Son illər ölkədə pambıqçılığın inkişafı üçün bir sıra zəruri addımlar atılır. Bununla bağlı maarifləndirmə işləri ilə yanaşı, fermerlərə əlavə dəstəklər də verilir. Ölkə başçısı pambıqçılığın inkişafı məqsədilə dövlət əhəmiyyətli proqramın da təsdiqi üçün tapşırıqlar verib. Məlumdur ki, bir neçə il bundan əvvəl pambıqçılıq Azərbaycanda prioritet sahələrdən biri elan edilib. Hətta “Azərbaycan Respublikasında pambıqçılığın inkişafına dair 2017-2022-ci illər üçün Dövlət Proqramı” da qəbul olunub.
Bu istiqamətdə aparılan işlərə baxmayaraq, pambıqçılıqla məşğul olanlar suvarılma ilə bağlı problemlərin yaşandığını iddia edir. Xüsusilə Biləsuvarın Aranlı kəndində pambıqçılıqla məşğul olanlar istədikləri qədər məhsul əldə edə bilmədiklərini bildirir.
Həsənəli İbayev adlı fermer bildirir ki, pambıq çox nazlı bitkidir, gərək onunla yaxşı davranasan. Bura vaxtlı-vaxtında suvarmaq, alaqlarını təmizləmək daxildir: “Minimum 5 dəfə su vermək lazımdır. Ancaq bu il sahələrə dövlət cəmi bir dəfə su açdı. O da min bir müsibətdən sonra. İcra Hakimiyyətinə getdim, qəbulda oldum. Həm də şəhid ailəsi olduğumuzdan bizim sahəyə bir dəfə su açdılar. Bu il pambığa cəmi iki dəfə su verə bildim. Biri icra başçısının tapşırığı ilə açılan su, digəri isə şor su kollektorundan götürdüyüm su ilə. Əslində məhsulu şor su ilə suvarmazlar. Amma əlacım qalmadı, məcburiyyətdən şor su kollektorunun önünü bağladım. Orda toplanan suyu nasosla, borularla sahəyə verdim. Elə məhsuldarlığın bu səviyyədə olmasının bir səbəbi də həmin şor sudur. Bir sözlə, kəndlini pis duruma salmaq üçün əllərindən gələni edirlər”.
Qeyd edək ki, bu ilin iyulunda Biləsuvar sakinləri su probleminə görə hətta yolları da bağladı.
“Problemin həlli üçün müraciət olunub, ümid edirik, fermerlər gələn ildən bu problemlə üzləşməyəcək”
Məsələ ilə bağlı Biləsuvar Sukanal Sahəsindən bildirildi ki, 2 ildir isti havalarla bağlı su qıtlığı yaşanır: “Ancaq bu ümumi problemdir və təkcə Biləsuvarda yox, yaxın bir neçə rayonda olub. Problemin həlli üçün müraciət olunub. Ümid edirik, gələn ildən fermerlər bu problemlə üzləşməyəcək”.
Günel CƏLİLOVA
