Sosial şəbəkələrin verdiyi və zaman-zaman bir sıra pərdəarxası qüvvələrin öz rəqiblərinə qarşı istifadə etdiyi "imkanlar silahı" bu dəfə Salyanın icra başçısı Tahir Kərimova qarşı yönəldi. İlk olaraq sosial şəbəkə səhifələrindən çıxdı. Maraqlı KİV orqanları da böyük həvəslə tirajlamağa başladı.
Təbii ki, buna sadəcə maraqdan qoşulanlar da oldu. İşin arxasında, sözsüz ki, qərəzli əllərin olduğu aşkar görünür və onlar ilk mərhələdə əgər Tahir Kərimovu ləkələməyi qarşılarına məqsəd qoymuşdularsa, qismən buna nail oldular. İndi çoxları təsir altına düşüb ki, başçı belə fotonu niyə çəkdirməlidir, deməli yekəxanadır, insanları saymır və sair. Ancaq unutmayaq ki, silinməyən ləkə yoxdur, elə Tahir Kərimova da bu məsələdə atılan ləkə silinəcək. Tək bir mətləb açılan kimi: Tahir Kərimov həmin fotonu rayonda gül bayramında çəkdirib və rəsmi verilən açıqlamaya görə, həmin tədbir konkret ssenari ilə keçirilib. Həmin ssenarinin bir fraqmenti də bu olub ki, bütün iştirakçılar həmin "gül tunelindən" keçsinlər. Beləliklə, oradan keçən tək Tahir Kərimov yox, çoxları olub. Əgər həmin tədbirin bütün şəkilləri və fotoları yayılsa, Tahir Kərimova qarşı bir oyun qurulduğuna hamı əmin ola bilər.
Digər tərəfdən, yazılı media qanunlarına görə, hər hansı bir sözü, ya cümləni ümumi kontekstdən çıxarmaq qərəzli münasibətin, böhtan atmaq niyyətinin ifadəsi kimi qəbul oluna bilər.Məsələ, eynilə, bir prosesin içindən hansısa anın fotosunu yaymağa da aiddir. Aşkar görünür ki, Tahir Kərimova qarşı qərəz, böhtan atma, imici ləkələmə formasında kampaniya quraşdırılıb və icra başçısının məhkəməyə müraciət etməsi üçün tam əsaslar var. Axı Gül bayramından - çəkildiyi tarixdən aylar ötəndən sonra bu şəklin ortaya atılmasının əsl motivi hər kəs üçün maraqlıdır...
