"Günəşli" yatağının 10-cu özülündə baş verən yanğın nəticəsində itkin düşənlərin dünən axşamdan indiyədək aparılan axtarışı hələlik heç bir nəticə verməyib.
Trend-in məlumatına görə, bunu "Azneft” İstehsalat Birliyinin baş mühəndisi Balamirzə Ağarəhimov "Günəşli" yatağının 10-cu özülündə baş verən hadisə ilə bağlı son vəziyyətə aydınlıq gətirərkən deyib.
B.Ağarəhimov deyib ki, 26 nəfərin axtarışı üçün əlavə helikopterlər cəlb edilib. Həmin şəxslərin 3-nün axtarışı üçün "Neft daşları"nda, 23-nün axtarışı üçün isə "Günəşli" ərazisində işlər aparılır.
B.Ağarəhimov qeyd edib ki, axtarışlara əlavə olaraq, Fövqəladə Hallar Nazirliyinin 4 helikopteri, Sərhəd Mühafizə Xidmətinin 2 helikopteri, 5 gəmisi cəlb edilib.
Onun sözlərinə görə, "28 may" NQCİ-nin ərazisində axtarış üçün dalğıc qrupunun əvəzinə gəmidən sualtına xüsusi aparatlar buraxılıb, axtatış həmin aparatlarla apalır.
B.Ağarəhimov bildirib ki, yanğının söndürülməsi üçün avadanlıqlar artıq meydançanın üzərinə yerləşdirilib: "Tikinti-quraşdırma idarəsinin əməkdaşları həmin avadanlıqların birləşdirilməsi işini davam etdirirlər. Bu işlərin axşama qədər yekunlaşması nəzərdə tutulub".
Yanğının söndürülməsi üçün xarici mütəxəssislər
"Günəşli" yatağının 10-cu özülündə baş verən yanğının aradan qaldırılması üçün xarici mütəxəssislər cəlb edilib. Onlar artıq 10-cu özüldə, platformanın üzərindədirlər. Balamirzə Ağarəhimov qeyd edib ki, yanğının söndürülməsi üçün işlər davam etdirilir: "Xarici mütəxəssislər özülün sahəsinə qalxıblar, onlar vəziyyəti görüb qərar verməlidirlər".
B.Ağarəhimov əlavə edib ki, bu gün səhərdən indiyədək aparılan axtarışlar zamanı yanğın nəticəsində itkin düşən neftçilərdən heç birinin cəsədi aşkarlanmayıb: "Yanğın isə ilk gündəkinə nisbətən xeyli zəifləyib".
Qaz quyuları yanır
Balamirzə Ağarəhimov deyib ki "Günəşli" yatağının 10-cu özülündə ilkin ehtimalla yanan qaz quyularıdır. B.Ağarəhimov deyib ki, yanğın hazırda quyularda gedir: "İlkin ehtimalla yanan qaz quyularıdır".
B.Ağarəhimov deyib ki, yanğının söndürülməsi üçün yeni gəmi cəlb edlilib. Onun üzərində su vurma təzyiqi 1500-2000 kub metrə qədər olan su nasosunun quraşdırılması nəzərdə tutulur.
Hadisəyə əməyin mühafizəsi, təhlükəsizlik qaydalarının pozulması səbəb olmayıb
Baş mühəndisin sözlərinə görə, dekabrın 4-də "SOCAR-ın "Günəşli" yatağındakı 10-cu dərin dəniz özülündə baş verən hadisəyə əməyin mühafizəsi, təhlükəsizlik qaydalarının pozulması səbəb olmayıb.
20 ildən çoxdur ki, Azərbaycanda fəaliyyət göstərən BP-nin təcrübəsində belə halın baş verməməsinin səbəbi kimi bu şirkətin infrastrukturunun SOCAR-ın platformalarındakı infrastrukturdan möhkəm olması ilə bağlı sosial şəbəkələrdəki rəylərə münasibət bildirən baş mühəndis deyib ki, BP təkcə Azərbaycanda deyil, dünyanın bir çox yerlərində çalışır: "BP və onun təhlükəsizlik qaydaları ilə əlaqədar elə hadisələr baş verib ki, bu şirkət milyardlarla dollar itirib. Hətta insan tələfatı da olub. Bəli, təsdiqləyirəm ki, Azərbaycanda olmayıb. "Günəşli"dəki hadisə əməyin mühafizəsi qaydalarının, təhlükəsizlik qaydalarının pozulması ilə əlaqədar baş verməyib. Mən bir neçə gün ərazində aparılmış araşdırmaların ilkin nəticələri haqqında danışdım. Söhbət həddən artıq yüksək sürətli küləyin olmasında gedir".
Baş mühəndis deyib ki, SOCAR əməyin təhlükəsizliyi ilə bağlı davamlı tədbirlər görür. Ümumilikdə SOCAR-da təhlükəsizliklə əlaqədar, əməyin mühafizəsi ilə əlaqədar görülən işlər davamlı bir prosesdir. Yəni, bu iş dünən də görülürdü, bu gün də görülür və sabah da mütləq görülməlidir. Əgər görülməsə, siz özünüz illərə nəzər yetirsəniz, 5, 10, 15 il bundan qabaq vəziyyətlə siz nə qədər inkişaf olduğunu öz gözlərinizlə görə bilərsiniz. Təkmilləşdirməyə həmişə ehtiyac var".
Həlak olan neftçilər dəfn olunub
"Günəşli” yatağındakı 10 saylı özüldə baş vermiş qəza nəticəsində həlak olan neftçilər Mayılov Samir Cahangir oğlu və Mahmudov Ağa İzzət oğlu bu gün dəfn olunublar. Trend RTV-ə istinadən məlumat verir ki, 31 yaşlı S.Mayılov Qubanın Alpan, 47 yaşlı A.Mahmudov Xaçmazın Köhnə Xudat kənd qəbiristanlığında torpağa tapşırılıb.
Dəfn mərasimlərində SOCAR-ın, rayon icra strukturlarının nümayəndələri, neftçilərin yaşadığı ətraf kəndlərin sakinləri iştirak ediblər.
Mərhum A.Mahmudovun 14 və 17 yaşlarında iki oğul övlad atası olub. O, 15 ildən çox idi ki, neftçi kimi çalışırdı. Neftçi S.Mayılov isə 2004-cü ildən neftçi kimi fəaliyyət göstərib. Mərhumun 8 və 9 yaşlarında iki övladı var.
