Məlum olduğu kimi, şəhid ailələrinin üzvləri və qazilərimiz, müharubə iştirakçıları üçün də yeni vergi güzəştlərinin tətbiqi nəzərdə tutulur. Belə ki, Azərbaycan Respublikası Milli Məclisinin 3 dekabr tarixli iclasında üçüncü oxunuşda müzakirəyə çıxarılan Vergi Məcəlləsinə edilən dəyişikliklərə əsasən, Vətən müharibəsində şəhid olmuş şəxslərin ailə üzvləri və qazilər üçün yeni vergi güzəştləri müəyyənləşib. Eyni zamanda, Vətən müharibəsi şəhidləri ilə bərabər, Vətən müharibəsi iştirakçılarının da banklara və digər kredit təşkilatlarına olan borclarının silinməsindən əldə olunan gəlir gəlir vergisindən azad edilib.
Şəhid ailələrinin, qazilərin, onlara bərabər tutulan müharibə iştirakçılarının banklara, kredit təşkilatlarına təxminən hansı məbləğdə borclarının silinməsindən söhbət gedir? Təxminən hansı məbləğdə borclar silinib? Ümumi şəkildə nə qədər bank krediti silinib və bu adamlar nə qədər məbləğdə gəlir vergisindən azad edilib?
İqtisadçı deputat Vüqar Bayramov “Bakı-Xəbər”ə bildirdi ki, şəhid ailələrinin üzvləri və qazilərimiz üçün də yeni vergi güzəştlərinin tətbiqi nəzərdə tutulur. “Vergi Məscəlləsinə edilən dəyişikliklərdə əsas məqsədlərdən biri də şəhid ailələrimizin, eləcə də qazilərimizin sosial təminatının gücləndirilməsi ilə bağlıdır. Vergi Məcəlləsinə edilən dəyişikliklərdə eyni zamanda şəhid ailələri üzvləri və qazilərimiz üçün də yeni vergi güzəştlərinin tətbiqi nəzərdə tutulur. Nəzərə alsaq ki, şəhid olmuş şəxslərin ailə üzvlərinin və Azərbaycan Respublikasının azadlığı, suverenliyi və ərazi bütövlüyü uğrunda aparılan hərbi əməliyyatlar nəticəsində əlilliyi müəyyən edilmiş hərbi qulluqçuların və mülki şəxslərin əldə etdiyi maddi yardımın 20 min manatadək olan hissəsi vergidən azad olunur. 20 minə qədər olan məbləğ vergiyə cəlb olunmur. Eyni zamanda kredit borcunun bağışlanması hesabına yaranan gəlir də vergidən azad olunur. Çünki bu da uzun müddət müzakirə olunan məsələlərdən biri idi. Bu məsələnin mahiyyəti odur ki, Banklar Assosiasiyası ölkə rəhbərliyinin göstəriş və tövsiyələrinə uyğun olaraq Vətən müharibəsində şəhid olmuş şəxslərin kredit borclarının silinməsi ilə bağlı kommersiya banklarına müraciət etdi və həmin borclar kommersiya bankları tərəfindən silindi. Amma bu borcların silinməsi nəticəsində alınan kreditlər geri qaytarılmadığı üçün dolayı bir gəlir yaradırdı və vergi fəlsəfəsinə görə də həmin gəlirin vergiyə cəlb olunması müzakirə olunurdu. Ona görə də, bu dəyişiklik imkan verəcək ki, həmin gəlirlər məbləğdən asılı olmayaraq vergiyə cəlb olunmasın. Nəticədə artıq kredit borcu bağlanan, silinən zaman hər hansı formadasa vergiyə cəlb olunma baş verməyəcək. Eyni zamanda bəzi banklar tərəfindən də qazilərimizin kredit borclarının silinməsi ilə bağlı qərar qəbul olundu ki, bu qərar da qazilərimizə şamil olunacaq. Praktik olaraq statistika göstərir ki, Vətən müharibəsdə şəhid olmuş insanlarımızın hamısının kredit borcu silinib. Qazilərimizin də kredit borclarının silinməsi faktları var. Praktik olaraq gələcəkdə də kommersiya bankları tərəfindən belə addımların atılması mümkündür. Bu da ondan xəbər verir ki, gələcəkdə də həmin bu halda vergiyə cəlb olunma həyata keçirilməyəcək”-deyə V.Bayramov bildirdi.
Deputat qeyd etdi ki, bütün edilən dəyişikliklər bu qəbildən olan ailələrin sosial təminatının, həyat şəraitinin yüksəldilməsinə xidmət edir. “Milli Məclisdə aparılan müzakirələrdən sonra təklif edilən vergidən azad olunan məbləğin 2 dəfə artırılması qərara alındı. Bu da, əslində, Milli Məclislə hökumət arasında bu istiqamətdə də müzakirələrin səmərəli həyata keçirildilyindən xəbər verir. Milli Məclisdə təsdiq olunan digər güzəşt Vətən müharibəsi iştirakçılarının və Vətən müharibəsində, habelə Vətən müharibəsindən sonra Azərbaycan Respublikasının ərazi bütövlüyü uğrunda döyüş əməliyyatları və hərbi təxribatlar nəticəsində şəhid ailəsi statusu almış və əlilliyi müəyyən edilmiş şəxslərin banklara və digər kredit təşkilatlarına olan borclarının silinməsindən əldə olunan gəlirin vergidən azad olunmasıdır. Bu hal da vergiyə cəlb olunma baxımından müzakirə edilən məsələlərdən idi. Yeni dəyişikliklərlə bu halda məbləğ limiti olmadan vergi güzəşti tətbiq olunacaq”- deyə deputat bildirdi. Deputat onu da bildirib ki, Vergi Məcəlləsində nəzərdə tutulan hər iki güzəşt şəhid ailələrinin və qazilərimizin sosial təminatının gücləndirilməsi baxımından vacib hesab olunur: “Belə ki, bu belə ödənişlər həyata keçirilən və ya gəlirlər yaranan zaman şəhid ailələri və qazilərimizin vergi ödəməkdən azad olunmasına imkan verəcək. Dəyişikliklər Azərbaycan Prezidenti tərəfindən təsdiq olunduqdan sonra gələn aydan qüvvəyə minəcək”.
İradə SARIYEVA
