Aqil Acalov: "Azərbaycan növbəti tarixi uğura imza atdı"
Azərbaycan daha bir mötəbər beynəlxalq idman tədbirinə yüksək səviyyədə ev sahibliyi etməklə tarix yazdı. Mayın 12-də Bakı Olimpiya Stadionunda möhtəşəm açılışla start götürən IV İslam Həmrəyliyi Oyunları mayın 22-də ölkəmiz üçün fantastik qələbə ilə yekunlaşdı. Bakıya rekord sayda - 54 ölkəni təmsil edən 3 mindən çox idmançı, 2000-dək komanda rəsmisi və texniki nümayəndə gəlmişdi. İndiyədək İslamiadaya bu qədər ölkənin və idmançının qatılması heç vaxt müşahidə olunmayıb.
"Bakı-2017" IV İslam Həmrəyliyi Oyunlarını 50-dən artıq ölkədə 1 milyarddan çox tamaşaçı izləyib. İdmanın 24 növü üzrə keçirilən yarışlarda atletlər 269 dəst medal uğrunda mübarizə aparıb. Azərbaycan idmançıları xalqımızı parlaq qələbələri ilə sevindirərək, yarışları birinci pillədə başa vurub. Atletlərimiz hamıdan çox - 162 medal (75 qızıl, 50 gümüş və 37 bürünc) qazanıb.
Oyunların təntənəli açılış və bağlanış mərasimi möhtəşəm şəkildə keçirildi. Açılış və bağlanış mərasimini istər televiziya qarşısında izləyənlər, istərsə də Bakı Olimpiya Stadionundakı tamaşaçılar unudulmaz, sevinc dolu anlar yaşadılar.
Açılış və bağlanış mərasimlərinin qüsursuz şəkildə keçirilməsi bir daha sübut etdi ki, Azərbaycan istənilən beynəlxalq səviyyəli tədbiri keçirməyə hazırdır. Elə "Bakı-2015" İlk Avropa Oyunlarının keçirilməsi ardından, "Formula- 1", daha sonra isə İslam Həmrəyliyi Oyunlarının möhtəşəm şəkildə keçirilməsi bir daha Azərbaycanın gücünü dünyaya göstərdi.
"Bakı-2017"nin açılış və bağlanış mərasimlərinin hazırlanmasına 31 ölkədən 5000-dən çox səhnə mütəxəssisi, texniki heyət və aktyorlar qrupu cəlb olunub.
Azərbaycan Alpaqut Federasiyasının prezidenti Aqil Acalov "Bakı-Xəbər"ə açıqlamasında qeyd etdi ki, IV İslam Həmrəyliyi Oyunlarının açılış və bağlanış mərasimləri yüksək səviyyədə başa çatdı: "Bakıda keçirilən İslam Həmrəyliyi Oyunları Azərbaycanın siyasi və iqtisadi cəhətdən gücünü dünyaya göstərdi. Bir daha dünyaya mesaj verildi ki, Azərbaycan həqiqətən də idman ölkəsidir və paytaxt Bakı idmansevərlərin şəhəridir. Prezident İlham Əliyevin idmana göstərdiyi qayğı və diqqət nəticəsində ölkəmizin uğuru günü-gündən artır. Nəinki "Bakı-2017" IV İslam Həmrəyliyi Oyunları, eyni zamanda, "Bakı-2015" Avropa Oyunları, "Formula-1" Qran-Pri yarışı, 42-ci Şahmat Olimpiadası kimi mötəbər idman yarışlarına Azərbaycan ev sahibliyi edib. Bəllidir ki, İslam Həmrəyliyi Oyunlarının təşkilatçılıq işləri Birinci vitse-prezident Mehriban xanım Əliyevaya həvalə olunmuşdu. Təşkilati işlərin çox yüksək səviyyədə görüldüyünü hər kəs müşahidə etdi. Burada peşəkarlıq önə qoyuldu. Azərbaycan növbəti tarixi uğura imza atdı".
Həmsöhbətimiz hesab edir ki, İslam Həmrəyliyi Oyunları ilə bağlı ən yüksək təşkilatçılıq elə Azərbaycan tərəfindən nümayiş etdirildi: "İnanmıram ki, növbəti İslam Həmrəyliyi Oyunlarında bizim qədər yüksək peşəkarlıq nümayiş etdirsinlər".
A.Acalovun sözlərinə görə, bağlanış mərasimi də, açılış mərasimi kimi, çox möhtəşəm, Azərbaycanın yüksək inkişaf səviyyəsini, İslam dəyərlərini, müasirliyi əks etdirən, yüz milyonlarla tamaşaçı auditoriyasını heyrətləndirən bir tədbir olaraq uzun müddət yaddaşlarda qalacaq.
Günel CƏLİLOVA
