2016-cı ilin sentyabr ayının 3-dən 8-dək Qırğızıstanın Çolpon-Ata şəhərində "II Ümumdünya Köçəri Oyunları" keçirilib. Oyunlara 62 ölkədən 500-dən çox idmançı qatılıb.
Prezident İlham Əliyevin tapşırığına əsasən, Azərbaycan Respublikasının gənclər və idman naziri Azad Rəhimovun başçılıq etdiyi böyük nümayəndə bu oyunlarda iştirak edib.
Həmçinin, "II Ümumdünya Köçəri Oyunları" çərçivəsində sentyabr ayının 3-dən 7-dək Qırğızıstanın Kırçın bölgəsində və Çolpon-Ata şəhərinin ippodromunda böyük mədəni tədbirlər keçirilib. Tədbirlərdə Qırğızıstan prezidenti, Prezident Aparatının, hökumətin, parlamentin yüksək vəzifəli şəxsləri iştirak edib.
İdmançılarla yanaşı Azərbaycandan jurnalistlər də bu oyunlara dəvət olunub. Azərbaycan Respublikasının Prezidenti Yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərlinin rəhbərliyilə Qırğız Respublikasına səfər edən jurnalistlər arasında "Xalq qəzeti"nin baş redaktoru Həsən Həsənov, "Bakı xəbər" qəzetinin baş redaktoru Aydın Quliyev, "525-ci qəzet"in baş redaktoru Rəşad Məcid, "İlham" qəzetinin baş redaktoru Əmir Pəhləvan, İctimai Televiziya və Radio Yayımları Şirkətinin Mərkəzi Asiya üzrə müxbiri Füzuli Məcidli və digərləri kimi tanınmış jurnalistlər yer alıb.
Azərbaycan, həmçinin, mədəni tədbirlərdə də iştirak edib. Mədəniyyət və Turizm Nazirliyinin Mədəniyyət müəssisələri və xalq yaradıcılığı şöbəsinin müdiri Fikrət Babayevin rəhbərliyi ilə Azərbaycanın xalq artisti, opera müğənnisi Fidan Hacıyeva, opera müğənnisi Ələsgər Əliyev, həmçinin muğam xalq musiqisini ifa edən "Üçlük" qrupu (Sahib Paşazadə, Hüseyn Məlikov, Toğrul Əsədullayev) bu tədbirlərdə iştirak etmək üçün Qırğız Respublikasında olub. Çoxsaylı tamaşaçılar sənətçilərimizin çıxışlarını hərarətlə qarşılayıb.
Qeyd olunmalıdır ki, 2013-cü ilin avqust ayının 16-da Qəbələ şəhərində keçirilən Türkdilli Dövlətlərin Əməkdaşlıq Şurasının Dövlət Başçılarının III Sammitində qəbul olunan qətnaməyə əsasən, 2014-cü ildən başlayaraq Ümumdünya Köçəri Oyunları keçirilməyə başlayıb. Bu oyunların türkdilli dövlətlər arasında gələcək əməkdaşlığın və dostluğun genişlənməsinə və dərinləşməsinə böyük töhfəsi olacağı isə şübhəsizdir.
Prezident İlham Əliyevin ölkədə idmana göstərdiyi diqqət, milli idman növlərimizin inkişafı üçün göstərdiyi qayğı hər zaman dünya ölkələrinin diqqət mərkəzində olub.
Azərbaycan, bütün idman növlərində olduğu kimi, Köçəri Oyunlarında da uğurla çıxış edərək, 62 ölkə arasında 15 medal (4 qızıl, 4 gümüş, 7 bürünc) qazanmaqla 5-ci yeri tutub.
Xəbər xidməti
