Məlum olduğu kimi, Azərbaycanda minimum əməkhaqqı 250 manatdan 300 manata qaldırılır. Qeyd edək ki, bu məsələ "Azərbaycan Respublikasının 2022-ci il dövlət büdcəsi haqqında” qanun layihəsində öz əksini tapıb.
Maraqlıdır, maaşların minimum həddinin artırılması əhalinin sosial durumuna və biznesə necə təsir edəcək?
“Minimum əmək haqqının qalxması həm dövlət, həm də özəl sektorda çalışanların maaşların qalxmasına səbəb olacaq”
İqtisadçı ekspert Pərviz Heydərov bildirdi ki, ölkədə minimum əmək haqqının artması dövlət sektorunda çalışan 670 mindən çox şəxsin maaşlarının artmasına səbəb olacaq: “Məlumdur ki, minimum əmək haqqı ölkə üzrə bütün muzdlu əməyə görə ödənilən ən aşağı maaşdır. Özəl və dövlət sektorunda müəyyən edilmiş minimum əmək haqqı səviyyəsindən aşağı əmək haqqı ödənilə bilməz. Bu baxımdan minimum əmək haqqının qalxması həm dövlət, həm də özəl sektorda çalışanların maaşlarının qalxmasına səbəb olacaq. Beləliklə, orta aylıq əmək haqqının məbləğində də artım qeydə alınacaq. Bu artım əhalinin sosial gəlirinin artmasına şərait yaradacaq”.
Həmsöhbətimiz onu da əlavə etdi ki, sonuncu dəfə minimum əmək haqqı 2019-cu ildə qalxıb: “Məlumat üçün bildirim ki, həmin ildə minimum əmək haqqı iki dəfə artdı”.
İqtisadçının sözlərinə görə, minimum əmək haqqının 50 manat qalxması biznes dairələrinə də təsir edəcək: “Gələcəkdə bu sahədə müəyyən islahatların aparılmasına ehtiyac var. Dövlət sektorunda əməkhaqlarının artması o deməkdir ki, ümumi əmək bazarında əməkhaqqı artacaq. Seçim imkanları genişlənəcək və dövlət seqmentinə keyfiyyətli işçilərin keçməsi ehtimalı yüksəlir. İnsanlar rasional qərar qəbul edir. Bu da nəticədə sahibkarların, biznesin də öz çalışanlarının qayğısına daha yaxşı qalması, onların gəlirlərini, maaşlarını artırması istiqamətində bir çağırış formalaşdırır”.
Günel CƏLİLOVA
