Son zamanlar Azərbaycanda xarici valyuta, xüsusilə də dollar alışı kəskin artıb. Dollara tələbat artdığı üçün banklar dolların satış prosesini dayandırıb. Məlumatlara görə, bu barədə banklara göstəriş Mərkəzi Bankdan gəlib.
Mərkəz Bank dollar satışı ilə bağlı portalı bağlayıb və satışın dayandırılması barədə banklara təlimat verib. Bu isə əhalinin narahatlığına səbəb olub.
Maraqlıdır, dollar satışının dayandırılması adıçəkilən valyutanın qıtlığı, ya devalvasiyaya hazırlıqla bağlıdır?
“Əslində dollara tələbatın artmasının kökündə heç də vətəndaşlarda olan vəsaitin toplanması dayanmır”
Iqtisadçı Kamran Məmmədli qeyd etdi ki, son günlər cəmiyyətdə devalvasiyanın baş verəcəyi ilə bağlı şayiələr yayılır: “Belə olan halda əlində vəsaiti olan vətəndaşlar dollara üstünlük verməklə, özlərini gözlənilən təhlükədən sığortalamaq istəyirlər. Əslində dollara tələbatın artmasının kökündə heç də vətəndaşlarda olan vəsaitin toplanması dayanmır. O da bəllidir ki, bir çox məhsulların qiymətində artım baş verib və bu, istənilən halda inflyasiyaya səbəb olur. Nəticədə dövriyyədə olan pul kütləsinin həcmində artım yaşanır. Eyni zamanda, cəmiyyətdə belə bir ajiotaj yaranır ki, növbəti dəfə məzənnə dəyişikliyi, devalvasiya baş verə bilər. Devalvasiya ehtimalı əhalinin dollara tələbatını artırır”.
Ekspert onu da əlavə etdi ki, hazırda makroiqtisadi göstəricilərin özü, eləcə də Azərbaycanın əsas ixracında rol oynayan neft və neft məhsulları, ümumiyyətlə karbohidrogen ehtiyatlarının hazırkı bazar qiymətləri hökümətə kifayət qədər fürsətlər yaradır ki, nəzərdə tutulmuş manatın məzənnə stabilliyini asanlıqla qoruyub saxlaya bilsin: “Buna görə də düşünürəm ki, manatın xarici valyutalar qarşısında birbaşa ucuzlaşması, hansısa bir devalvasiya forması yaxın müddət ərzində baş verməyəcək. Sadəcə olaraq, manatın dəyərdən düşməsi də bir müddətdir ki, baş verir və qarşıdakı aylarda da müəyyən nisbətdə qaçılmaz olacaq”.
Günel CƏLİLOVA
