Azərbaycan müstəqillik qazandıqdan sonra ilk illərdə özünü bütün sahələrdə göstərən böhran səbəbindən idman və bədən tərbiyəsi də tamamilə diqqətdən kənarda qalmışdı. Ümummilli lider Heydər Əliyevin 1993-cü ildə yenidən hakimiyyətə qayıdışından sonra, ölkə həyatının bütün sahələrində olduğu kimi, idmanın inkişafı da dövlət siyasətinin prioritet istiqamətlərindən birinə çevrildi.
Azərbaycanın idman ölkəsinə çevrilməsi, beynəlxalq aləmdə layiqincə tanınması və Olimpiya hərəkatına qoşulması məhz bu dövrdə geniş vüsət aldı. Köhnə qurğular, meydançalar yeniləndi, müasir, dünya səviyyəli idman sarayları və komplekslərin inşasına başlandı. Çox qısa zaman kəsiyində həyata keçirilən mühüm tədbirlərin nəticəsində idmançılarımız möhtəşəm qələbələrə imza atmağa başladılar.
Cənab İlham Əliyevin 2003-cü ildə ölkə prezidenti seçilməsindən sonra idmanın və Olimpiya hərəkatının inkişafına, gənclərin sağlam və gümrah yetişməsinə, onların bədən tərbiyəsi və idmanla daha yaxından dostluq etmələrinə göstərilən ali diqqət və qayğı öz parlaq təzahürləri ilə ölkəmizin tarixinə həkk olundu.
İdmana prioritet münasibət, bütün ölkədə olduğu kimi, DİO-dan da yan keçməyib. DİN rəhbərliyinin daimi diqqət və qayğısının bariz nümunəsidir ki, indi idmançı əməkdaşların qələbə sorağı Olimpiya yarışlarından, dünya və Avropa çempionatlarından gəlir.
Bu günlərdə DİN İdman Cəmiyyətində start verilən mini-futbol yarışması da yuxarıda sadalanan mükəmməl tədbirlər silsiləsinin davamıdır.
Cəmiyyətin İdmanın təşkili bölməsinin rəisi, polis polkovnik-leytenantı Mülayim Xıdırov deyib ki, bu, DİN rəhbərliyinin əmri ilə təsdiqlənmiş “Xidməti idman tədbirlərinin təqvimi planı”na əsasən, mini-futbol üzrə DİO-nun nizami hissələri arasında hər il keçirilən yarışdır. Qələbə uğrunda Daxili Qoşunların Baş İdarəsi, Bakı Şəhər Baş Polis İdarəsi, Baş Mühafizə İdarəsi, Nəqliyyatda Baş Polis İdarəsi, Polis Akademiyası, Əlahiddə Çevik Polis Alayı, Diplomatik Nümayəndəliklərin Mühafizəsi üzrə Əlahiddə Polis Taboru olmaqla 7 komanda mübarizə aparır.
Tədbirin təşkilində əsas məqsəd həm də DİN-in yığma komandasını müəyyənləşdirməkdir. Yeri gəlmişkən, yığmamız keçən il Tacikistan Respublikasının müstəqilliyinin 25 illiyinə həsr olunmuş turnirdə 9 komanda arasında üçüncü yeri qazanıb.
Srağagün Nəqliyyatda Baş Polis İdarəsinin və Diplomatik Nümayəndəliklərin Mühafizəsi üzrə Əlahiddə Polis Taborunun komandaları görüşüb. Oyun öncəsi NBPİ-nin rəis müavini, polis polkovniki Rövşən Eyyubov çıxış edərək, ölkə və DİN rəhbərliyinin idmana diqqət və qayğısından danışıb, yarış iştirakçılarına uğurlar arzulayıb. Qeyd olunub ki, ümummilli lider Heydər Əliyevin başlatdığı, Prezident İlham Əliyevin uğurla davam etdirdiyi inkişaf strategiyasının məntiqi nəticəsi olaraq, ölkəmiz regionun lider dövlətinə çevrilib. Dövlətimizin iqtisadi qüdrətinin ildən-ilə artması, bütün sahələr kimi, idmanın tərəqqisinə də təkan verib. Fərəhləndirici haldır ki, bu gün idmana dövlət səviyyəsində xüsusi qayğı və diqqət göstərilir. Nəinki paytaxtımızda, eləcə də regionlarda Olimpiya komplekslərinin, müasir idman qurğularının tikilib istifadəyə verilməsi, maddi-texniki bazanın möhkəmləndirilməsi bunu deməyə əsas verir. Rolis əməkdaşlarımız, o cümlədən NBPİ-nin şəxsi heyəti də yaradılan şəraitdən maksimum dərəcədə yararlanmağa, xidmətdə olduğu kimi, idmanda da öz sözlərini deməyə çalışır.
Sonra komandalar arasında yarışlara start verilib. Nəticələr barəsində oxucularımızı növbəti saylarımızda məlumatlandıracağıq.
Çingiz ŞIXVERDİYEV polis polkovnik-leytenantı
