Hüquq-mühafizə orqanlarının Nardaran qəsəbəsində əməliyyatı davam edir. APA-nın məlumatına görə, qəsəbənin giriş və çıxışlarında qoyulmuş polis postları hələ götürülməyib. Qəsəbəyə daxil olan və çıxan hər kəs yoxlanılır. Nardaran sakinlərinin qəsəbəyə daxil olmasına heç bir məhdudiyyət yoxdur. Nardaranın mərkəzi meydanlarına Daxili Qoşunların qüvvələri nəzarət edir.
Qəsəbə sakini Natiq Kərimov APA-ya bildirib ki, hazırda Nardaranda sabitlik hökm sürür: "Polis öz işini görür, yerli camaat da öz işini. Məlum hadisələrlə əlaqədar başlanmış cinayət işi üzrə bəzi qəsəbə sakinləri istintaqa aparılıb. Onlardan bəziləri sonradan sərbəst buraxılsa da, bir neçə nəfər barəsində isə inzibati cəza tətbiq edilib”.
N. Kərimov həmçinin qeyd edib ki, qəsəbəyə elektrik enerjisinin verilişi hələlik bərpa olunmayıb: "Hazırda sayğacların yenilənməsi işi aparılır. Ümid edirik ki, tezliklə elektrik enerjisinin verilişi bərpa ediləcək".
Nardaran qəsəbəsində yeni qaz sayğaclarının quraşdırılması işləri davam etdirilir. Bunu isə Trend-ə "Azəriqaz” İstehsalat Birliyinin İctimaiyyətlə əlaqələr şöbəsinin rəisi İbrahim Kərbalayev deyib.
İ.Kərbalayev bildirib ki, indiyə qədər 300-dən artıq mənzildə yeni sayğaclar quraşdırılıb: "Orada 2 minə yaxın abonent var. İşlər məhəllə-məhəllə davam etdirilir. Həm mənzillərə texniki baxışlar keçirilir, həm təbii qazdan qeyri-qanuni istifadə hallar aşkarlanan mənzillərdə təmizləmə işləri aparılır, abonentlərlə yenidən müqavilələr imzalanır. Bu işlər yekunlaşandan sonra təbii qazın verilişi təmin ediləcək”.
İ.Kərbalayev vurğulayıb ki, qəsəbədə qaza görə yaranmış debitor borcu da ödənilməlidir.
Nardaran qəsəbəsində telefon rabitəsinin bərpa edilməsi ilə bağlı isə Bakı Telefon Rabitəsi İstehsalat Birliyindən Trend-ə bildirilib ki, telefon rabitəsinin dayanması elektrik enerjisinin kəsilməsi ilə bağlıdır. Qəsəbəyə elektrik enerjisi verildikdən sonra telefon rabitəsi də bərpa olunacaq.
Nardaranda silah-sursat tapıldı
Trend Daxili İşlər Nazirliyinin saytına istinadən məlumat verir ki, dekabrın 7-də polis əməkdaşları tərəfindən Sabunçu rayonunun Nardaran qəsəbəsində məişət tullantıları yığılmış yerdən silah-sursat tapılıb. 1 ədəd "Makarov” tipli tapança, 1 ədəd "Vinçester” markalı tüfəng və 13 ədəd patron tapılıb.
