Məlum olduğu kimi, Azərbaycan Prezidentinin təşəbbüsü ilə Vergilər Məcəlləsinə edilən dəyişikliklər Vətən müharibəsində şəhid olmuş şəxslərin ailə üzvləri, qazilər və müharibə iştirakçıları üçün yeni vergi güzəştləri müəyyən edib.
Layihəyə əsasən, Vətən müharibəsində şəhid olmuş şəxslərin ailə üzvlərinə və aparılan hərbi əməliyyatlar nəticəsində əlilliyi müəyyən edilmiş hərbi qulluqçulara və mülki şəxslərə verilən maddi yardımın 20 000 manatadək olan hissəsinin gəlir vergisindən azad olunması nəzərdə tutulur. Eyni zamanda, Vətən müharibəsi şəhidləri ilə bərabər, Vətən müharibəsi iştirakçılarının da banklara və digər kredit təşkilatlarına olan borclarının silinməsindən əldə olunan gəlir gəlir vergisindən azad edilib.
Mahir Abbaszadə: “İstər Birinci, istərsə də İkinci Qarabağ müharibəsi iştirakçıları, onların ailələrinin problemlərinə hər zaman diqqət və qayğı göstərilib”
Vətən müharibəsi iştirakçılarına da bu güzəştin aid edilməsinin əhəmiyyəti barəsində danışan Milli Məclisin İqtisadi siyasət, sənaye və sahibkarlıq komitəsinin üzvü Mahir Abbaszadə bildirdi ki, istər Birinci, istərsə də İkinci Qarabağ müharibəsi iştirakçıları, onların ailələrinin problemlərinə hər zaman diqqət və qayğı göstərilib: “Vergi Məcəlləsinə edilən yeni dəyişikliklər də bu kateqoriyadan olan həssas qrupun problemlərinin həllini istiqamətdə yürüdülən siyasətin tərkib hissəsidir. Vergi Məcəlləsinə dəyişiklikdə, Vətən müharibəsi şəhidləri ilə bərabər, Vətən müharibəsi iştirakçılarının da banklara və digər kredit təşkilatlarına olan borclarının silinməsindən əldə olunan gəlir gəlir vergisindən azad edilib. Dünyada maliyyə və iqtisadi böhranın davam etdiyi bir zamanda, həm də dövlətin əsas diqqətinin işğaldan azad edilən ərazilərə Böyük qayıdışı təmin etmək üçün genişmiqyaslı bərpa işlərinin, infrastruktur layihələrinin həyata keçirilməsinə yönəldiyi bir zamanda cənab Prezident və Birinci vitse-prezidentin şəhid ailələrimizin və qazilərimizin sosial rifahının yaxşılaşdırılması, onların problemlərini diqqətdə saxlamasını böyük diqqət və qayğının göstəricisi kimi dəyərləndirmək lazımdır”.
Natiq Cəfərli: “Vətən müharibəsi iştirakçılarının müxtəlif vergi güzəştləri ilə təmin edilməsi üçün hüquqi baza yaradılır”
İqtisadçı ekspert Natiq Cəfərli qeyd etdi ki, istənilən güzəştlər maddi vəziyyətin yaxşılaşdırılması üçün əsaslar yaradır: “Son qəbul edilmiş dəyişikliklərə əsasən, Vətən müharibəsi iştirakçılarının müxtəlif vergi güzəştləri ilə təmin edilməsi üçün hüquqi baza yaradılır. Bundan sonrakı mərhələdə bu hüquqi bazaya və vergi güzəştlərinin hesablama qaydalarına görə dəyişikliklər olacaq. Bu qanundan irəli gələn tapşırıqlara əsasən, bununla bağlı Nazirlər Kabinetinin müəyyən yeni qərarları olacaq. Çünki Nazirlər Kabinetinin addım atması üçün hüquqi baza yaradılmalı idi. Güman edilir ki, yanvar ayına qədər dəyişiklikdən irəli gələn müddəalar Nazirlər Kabinetinin qərarları ilə tənzimlənəcək. Və müəyyən güzəştlərin əldə olunması imkanları var. Bununla həm də banklara və digər kredit təşkilatlarına olan borclarının silinməsi ilə bağlı həmin bankların özlərinə də müəyyən güzəştlərin tətbiq olunması nəzərdə tutulur. Kreditlərin silinməsi və yaxud da faizlərin dayandırılması zamanı kommersiya müəssisələrinin müəyyən maddi itkiləri olacaq. Həmin itkiləri kompensasiya etmək üçün vergi güzəştləri olacaq. Onların dövlətə ödədiyi vergilərdə müəyyən güzəştlər nəzərdə tutulacaq ki, sildikləri vəsaiti vergi borcundan çıxa bilsinlər. Qanun bunu artıq tənzimləyir. Sadəcə, bunun yerinə yetirilməsi qaydası yeni ilə qədər təsdiqlənməli və elan edilməlidir”.
Tahir Mirkişili: “Müharibə iştirakçılarına dövlət tərəfindən hər zaman böyük diqqət və qayğı göstərilir”
Millət vəkili Tahir Mirkişili bildirdi ki, Vətən müharibəsi iştirakçılarının və Vətən müharibəsində, habelə Vətən müharibəsindən sonra Azərbaycan Respublikasının ərazi bütövlüyü uğrunda döyüş əməliyyatları və hərbi təxribatlar nəticəsində şəhid ailəsi statusu almış və əlilliyi müəyyən edilmiş şəxslərin banklara və digər kredit təşkilatlarına olan borclarının silinməsindən əldə olunan gəlir vergidən azad edilir: “Hazırda borcun silinən hissəsi 14 faiz vergiyə cəlb edilir. Banklar və kredit təşkilatları tərəfindən Vətən müharibəsi iştirakçılarının və Vətən müharibəsində şəhid olmuş şəxslərin, habelə Vətən müharibəsi nəticəsində şəhid ailəsi statusu almış şəxslərin 2021-ci il 1 yanvar tarixinədək alınmış kreditlər üzrə həmin tarixədək ödənilməyən borclarına görə hesablanmış faizlərin silinməsi bankların və digər kredit təşkilatlarının vergi tutulan gəlirlərinə aid edilmir ki, hazırda banklar bu gəlirlərlərdən 20 faiz mənfəət vergisi ödəyirlər”.
Millət vəkili hesab edir ki, 1 yanvar 2022-ci il tarixdən qüvvəyə minəcək müvafiq dəyişikliklər bu kateqoriyadan olan vətəndaşların və onlara dəstək göstərən vətəndaşlara dövlətin vergi güzəştləri formasında növbəti dəstəyi olacaq: “Müharibə iştirakçılarına dövlət tərəfindən hər zaman böyük diqqət və qayğı göstərilir”
Günel CƏLİLOVA
