Tənzilə Rüstəmxanlı: “İstər vətəndaş cəmiyyətləri olsun, istər media nümayəndələri, istərsə də bələdiyyə sədrlərinin Cocuq Mərcanlı kəndində aparılmış və davam edən yenidənqurma işləri ilə tanış olmaları sevindiricidir”
2016-cı ilin aprel döyüşlərinin rəmzi olan Cocuq Mərcanlının bərpası prosesi davam edir. Diasporla İş üzrə Dövlət Komitəsinin təşəbbüsü və dəvəti ilə Çukurova Bələdiyyələr Birliyinə üzv bələdiyyə rəhbərlərindən ibarət 29 nəfərlik nümayəndə heyəti noyabrın 5-dən 9-dək Azərbaycanda işgüzar səfərdə olacaq.
Nümayəndə heyətinin Cəbrayıl rayonunun Cocuq Mərcanlı kəndinə səfəri planlaşdırılır. Qonaqlar Cocuq Mərcanlı kəndinin işğaldan azad olunandan sonra qısa müddətdə aparılmış və davam edən tikinti-quruculuq, yenidənqurma işləri ilə tanış olacaq, "Aprel şəhidlərinə xatirə" abidə kompleksini ziyarət edəcək, Azərbaycan-Türkiyə Qardaşlıq Parkının salınması məqsədilə ağacəkmə kampaniyasının və Adana şəhər Karaisalı Bələdiyyəsi ilə Cəbrayıl Rayon İcra Hakimiyyəti arasında "Qardaş şəhər" niyyət protokolunun imzalanması mərasimində iştirak edəcəklər Çukurova Bələdiyyələr Birliyinə üzv bələdiyyə rəhbərlərindən ibarət nümayəndə heyətinin Cocuq Mərcanlıya səfərinin əhəmiyyəti barədə danışan Azərbaycan Türk Qadınlar Birliyinin sədri Tənzilə Rüstəmxanlı “Bakı-Xəbər”ə açıqlamasında bunları qeyd etdi: “Türk İş Adamları Biliyinin nümayəndə heyəti də bu yaxınlarda Cocuq Mərcanlıya səfər edib. Qarabağ hər zaman Türkiyənin diqqətindədir. Türkiyə dövləti Qarabağ məsələsinə xüsusi həssaslıqla yanaşır. Aprel döyüşlərində Cocuq Mərcanlı ətrafındakı ərazilərin qaytarılması yerli vətəndaşlarla yanaşı, türkləri də sevindirdi”.
Həmsöhbətimiz onu da bildirdi ki, Türkiyənin Azərbaycandakı təmsilçisi də Cocuq Mərcanlıya səfər edib. Orada yaradılan şəraitlə tanış olub: “Azərbaycanı bilən, Azərbaycanla Türkiyənin bir millət olduğunu anlayan hər kəs hər zaman ölkəmizin yanında olub. İstər vətəndaş cəmiyyətləri olsun, istər media nümayəndələri, istərsə də bələdiyyə sədrləri bu məsələdə Azərbaycanın yanında olublar. Çukurova Bələdiyyələr Birliyinə üzv bələdiyyə rəhbərlərindən ibarət nümayəndə heyətinin qarşıdakı günlər ərzində Cocuq Mərcanlıya səfər etməsi sevindiricidir. Hər kəs işğaldan azad olunan Cocuq Mərcanlı kəndində aparılmış və davam edən yenidənqurma işləri ilə tanış olsun”.
Günel CƏLİLOVA
