Ermənistanın panorama.am saytı Azərbaycan saytlarından birinə istinadən, guya "İslam dövləti” terrorçu təşkilatının paylaşdığı deyilən video yayıb. Videoda azyaşlı bir oğlan uşağı şirin uşaq ləhcəsilə azərbaycan dilində ataları "dovşan kimi” evdə oturmamağa, "cihad” etməyə çağırır. Nədən danışdığını anlamayan, hansı təhlükənin içinə atıldığını dərk etməyən azyaşlının azərbaycanlı olduğuna sözümüz yoxdur. Bəllidir ki, İŞİD bəlasının ortaya çıxdığı ilk dönəmlərdə ölkəmizdən nələrəsə aldanaraq bu yırtıcı dəstəsinə qoşulanlar oldu. Hətta deyilənə görə, hər yoldan çıxarılan şəxsə görə külli miqdarda qazanc götürən insanlar da oldu. Təbii, burada insanların ən zəif yerindən – din amilindən geninə-boluna istifadə edildi. Lakin faktdır ki, ölkədə ən yüksək səviyyədə bu halların qarşısını alan qərarın verilməsilə bu qorxulu prosesin qarşısına zamanında sipər çəkildi. Məsələnin ölkə rəhbərliyinin və hüquq-mühafizə orqanlarının hələ də diqqət mərkəzində saxlanmasının ən böyük sübutu isə elə bu günlərdə Nardaran ətrafında yaşananlardır.
Təbii, buna qədər hansısa qeyri-leqal yollarla ölkədən çıxıb gedənlərin bu başkəsən qrupuna qoşulması və azərbaycanlı körpənin bu psixologiya ilə böyüməsi ürəkağrıdan faktdır. Lakin bu yalnız bizim ürəyimizi ağrıdır, erməninin isə əlinə fürsət verir ki, Azərbaycanın adı İŞİD-lə bir sırada hallansın. Əcəba, bu haylardan bir soruşan gərək, məgər ASALA, "Daşnaksütyun” İŞİD-dən azmı təhlükəlidir? Yoxsa, İŞİD-in işğalçı mahiyyətindən fərqli olaraq, Azərbaycan torpaqlarını ələ keçirmək üçün heç baş kəsməmisiz? Xocalıda qandonduran qətliamınız necə, İŞİD-in əməllərindən çoxmu fərqlənir? Burada insanların, hətta meyitlərin başına açdığınız vəhşiliklər dünyanı şoka salmamışdımı? İŞİD kəllə alırsa, siz baş dərisini soyursuz, eyni şey deyil yoxsa? Hətta türk milləti sizlərin elə işgəncə üsulları ilə üzləşib ki, onlar heç İŞİD-in ağlına gəlmir. O halda maraqlıdır, siz haylar kimə və nəyi sübut etmək istəyirsiz?
Bəli, ABŞ-dan, Britaniyadan, Fransadan, Rusiyadan... olduğu kimi, Azərbaycandan da bu mənfur dəstənin aldadıcı-təhlükəli ideologiyasına uyaraq onun sıralarına qoşulanlar olub və hələ də can atan bədbəxtlər tapılır. Lakin günün günorta çağı parlamentində qətliam törədilən, başqasının torpaqlarına sahib olmaq üçün qoca, qadın, uşaq demədən hər cür vəhşiliyə əl atan bir toplum nədən başını başlara qoşub İŞİD-ə pis gözlə baxır? Mahiyyətiniz bir deyilmi?
Samirə Səfərova
