Azərbaycan dövləti işğaldan azad edilmiş ərazilərlə bağlı bir sıra güzəştlər tətbiq edəcək. Bu barədə Prezident İlham Əliyevin “İşğaldan azad edilmiş ərazilərdə iqtisadi inkişafın sürətləndirilməsi ilə bağlı bəzi tədbirlər haqqında” sərəncamında bildirilir.
Sərəncamda qeyd olunan məsələlərdən biri də müasir bilik və bacarıqlara malik mütəxəssislərin işğaldan azad edilmiş ərazilərə cəlb edilməsi, habelə əmək miqrasiyası kvotasının müəyyən edilməsi və iş icazələrinin verilməsi prosedurunun təkmilləşdirilməsidir.
Maraqlıdır, müasir bilik və bacarıqlara malik mütəxəssislərin yüksək səviyyədə əmək haqqı olmadan işğaldan azad edilmiş ərazilərə cəlb etmək mümkün olacaqmı?
Xalid Kərimli: “Yüksək bacarığa, biliyə malik mütəxəssislərin işğaldan azad olunmuş ərazilərə cəlbi yüksək əmək haqqı və qonorar müqabilində ola bilər”
Iqtisadçı ekspert Xalid Kərimli bildirdi ki, yüksək bacarığa, biliyə malik mütəxəssislərin işğaldan azad olunmuş ərazilərə cəlbi yüksək əmək haqqı və qonorar müqabilində ola bilər: “Bu cür mütəxəssislər yeni ərazilərə gedərkən öyrəşdiyi həyat şəraitindən imtina etmiş olurlar. Bu səbəbdən də həmin mütəxəssislər hazırda çalışdıqları yerdə aldıqları əmək haqqından daha artıq istəyəcəklər”.
Pərviz Heydərov: “İşğaldan azad edilən ərazilərin bərpası və infrastrukturun qurulmasında iştirak edəcək şəxslərin bilik və bacarıqları mükəmməl olmalıdır”
Iqtisadçı ekspert Pərviz Heydərov bildirdi ki, işğaldan azad olunmuş ərazilərdə hazırda yenidənqurma və bərpa işləri həyata keçirilir, müasir infrastruktur yaradılır, yollar salınır: “Fizuli hava limanı 8 ayın içərisində hazırlanaraq istifadəyə verildi. Regionun mövcud iqtisadi potensialının realizəsinə başlanması üçün müasir infrstrukturun təmin olunması vacib və zəruri şərtlərdən biridir. Bu səbəbdən də ilk olaraq işğaldan azad olunan ərazilərdə müasir infrastrukturun yaradılmasına diqqət yetirilməsi heç də təsadufi xarakter daşımır. Nəzərə almaq lazımdır ki, bu işlər elə sürətlə həyata keçirilir, 2022-ci ilin birinci yarısına qədər işlərin böyük hissəsi başa çatacaq. 2023-cu ilin ortasına qədər işğaldan azad edilən ərazilərdə infrastruktur işləri tam şəkildə yekunlaşacaq. Bundan sonra isə regionda iqtisadi potensialdan yararlanmaq məsələsi qısa zamanda həyata keçiriləcək. Bölgədə müasir infrastruktur yüksək səviyyədə təşkil olunacağı üçün istehsal və emal sahələrinin yaradılması qaçılmaz xarekter daşıyacaq”.
Həmsöhbətimiz onu da əlavə etdi ki,işğaldan azad edilən ərazilərin bərpası və infrastrukturun qurulmasında iştirak edəcək şəxslərin bilik və bacarıqları mükəmməl olmalıdır. Həmin kadrların təmin olunması isə çətin olmayacaq: “Regionun iqtisadi potensialı canlandıqdan sonra əldə olunacaq müvafiq gəlirlər sözügedən bölgədə çalışacaq mütəxəssislərin yüksək əmək haqqı ilə çalışmasına şərait yaradacaq. Hər şey müvafiq iqtisadi fəaliyyət və əldə olunan gəlirdən asılıdır”.
Günel CƏLİLOVA
