M.Quliyev deyib ki, son vaxtlar MTN-də boşalan vəzifələrə hələ təyinatlar olmayıb: "Əksinə, biz fikirləşirik ki, nazirlikdə ixtisarlar davam edəcək, yenidən təşkil olunma aparılacaq. Çünki MTN əməkdaşları sayca az olmalı və işini operativ şəkildə qurmalıdır”.
M.Quliyev bildirib ki, ixtisarlar artıq olub: "Mənim işlədiyim müddətdə 250-dən artıq yararsız əməkdaşlar MTN-dən xaric olunub. MTN-lə bağlı aparılan istintaq üzrə Respublika Prokurorluğunda cinayət işi qaldırılıb və davam etdirilir. Adı cinayət işində keçənlər cinayət məsuliyyətinə cəlb edilərək həbs olunur. Bu iş davam etdirilir, hər bir cinayət etmiş şəxs layiqincə qanun qarşısında cavab verəcək".
MTN-in bundan sonrakı siyasəti haqqında danışan M.Quliyev bildirib: "Yolumuz birdir, Ümummilli Lider Heydər Əliyev kursudur. Möhtərəm Prezident İlham Əliyev bu yolu uğurla davam etdirir və biz də Respublikamızın təhlükəsizliyini təmin edəcəyik".
Mədət Quliyev deyib ki, Azərbaycan 1988-1993-cü illərdə böhran içində yaşayırdı. Ölkəni o zamankı böhranlı vəziyyətdən ulu öndər Heydər Əliyev çıxardı. M.Quliyev bildirib ki, qaz, işıq, çörək, yanacaq yox idi, insanlarımız çox ağır bir şəraitdə yaşayırdı: "O vaxtlar ümid də yox idi ki, Azərbaycan o böhranlı vəziyyətdən çıxa biləcək”.
M.Quliyev deyib ki, o zaman səriştəsiz Azərbaycan Xalq Cəbhəsi hakimiyyətinin siyasəti nəticəsində Gəncədə qardaş qırğını baş verdi: "O zaman xalqımız yalnız ulu öndər Heydər Əliyevin Azərbaycanı bu kritik vəziyyətdən çıxara biləcəyini bilərək meydanlara çıxdı, Heydər Əliyevin Azərbaycana gəlməsini tələb etdilər. O zaman hər kəs cəsarət edib Azərbaycana gəlməzdi, çünki burada silahlı dəstələr hakimiyyət üstündə mübarizə aparırdılar, müəyyən kəşfiyyat orqanlarına xidmət edirdilər. Amma ulu öndər öz xalqını belə bir anda tək qoymadı, özünün də, ailəsinin də həyatını təhlükə altına ataraq Bakıya gəldi”.
M.Quliyev vurğulayıb ki, ümummilli lider qısa bir zamanda vəziyyəti analiz etdi, Gəncəyə getdi, orada ağır görüşlər keçirdi və ondan sonra Bakıya qayıdaraq tanıdığı, bildiyi adamları vəzifəyə çağırdı və Azərbaycanı o böhran vəziyyətindən çıxardı: "Bu gün Azərbaycan Respublikası şərəfli bir yol keçir. Azərbaycan dünyada tanınır. Azərbaycanı inkişaf etmiş dövlətlərlə müqayisə edirlər. Bu gün möhtərəm Prezident İlham Əliyev ulu öndərin siyasətini uğurla davam etdirir. Respublikamız kiçik dövlət olmasına baxmayaraq dünyada öz sözünü deyir. Biz azərbaycanlılar xöşbəxtik ki, Respublikamızın bu qüdrətini gördük”.
