“Artıq 16 rayon üzrə ünvanlı sosial yardımın verilməsi ilə bağlı yoxlanmalar başlanıb”. Bunu Əmək və əhalinin sosial müdafiəsi naziri Sahil Babayev noyabrın 10-da Milli Məclisin İqtisadi siyasət, sənaye və sahibkarlıq komitəsinin iclasında gələn ilin dövlət büdcəsi zərfinə daxil olan sənədlərin müzakirəsi zamanı deyib.
“Sonrakı mərhələdə bu, 46 rayona çatdırılacaq"- deyə bildirən nazir həmçinin vurğulayıb ki, pensiyaların araşdırılması nəticəsində qanunsuz pensiyalar müəyyənləşdirilib və nəticədə dövlət büdcəsinin xərclərinə böyük miqdarda vəsait qənaət edilib.
Müşahidələr və narazılıqlar göstərir ki, bəzi hallarda bu zərərli nəticə verir, həqiqətən də sosial yardıma ehtiyacı olanlar da bundan məhrum edilirlər. Çox adamlar narazılıq edir ki haqsız yerə, heç bir əsas olmadan onun ünvanlı sosial yardımı kəsilir və sair.
Ekspertlərin sözlərinə görə, bir sıra hallarda ünvanlı sosial yardımlar da, pensiyalar kimi araşdırmalar aparılmadan, qəfil kəsilir, nəticədə vətəndaş çox pis vəziyyətlə qarşılaşır.
“Apellyasiya şikayəti də vermək çox çətindir”
İqtisadçı ekspert Natiq Cəfərli “Bakı-Xəbər”ə bildirdi ki, burada iki məsələyə ayrıca baxmaq tələb olunur. “Birincisi, əgər qanunsuz olaraq sosial müdafiə fondundan ünvanlı sosial yardımlar ayrılıbsa, bunun cavabdehlik məsələsi də olamalıdır. Dünənki çıxışında Sahil Babayev bu ilin 10 ayında 500 milyon dövlət vəsaitinə qənaət oldunduğunu deyib. Bunu bir neçə ilə bölün, görün nə qədər böyük vəsaitdən söhbət gedə bilər. Bunun cavabdehliyini kim daşıyırdı? Bu birinci məsələdir və ciddi araşdırılmalıdır. İkinci məsələ odur ki, əgər hansısa bir qeyri-qanuni sosial müdafiə, yaxud təqaüd təyinatları varsa, bunlar araşdırılaraq fərdi qaydada ləğv edilə bilər. Amma çox zaman, obrazlı desək, qurunun oduna yaş da yanır. Yəni birdəfəlik bir neçə min insanı ünvanlı sosial yardımdan məhrum edirlər, sonradan araşdırmalara başlayırlar. Apellyasiya şikayəti də vermək çox çətindir. Uzun növbələr var. Apellyasiya şikayətləri ilə məşğul olan idarələrin qarşısından keçsəniz görərsiz ki, yüzlərlə, minlərlə insan şikayətə gəlir, vaxtında şikayətini verə bilmir, araşdırmaların aparılması ilə bağlı problemlər yaşanır”.
N.Cəfərlinin sözlərinə görə, bütün bunlar vətəndaşın hüquqlarının pozulmasına səbəb olur. N.Cəfərlinin fikrincə, bu iş ucdantutma aparılmamalıdır, fərdi qaydada həyata keçirilməlidir ki, haqqı olan vətəndaşların hüquqları pozulmasın: “Bu araşdırmaların fərdi qaydada aparılması daha doğru olar. Yəni fərdi qaydada insanlarla bağlı araşırmalar aparılmalı və insanlar barədə fərdi qaydada qərar verilməsi mexanizmi olmalıdır. Özü də vətəndaşlar apellyasiya şikayəti verənə və o şikayətə baxılana qədər onların sosial müavinətləri almaq hüququ olmalıdır. Yəni birdəfəlik mərkəzləşdirilmiş qərarla bu yardımın qəfil kəsilməsi ehtiyacı olan və haqqı çatan insanların da hüquqlarının pozulmasına səbəb olur”.
İradə SARIYEVA
