Daxili İşlər Nazirliyinin xidməti idman tədbirlərinin təqvim planına əsasən noyabrın 13-dən 15-dək cüdo üzrə daxili işlər orqanlarının birinciliyi keçirilib.
DİN İdman Cəmiyyətinin sədri, Olimpiya, dünya və Avropa çempionu, polis polkovniki Zemfira Meftahetdinova Azərbaycanda idmana və idmançılara göstərilən diqqət və qayğıdan söhbət açaraq bildirib ki, bu gün idmançılarımız beynəlxalq yarışlarda uğurlu nəticələr qazanır və Vətənimizi layiqincə təmsil edirlər. Azərbaycan təmsilçilərinin ən mötəbər yarışlarda əldə etdiyi qələbələr, keçirilən idman tədbirlərinin miqyası respublikamızın dünyanın ən güclü idman ölkələrindən birinə çevrildiyinin əyani sübutudur.
Bildirilib ki, Azərbaycanın sürətli, dinamik inkişafı idman sahəsində də özünü göstərir. Bütün bu uğurların əsasında Ulu öndərin müəyyən etdiyi, möhtərəm dövlət başçımızın uğurla davam və inkişaf etdirdiyi düzgün siyasət durur. Bizim ölkəmiz məhz bu siyasətin sayəsində həm də mühüm beynəlxalq idman yarışlarının məkanına çevrildi.
Daha sonra yarışlara start verilib.
DİN İdman Cəmiyyətində keçirilən bu yarışda ərazi polis orqanları, nizami hissə və tədris müəssisələrini təmsil edən ümumilikdə 11 komandadan olan 90 idmançı tatami üzərinə çıxıb.
Gərgin keçən yarışlarda mübarizə aparan iştirakçılar arasında qaliblər müəyyənləşib.
Müvafiq olaraq öz çəki dərəcələrində güclərini sınayan Rüstəm Diniyev (60 kq, Polis Akademiyası), Rəşad Həsənov (66 kq, Naxçıvan MR DİN), Yusif Bayramov (73 kq), Azər Fətullayev (81 kq, Əlahiddə Çevik Polis Alayı), Bəxtiyar Abbasov (90 kq, Bakı Şəhər BPİ), Kənan Abdullaxanlı (100 kq, Baş Mühafizə İdarəsi) və Zaur Məcidov (+100 kq, DİN İdman Cəmiyyəti) yarışın baş mükafatını qazanaraq çempion olub.
DİN İdman Cəmiyyətinin İdmanın təşkili bölməsinin rəisi, polis polkovnik-leytenantı Mülayim Xıdırov əməkdaşların hazırlıq səviyyəsinin yüksək olmasını, polis idmançılarımızın ildən-ilə təcrübələrini artırdığını diqqətə çatdırıb. O bildirib ki, bu yarışların keçirilməsi həm də beynəlxalq yarışlarda ölkəmizi təmsil edəcək idmançıların seçilməsi məqsədi daşıyır.
Yarışların idarə olunmasında polis polkovnik-leytenantları Elmir Həsənov və Seymur Qurbanbəyli iştirak edib.
Sonda qaliblərə medallar, diplomlar və qiymətli hədiyyələr təqdim olunub.
Zeyni HÜSEYNOV DİN Mətbuat Xidmətinin əməkdaşı
