“Azərbaycanda yaşayış minimumu və ehtiyac meyarı ilə bağlı göstərici var. Əsas məqsəd odur ki, ehtiyac meyarı yaşayış minimumuna çatdırılsın”.
Bu fikirləri maliyyə naziri Samir Şərifov Milli Məclisin noyabrın 23-də keçirilən plenar iclasında – “2022-ci il dövlət büdcəsi haqqında” qanun layihəsinin II oxunuşda müzakirəsində bildirib.
Onun sözlərinə görə, Azərbaycanda da, bir çox ölkələrdə olduğu kimi, ehtiyac meyarı ləğv oluna bilər.
Maraqlıdır, hazırda ehtiyac meyarının ləğv olunması mümkün ola bilərmi?
Natiq Cəfərli: “Yaxın gələcəkdə ehtiyac meyarı ləğv olunacaq”
Məsələ ilə bağlı fikir bildirən iqtisadçı ekspert Natiq Cəfərli dedi ki, Azərbaycanda uzun müddətdir minimum istehlak zənbili ilə minimum ehtiyac meyarının birləşdirilməsi müzakirə olunur: “Çox güman ki, yaxın gələcəkdə belə bir addım atılacaq. Ehtiyac meyarının ləğv olunmasının müsbət tərəfi ondan ibarət olacaq ki, yeni hesablama qaydası müəyyən ediləcək. Yeni hesablama qaydası müəyyən edilərsə, minimum əmək haqqına, minimum istehlak zənbilinə müsbət təsir göstərə bilər. Belə olarsa, ölkədə əmək haqlarının hesablanması qaydasında dəyişiklik baş verə bilər. Doğru-düzgün statistik məlumatlar aparılarsa hesablamalar da düzgün olar”.
Vüqar Bayramov: “Ehtiyac meyarının ləğv edilməsi və yalnız yaşayış minimumundan istifadə olunması daha məqsədəuyğun olardı:”
Millət vəkili Vüqar Bayramov bildirdi ki, gələn ildən ehtiyac meyarı 200 manata çatdırılacaq. Ehtiyac meyarı artırıldığından, daha çox ailə ünvanlı sosial yardım üçün müraciət edə biləcək: “Yeni ehtiyac meyarının müəyyənləşdirilməsi ünvanlı sosial yardımın aylıq məbləğinin artırılması və müraciətin genişləndirilməsi baxımından vacibdir. Bu kontekstdən ehtiyac meyarının 170 manatdan 200 manatadək yüksəlməsi ünvanlı sosial yardım proqramı çərçivəsində vətəndaşlarımızın aldığı yardım məbləğinin gələn ildən artmasına səbəb olacaq. Məsələn, ailənin 5 üzvü var və həmin ailənin rəsmi aylıq gəliri 600 manatdır. Bu il həmin ailə üçün 850 manat (5 nəfər X 170 manat) ehtiyac meyari, yəni xərc hesablanır. Bu zaman ailənin xərci ilə gəliri arasındakı fərq 250 manat (850 manat- 600 manat) olur. Həmin ailənin ünvanlı sosial yardıma müraciət hüququ olduğu halda o proqram çərçivəsində ayda dövlətdən 250 manat yardım ala bilir. Amma bu rəqəm gələn ildən artacaq. Belə ki, həmin ailə üçün ehtiyac meyarı 1000 manata yüksəlir (5 nəfər X 200 manat) və nəticədə həmin ailənin aldığı aylıq yardım 250 manat deyil 400 manat (1000 manat- 600 manat) olur”.
Deputat hesab edir ki, 2023-cü ildən etibarən ehtiyac meyarının ləğv edilməsi və yalnız yaşayış minimumdan istifadə olunması daha məqsədəuyğun olardı: “Bu zaman ünvanlı sosial yardım proqamında da yaşayış minimumu meyarından istifadə etmək daha uyğundur. Bu, sözügedən proqram çərçivəsində ödənilən yardım məbləğinin daha da artmasına səbəb olar. Qeyd edək ki, gələn il üçün yaşayış minimumu 210 manat olacaq”.
Günel CƏLİLOVA
