Türkiyənin "Petkim" neft-kimya kompleksinin baş direktoru Sadəddin Qorqud saxlanılıb. Trend-in Anadolu agentliyinə istinadən verdiyi xəbərə görə, Sadəddin Qorqud və daha 200 müxtəlif enerji şirkətlərinin əməkdaşı Fəthullah Gülənin hərəkatı ilə əlaqələrdə ittiham olunurlar.
"APA-Economics" "Anadolu" agentliyinə istinadən xəbər verir ki, S. Korkutun evində və iş yerlərində axtarış aparılıb. Həbsdən öncə holdinq rəhbəri tutduğu vəzifədən istefa verib.
Bundan başqa, holdinqin, o cümlədən onunla əlaqəsi olan digər müəssisələrin də rəhbərliyində təmsil olunan bir neçə şəxsin işindən uzaqlaşdırıldığı iddia olunur.
Ümumilikdə, 200-dən çox şəxs işdən uzaqlaşdırılıb. Onların arasında "SOCAR Turkey Energy" şirkətinin ictimaiyyətlə əlaqələr üzrə bölmənin rəhbəri Ömər Adsız, STAR zavodunun insan resursları üzrə direktoru Fuat Ulagay və onun "SOCAR Turkey Energy"dən olan həmkarı İlqar Mehmetoğlu, "SOCAR Turkey Energy"nin elmi tədqiqat üzrə direktoru Çetin Korkut da istefa verib. Bildirilir ki, onların işdən uzaqlaşdırılmasına səbəb FETÖ ilə əlaqələrinin olmasıdır.
Trend-in məlumatına görə, "Anadolu" agentliyinə açıqlama verən holdinqin Direktorlar Şurasının sədri Vaqif Əliyev deyib ki, iyulun 27-dən etibarən "Petkim" holdinqində (SOCAR-ın Türkiyə aktivi) ayrı-ayrı departamentlərdən 27 nəfər işdən azad edilib.
Onun sözlərinə görə, SOCAR Türkiyədə restrukturizasiya prosesi çərçivəsində əvvəlki kimi bu ölkəyə investisiya yatırmağa davam edəcək: "Türkiyədə şirkətin investisiyaları 18 milyard dollar təşkil edir. Bununla da şirkət Türkiyədə ən iri xarici investordur".
SOCAR-dan Trend-ə bildiriblər ki, "Petkim" holdinqinin keçmiş baş direktoru Sadəddin Korkutun daha öncə şirkətdə işdən azad edilmiş yüksək vəzifəli şəxsin şikayəti əsasında saxlanıldığı bildirilir. Şirkətdən qeyd ediblər ki, "Petkim" neft-kimya kompleksinin yeni baş direktoru vəzifəsinə Anar Məmmədov təyin edilib: "Apreldən "SOCAR Turkey Energy"də davam edən islahatlar çərçivəsində şirkətin digər yüksək vəzifəli əməkdaşları da vəzifələrindən azad olunublar.
SOCAR-ın mətbuat xidməti və ictimaiyyətlə əlaqələr şöbəsinin rəisi Nizaməddin Quliyev "APA-Economics"ə açıqlamasında deyib ki, S. Korkut dünən tutduğu vəzifədən azad olunub və onu SOCAR-ın Yunanıstandakı törəməsinin ("SOCAR Greece") rəhbəri işləmiş Anar Məmmədov əvəzləyib.
N. Quliyev əlavə edib ki, "SOCAR Turkey Energy" şirkətində baş verən kadr islahatları çərçivəsində işdən çıxarılmış başqa rəhbər vəzifəli şəxslər də var: "Onlardan birinin şikayəti əsasında "Petkim Petrokimya Holding A.Ş."nin sabiq baş icraçı direktoru Saadettin Korkut hüquq-mühafizə orqanları tərəfindən saxlanılıb".
