Avtomobil sığorta bazarında mühüm dəyişmə...

İlkin İbrahimov: “Hazırda sığorta sektorunda birinci problem qiymətləndirmə problemidir”

img

Azərbaycanda avtomobillərin icbari sığortası haqqında qanunda ciddi dəyişikliklər olacaq. Bununla bağlı Mərkəzi Bank qanun layihələrini hazırlayıb. Bu barədə Mərkəzi Bankın Sığorta fəaliyyətinə nəzarət departamentinin direktoru Vüsal Qurbanov media nümayəndələrinə açıqlamasında qeyd edib.

O deyib ki, indiyə qədər icbari sığorta zərərvuran şəxsin sığortası hesabına baş verirdi, bundan sonra isə bu mexanizm dəyişəcək və zərərçəkən sığortalı məhz özünün sığortaçısına müraciət edəcək.  Bu isə sığorta şirkətinin öz müştərisinə daha loyal yanaşmasına, başqa sözlə, müştərinin hazırkı uzun və yorucu prosedurlarda ən azı 1:0 önə keçməsinə şərait yaradacaq.

Maraqlıdır, icbari tibbi sığorta ilə bağlı tətbiq olunacaq yeni qayda avtomobillərin sığortasına necə təsir edəcək?

  • “İndi zərərçəkənin sığorta şirkəti maşını qiymətləndirəcək və zərərçəkənə ödəniş edəcək, sonra isə…”

Sığorta sahəsi üzrə ekspert İlkin İbrahim bildirdi ki, bu məsələ əslində yenilik deyil: “2016-cı ildə “İcbari sığortalar haqqında” Qanuna dəyişiklik olundu. Bu məsələ həmin vaxtdan artıq nəzərdə tutulmuşdu. Tutalım, iki avtomobil toqquşur. Əvvəlki qaydalara görə, ödənişi zərər vuranın sığorta şirkəti verməlidir. Amma indi zərərçəkənin sığorta şirkəti maşını qiymətləndirəcək və zərərçəkənə ödəniş edəcək. Sonra isə zərərçəkənin sığorta şirkəti həmin məbləği zərərvuranın sığorta şirkətinə göndərəcək ki, ona geri ödəniş etsin. Əvvəllər bu məsələni Mərkəzi Bank və ondan da əvvəl Palata qaldıranda qarışıqlıq yarandı. Bəzi şirkətlər bu barədə narazılıq etdi. Onlar qeyd edirdi ki, zərərçəkənin sığorta şirkəti bilir ki, o pulunu başqa şirkətdən alacaq, o halda zərərin məbləğini şişirdə bilər. Ona görə də 2016-cı ildə bu məsələ dayandırıldı”.

Ekspert hesab edir ki, avtomobil sığortası ilə bağlı müstəqil qiymətləndirici ekspertlərə aid edilən məsələlərin tənzimlənməsinə ehtiyac var: “Burda kifayət qədər mübahisəli məsələlər var. Mərkəzi Bank indi çıxış yolu olaraq təsadüfi seçim üsulu tətbiq edəcək. Məsələn, siyahıda bir nəfər təsadüfi seçim əsasında seçiləcək və avtomobili qiymətləndirəcək. Müstəqil ekspertlərin reyestrinə Mərkəzi Bank nəzarət edir. Burda müxtəlif suallar ortaya çıxır. Bu ekspertlərə nə qədər inanacağımız gələcəkdəki şəffaflıqdan asılı olacaq”.

Onun sözlərinə görə, hazırda sığorta sektorunda birinci problem qiymətləndirmə problemidir. Vətəndaşların sözlərinə görə, sığorta şirkətləri qiymətləndirmə zamanı konkret olaraq 3-5 nəfər ekspertlə işləyir: “Onlar da ya şirkətin öz işçisi olur, ya da şirkətin dediyi qiyməti qoyurlar. İndi Mərkəzi Bank ekspertlərin təsadüfi seçim əsasında seçilməsini və zərərin zərərçəkənin sığorta şirkətinin ödəməsini təmin edəcək. Bu məsələ vətəndaş üçün daha yaxşı ola bilər. Belə ki, gələcəkdə vətəndaşa daha çox pul verilə bilər. Çünki zərərçəkənin şirkəti öz müştərisinə xoş gəlmək üçün məbləği çox yazdıra bilər. Amma zərərvuranın sığorta şirkətinə sərf etməyə bilər. Çünki ona özü iştirak etmədən yüksək məbləğ təqdim oluna bilər”.

Günel CƏLİLOVA

Son xəbərlər