Azərbaycan IV İslam Həmrəyliyi Oyunlarının möhtəşəm bağlanış mərasimini keçirdi. "Trend"in məlumatına görə, bu barədə Filippinin "Concept Central" jurnalında dərc olunan məqalədə bildirilir.
Qeyd olunur ki, yarışlarda iştirak edən 2800 atletdən böyük əksəriyyəti artıq şəhəri tərk etsə də, Bakı İslamiada ilə rəsmi şəkildə vidalaşmaq üçün parlaq şou təşkil etdi.
Məqalədə vurğulanır ki, bu Oyunlar Birinci Avropa Oyunları və Formula 1 yarışlarından sonra Azərbaycanın Yay Olimpiya Oyunlarını təşkil etmək yolunda atdığı daha bir addım oldu.
İslamiadanın təsirli nəticələrinə iki deputat baxışı...
Azərbaycanda keçirilən IV İslam Həmrəyliyi Oyunları ölkəmizə uğur gətirdi və bütün dünyaya islam dininin sülh, həmrəylik, dostluq dini olduğunu bir daha sübut etdi. Bunu "Trend"ə Milli Məclisin deputatı Musa Quliyev deyib.
Onun sözlərinə görə, idmançılarımızın IV İslam Həmrəyliyi Oyunlarında böyük müvəffəqiyyətlə çıxış edərək ölkəmizi yüksək pilləyə qaldırması həm Azərbaycanın dövlət kimi güc və qüdrətinin, həm də ölkəmizdə idmana olan diqqətin yüksək nəticəsi oldu.
Deputat hesab edir ki, Azərbaycanda keçirilən idman yarışları gələcəkdə ölkəmizə daha çox turistin gəlməsinə, ölkəmizin biznes, mədəni əlaqələrinin güclənməsinə, eyni zamanda Azərbaycanı dəstəkləyən insanların sayının artmasına səbəb olacaq: "Azərbaycan Prezidenti İlham Əliyev İslamiadanın qalibləri və onların məşqçiləri ilə keçirilən görüşdə İslam Oyunlarına düzgün qiymət verərək bildirdi ki, IV İslam Həmrəylik Oyunları Azərbaycanın beynəlxalq nüfuzunun, mədəniyyətimizin, qonaqpərvərliyimizin, ölkəmizdə idmana göstərilən diqqət və qayğının bir daha göstəricisi oldu. IV İslam Həmrəylik Oyunları, Prezident İlham Əliyevin də söylədiyi kimi, təkcə idman yarışı deyildi, eyni zamanda ölkəmizi, İslam dünyasını yenidən təqdim etmək mərasimi idi ki, Azərbaycan bunun öhdəsindən yüksək səviyyədə gəldi".
M.Quliyev qeyd edib ki, oyunlarda iştirak edən idmançılar, məşqçilər, onlara azarkeşlik edənlər, yarışlara baxmaq üçün turist kimi ölkəmizə gələnlər bu ərəfədə təkcə idmanla maraqlanmaqla kifayətlənmədilər: "Onlar eyni zamanda ölkəmizin, şəhərimizin görməli yerlərində olub, mətbəximizlə, musiqimizlə tanış oldular. Bundan başqa, şəhərimizə gələn qonaqlar gələcəkdə özlərinin biznes layihələrini həyata keçirmək üçün Azərbaycandakı biznes mühiti ilə də tanış olmaq imkanı qazandılar".
"Son illər Azərbaycan ilk Avropa Oyunları, Dünya Şahmat Olimpiadası, 17 yaşadək futbolçular arasında Avropa çempionatı, bədii gimnastika üzrə Dünya Kuboku, "Formula 1" kimi beynəlxalq yarışlara uğurla ev sahibliyi edib. Bakı-2017 İslam Həmrəyliyi Oyunları da uzun müddət yaddaşlarda qalacaq. Bütün bunlar isə Odlar Yurdu Azərbaycanı dünyada artıq idman ölkəsi kimi tanıdır". Bunu isə Yeni Azərbaycan Partiyası Nizami rayon təşkilatının sədri, Milli Məclisin deputatı Sədaqət Vəliyeva deyib.
S.Vəliyeva bildirib ki, Azərbaycanın ev sahibi olduğu İslam Həmrəyliyi Oyunlarında 54 ölkədən 3 mindən çox idmançının iştirak etməsi özlüyündə bir rekord idi. Çünki bu vaxtadək İslam Həmrəyliyi Oyunlarına bu qədər ölkənin qatılması heç vaxt müşahidə olunmayıb: "Bilirsiniz ki, Azərbaycanı bu Oyunlarda 325 atlet təmsil edirdi və yarışlarda ən çox qızıl medal qazanan ölkə də elə Azərbaycan oldu: 75 qızıl. Ümumilikdə isə əlavə 50 gümüş və 37 bürünc olmaqla 162 medal qazanan idmançılarımızın nəticələri bir daha isbatladı ki, Azərbaycan dünyanın qabaqcıl idman ölkələri sırasında öz layiqli yerini tutub. Bu Oyunların Azərbaycanda keçirilməsi bir daha onu göstərdi ki, Azərbaycan dünya miqyasında çox böyük hörmətə malik bir ölkədir".
Deputat diqqətə çatdırıb ki, Azərbaycan IV İslam Həmrəyliyi Oyunlarını yüksək səviyyədə keçirmək üçün bütün imkanlarını səfərbər etdi. Bütün məsələlər dəqiq və planlı şəkildə həyata keçirildi, yüksək səviyyədə və təhlükəsiz şəraitdə baş tutdu: "IV İslam Həmrəyliyi Oyunları İslam həmrəyliyinin gücləndirilməsinə stimul verdi, eyni zamanda həm İslam aləminə, həm dünyaya bir daha göstərdi ki, İslam dini sülh, mərhəmət və qardaşlıq dinidir. Bakı-2017 İslam Həmrəyliyi Oyunları və idmanın qüdrəti xalqları İslamın dostluq, sülh, tolerantlıq və mərhəmət ruhu altında bir araya gətirdi. Dünya isə gördü ki, Azərbaycan böyük imkanlara malik ölkədir və ən mötəbər beynəlxalq yarışları keçirməyə qadirdir".
Xəbər xidməti
