüd (80 manat) formasında aylıq 280 manat sosial ödəniş ediləcək.
Valideynlərini itirmiş və valideyn himayəsindən məhrum olmuş uşaqların qəyyumlarına (himayəçilərinə) müavinət 100 manatdan 120 manata çatdırılır. Bununla da həmin şəxslər üçün müavinətdə üç il əvvələ (61 manat) nisbətən təqribən 2 dəfə artım baş verir.
Beşdən çox uşağı olan qadınlara (hər uşağa görə) aylıq müavinət isə 55 manatdan 70 manata çatdırılır. Ümumilikdə son üç ildə bu müavinət 2,1 dəfə artırılaraq 33 manatdan 70 manata çatdırılıb.
Bir yaşınadək uşağı olan aztəminatlı (ünvanlı dövlət sosial yardımı təyin edilmiş) ailələrə hər uşağa görə müavinət isə yeni Fərmanla 55 manatdan 70 manata çatdırılıb. Bununla da həmin uşaqlar üçün müavinətdə üç il əvvələ (45 manat) nisbətən 55,6 faiz yüksəlmə baş verir.
Övladlığa götürülən uşağa, o cümlədən sağlamlıq imkanları məhdud uşağa görə müavinət 2021-ci ilin əvvəlindən təsis olunub və yeni Fərmanla bu müavinət də 25% artırılaraq hər uşağa görə 160 manatdan 200 manata, sağlamlıq imkanları məhdud hər uşağa görə isə 480 manatdan 600 manata çatdırılıb.
Uşağın anadan olmasına görə birdəfəlik müavinət 200 manatdan 300 manata çatdırılıb. Bu müavinət üç il əvvəlki məbləğlə (109 manat) müqayisədə 2,8 dəfə artırılıb.
Beləliklə, Prezident İlham Əliyevin müvafiq fərman və sərəncamları ilə daha 732 min şəxsin sosial müdafiəsi gücləndirilmiş oldu. Bu məqsədlə dövlət büdcəsindən əlavə 200 milyon manat ayrılması nəzərdə tutulur. Hazırkı fərman və sərəncamlarla bir çox kateqoriyadan olan şəxslərin təqaüdləri, müavinətləri artırılmış oldu. İlk növbədə əlilliyi olan şəxslərin, yaşa, ailə başçısını itirdiyinə görə, müddətli hərbi xidmətdə olanların övladlarına verilən müavinətlər artırıldı.
“Uşaqların qəyyumlarına, 5-dən artıq uşağı olan qadınlara verilən müavinətlərin də həcmi artırılır, həmçinin…”
Uşaqların sosial müdafiəsinin gücləndirilməsi məqsədilə görülən işlər haqqında danışan millət vəkili Musa Quliyev bildirdi ki, ölkədə həyata keçirilən islahatların, əhalinin sosial rifah halının yaxşılaşdırılması istiqamətində atılan addımların əsasında vətəndaş məmnunluğunun artırılması, dövlət-vətəndaş münasibətlərinin möhkəmləndirilməsi dayanır. Azərbaycan vətəndaşının sosial rifahı dövlətimiz üçün prioritet təşkil edir: “Bu məqsədlə dövlət büdcəsindən əlavə 200 milyon manat ayrılması nəzərdə tutulur. Hazırkı Fərman və Sərəncamlarla bir çox kateqoriyadan olan şəxslərin təqaüdləri, müavinətləri artırılmış oldu. İlk növbədə uşaqların sosial qayğısının artırılması nəzərdə tutulub. Belə ki, uşaqların qəyyumlarına, 5-dən artıq uşağı olan qadınlara verilən müavinətlərin də həcmi artırılır. Aztəminatlı ailələrin, bir yaşadək uşağa verilən müavinət, həmçinin övladlığa uşaq götürənlərə ödənilən aylıq ödəmələrin də həcmi artırılıb. Uşağın anadan olmasına görə verilən birdəfəlik müavinətin həcmi artacaq”.
Millət vəkilinin sözlərinə görə, bu addım Prezident İlham Əliyevin əhalinin sosial rifah halının qorunması ilə bağlı bu il oktyabrın 16-da qəbul edilmiş Sərəncamının icrasından yaranan məsələləri əhatə edir: “Bu mütərəqqi addımla bütövlükdə 732 min vətəndaşımızın həyat səviyyəsi daha da yaxşılaşmış olacaq”.
Günel CƏLİLOVA
