Şirvanda güclü partlayış baş verib. Trend-in məlumatına görə, Müdafiə Sənayesi Nazirliyinin Şirvan şəhərində yerləşən "Araz" zavodda partlayış olub.
Hadisə şahidlərinin Trend-ə verdiyi məlumata görə, partlayış zavodda deyil, müəssisənin hazır məhsullar anbarında baş verib. Partlayış ərazisində yanğın baş verib. Güclü partlayışlar hələ davam etdiyindən əraziyə yanğınsöndürən maşınlar yaxınlaşa bilmir. Zavodun işçiləri və yaxınlıqdakı sakinlər ərazidən təxliyə olunub.
Baş vermiş hadisə ilə əlaqədar yerli səhiyyə müəssisələrinin səyləri səfərbər olunub. Səhiyyə Nazirliyinin mətbuat xidmətindən Trend-ə verilən məlumata görə, əlavə olaraq hadisə yerinə Təcili Təxirəsalınmaz Tibbi Yardım Xidməti tərəfindən 2 həkim briqadası (travmatoloq, reanimatoloq və s.) artıq göndərilib və 3 həkim briqadası hazırda göndərilməkdədir.
Hadisə nəticəsində zərərçəkənlərə zəruri tibbi yardım təqdim edilir.
Baş vermiş hadisədə xəsarət alanlara tibb yardımın göstərilməsi səhiyyə naziri Oqtay Şirəliyevin şəxsi nəzarətinə götürülüb.
Trend-in əldə etdiyi məlumata görə, partlayış hərbçilər silah götürmək məqsədilə zavoda daxil olarkən baş verib. Hadisə nəticəsində yaralananların hamısı hərbçilərdir. Onların hamısı yanıq xəsarətləri ilə xəstəxanaya yerləşdirilib.
Baş vermiş partlayışda ölənlərin olduğu ehtimal da edilir. Səhiyyə Nazirliyindən Trend-ə verilən məlumata görə, hadisə nəticəsində 20 nəfər xəsarət alıb.
Hadisə ilə bağlı Müdafiə Sənayesi Nazirliyi də məlumat yayıb. Nazirliyin məlumatında deyilir: "26 iyul 2016-cı il tarixində saat 15:35 radələrində Müdafiə Sənayesi Nazirliyinin Şirvan ”Araz” zavodunda hadisə baş verib.
Baş vermiş hadisə ilə bağlı Müdafiə Sənayesi Nazirliyi tərəfindən rəsmi məlumat veriləcək".
Onu da qeyd edək ki, ötən il iyulun 6-da Şirvanda Müdafiə Sənayesi Nazirliyinin "Telemexanika” zavodunda partlayış baş vermişdi. Hadisə nəticəsində 1 nəfər ölüb, 19 nəfər yaralanıb.
Partlayış mərmi saxlanc anbarında baş verib, nazir hadisə yerindədir
APA-nın yaydığı məlumata görə, Şirvanda partlayış mərmi saxlanc anbarında baş verib. Hazırda ərazidə ara-sıra partlayış səsləri eşidilir. Lakin intensiv partlayışlar artıq yoxdur. Partlayış baş verən ərazidə tüstülənmə var. Hadisə zamanı partlayan mərmilər yaxınlıqdakı ərazilərə səpələnib.
Müdafiə sənayesi naziri Yavər Camalov, fövqəladə hallar nazirinin müavinləri Faiq Tağızadə, Etibar Mirzəyev, baş prokurorun birinci müavini Rüstəm Usubov hadisə yerindədir. Şirvan şəhər İcra Hakimiyyətinin başçısı Mərdan Camalovun hazırda məzuniyyətdə olduğu bildirilir.
Hadisə baş verən ərazi yaşayış evlərindən aralıda yerləşir. Buna görə yaşayış evlərində heç bir evakuasiya həyata keçirilməyib. Lakin əraziyə toplaşmış mülki şəxslər təhlükəsizliklə bağlı ərazidən uzaqlaşdırılıblar.
FHN məlumat yaydı
Fövqəladə Hallar Nazirliyi (FHN) də partlayışla bağlı məlumat yayıb. APA-nın nazirliyin saytına istinadən verdiyi məlumata görə, bu gün saat 15:30 radələrində Fövqəladə Hallar Nazirliyinin "112” qaynar xəttinə daxil olmuş məlumata əsasən, Müdafiə Sənayesi Nazirliyinin Şirvan şəhərində yerləşən "Araz” zavodunda partlayış baş verib. Dərhal nazirliyin müvafiq qüvvələri hadisə yerinə cəlb olunub, zəruri tədbirlərin görülməsinə başlanılıb.
Hazırda aidiyyəti orqanların qüvvələri ilə birlikdə ərazidə müvafiq təhlükəsizlik tədbirlərinin görülməsi, hadisənin nəticələrinin aradan qaldırılması istiqamətində işlər həyata keçirilir.
Səhiyyə naziri də Şirvana getdi
Şirvanda baş vermiş hadisədə xəsarət alanlara baş çəkmək məqsədilə səhiyyə naziri Oqtay Şirəliyev də Şirvana yola düşüb.
Səhiyyə Nazirliyinin mətbuat xidmətindən Trend-ə verilən məlumata görə, hadisə nəticəsində hələlik 20 nəfər xəsarət alıb, ölən yoxdur. Xəsarət alanlardan 2-nə ambulator yardım göstərilib. Hazırda 18 nəfər xəstəxanada müalicə olunur. Onlar travma və yanıq xəsarətləri alıblar. Xəsarətlərin alanların vəziyyətləri ağır, orta ağır, bəzilərinin vəziyyəti isə kafi qiymətləndirilir. Xəsarət alanlardan 1 nəfəri reanimasiya şöbəsindədir. Partlayış nəticəsində öləmlərin olması ilə bağlı hələ ki məlumat yoxdur.
Yaralılara yüksək səviyyədə tibbi yardım göstərilir. Ərazidə təcili tibbi yardım briqadalarının işləməsində də heç bir problem yoxdur.
Nazirlik partlayış səslərinin səbəbini açıqladı
Müdafiə Sənayesi Nazirliyi Şirvanda zavodda baş verən partlayışla bağlı məlumat yayıb. Nazirlikdən Trend-ə verilən məlumata görə, iyulun 26-da saat 15:35 radələrində Müdafiə Sənayesi Nazirliyinin Şirvan ”Araz” zavodunda hadisə baş verib.
Hadisə nəticəsində ölən yoxdur, 11 nəfər yüngül formada xəsarət alan var. Xəsarət alanlara tibbi yardım göstərilir və hazırda həkim nəzarətindədirlər.
Fasilələrlə yaranan partlayış səslərinin səbəbi utilizasiya olunması üçün Müdafiə Nazirliyi tərəfindən sifariş olunan 1500 ton məmulatdan qalan 146 tonda yaranan qığılcımlardır.
Müdafiə sənayesi naziri Yavər Camalov hadisə baş verdiyi andan etibarən Şirvan şəhərinə yola düşüb. Hazırda hadisə yerindədir.
Hadisənin baş vermə səbəbləri ilə bağlı məlumatlar araşdırmalardan sonra veriləcək.
"Şirvandakı hadisə zamanı hərbi qulluqçular arasında xəsarət alan olmayıb”
"Bu gün Müdafiə Sənayesi Nazirliyinin Şirvan şəhərindəki "Araz” zavodunda baş verən hadisə zamanı Müdafiə Nazirliyinin hərbi qulluqçuları arasında xəsarət alanlar olmayıb”. Bunu isə APA-nın sorğusuna cavab olaraq Müdafiə Nazirliyindən bildiriblər.
