Yalan və şantaj üsullarla işləyən media orqanları(?) xüsusi monitorinq nəzarətinə alındı

Tarix: 21.11.2015 / 02:51
Bölmə: Gündəm

Mətbuat Şurası geniş müzakirə keçirdi

Əflatun Amaşov: "Təəssüflə qeyd etmək lazımdır ki, bəzi KİV-lər dəqiqləşdirilməmiş informasiyalar yayır"

Vüqar Səfərli: "Təklif edirəm ki, xüsusi monitorinq qrupu yaradılsın"

Dünən Mətbuat Şurasının təşəbbüsü ilə "Media və məsuliyyət: mövcud durum və perspektiv vəzifələrə baxış" mövzusunda "dəyirmi masa" keçirildi. Tədbirdə qəzet və sayt redaktorları iştirak edirdilər. Toplantıda son günlər bəzi media orqanlarının, əsasən də internet informasiya resurslarının bir sıra dövlət qurumları ilə bağlı məlumat və şərhlərinin cəmiyyətdə yaratdığı qeyri-müəyyənlik müzakirə edildi.

Tədbiri açan Mətbuat Şurasının sədri Əflatun Amaşovun sözlərinə görə, Azərbaycan mətbuatı ölkənin ictimai-siyasi həyatında baş verən hadisələrə hər zaman həssas yanaşıb: "Ötən yay təmas xəttində baş verən hadisə zamanı, həmçinin bu il Milli Məclisə keçirilən seçkilər zamanı öz vəzifələrini layiqincə yerinə yetiriblər. Bir çox məqamlarda öz həssaslıqlarını nümayiş etdiriblər. Amma bir çox mətbuat orqanları bu prosesdən kənara çıxıb. Bizim apardığımız araşdırmalar zamanı da bunlar ortaya çıxdı. Bu zaman heç bir mənbəyə belə fikir verilmir. Bəzi KİV-lər isə bilərəkdən və ya bilməyərəkdən bu cür xəbərlər verir. Həmin saytların əsas məqsədi ajiotaj yaratmaqdır. Demək olar ki, bütün saytlar və xəbər portalları həmin xəbərləri yayır. Amma həmin məlumatla bağlı qurum 3 gündən sonra təkzib verir. Mətbuat Şurası bununla bağlı monitorinq qrupu yaradıb. Bir çox məsələlər araşdırılır. Hətta bununla bağlı tədbirlər də keçirilir. Bəzən bu cür hadisələrin qarşısını almağa nail ola bilirik. Çox təəssüf ki, bəzi dövlət qurumlarının mətbuat xidmətləri kütləvi informasiya vasitələrini vaxtında informasiya ilə təmin etmirlər".

Ə.Amaşovun fikrincə, son zamanlar bəzi KİV-lərdə Milli Təhlükəsizlik Nazirliyi və Rabitə və Yüksək Texnologiyalar Nazirliyində baş verən hadisələrlə bağlı təzadlı informasiyalar yayılır: "Son vaxtlar MTN ilə bağlı yayılan xəbərlər gedir. Başqa ölkələrdə də əgər bu cür hadisə baş versəydi, həmin ölkənin mediası kənarda qala bilməzdi. Bizim mətbuatımız da bu hadisələrdən kənar qalmadı. Belə ki, istər MTN, istərsə də Rabitə və Yüksək Texnologiyalar Nazirliyi ilə bağlı xəbərlər verildi. Mediamız bu işin öhdəsindən layiqincə gəldi. Onlar öz üzərlərinə düşən bütün öhdəlikləri yerinə yetirdi. Amma təəssüflər olsun ki, bu hadisələrlə bağlı düzgün məlumatlar yazmayan saytlar var. Təəssüflə qeyd etmək lazımdır ki, bəzi KİV-lər dəqiqləşdirilməmiş informasiyalar yayır. Baş verən olaylarla bağlı KİV-də yayılan xəbərlərdə diqqəti cəlb edən bir sıra hallar var. Populyar olmayan həmin saytlar bu xəbərlər vasitəsilə aypi yığırlar. Həmin saytlar məhz bu cür hadisələr zamanı aktiv olmağa başlayır. Bəzən ciddi saytlar belə həmin xəbərlərdən istifadə edir. Bu hal Mətbuat Şurasını daha çox narahat edir. Bu proses hüquqi yolla həll oluna bilər. Amma biz istəyirik ki, bu, hüquqi müstəviyə çatmadan Mətbuat Şurasında həll olunsun".

"APA Holdinq"in rəhbəri Vüsalə Mahirqızı çıxış edərək bildirdi ki, bu günə kimi media bir çox dövlət qurumlarına ictimai nəzarəti həyata keçirib: "Media bircə MTN-ə ictimai nəzarət edə bilmirdi, onun da nəticəsi ortadadır. Əgər ölkədə ictimai şəxs barədə həbs-qətimkan tədbiri seçilibsə, mətbuat xidməti bunu rəsmi açıqlamalıdır. Xəbər varsa, yazılmalıdır. Dövlət sirri olan məlumatın mediaya necə çıxması dövlətin araşdırmalı olduğu məsələdir. Bu tip məlumatlar xırda saytlara ötürülür, nüfuzlu media qurumları isə onu olduğu kimi götürüb verirlər. Sonra da deyirlər ki, istinad etmişəm, məsuliyyəti mənim deyil. Belə olmalı deyil, bir redaktor başqa saytdan məlumat götürüb verirsə, onun məsuliyyətini bölüşməlidir. Bəzən hansısa sayt məlumatı araşdırmadan tirajlayır, digər xəbər saytları da həmin xəbəri yayır. Bu doğru deyil. Əgər baş verənlər xəbərdirsə, mütləq yazılmalıdır. Azərbaycan Prezidenti İlham Əliyevlə sonuncu görüşümüzdə də bu məsələlərə toxunduq".

Tədbirdə çıxış edən Jurnalistlərin Həmkarlar İttifaqının sədri, Azərbaycan Mətbuat Şurasının sədr müavini Müşfiq Ələsgərlinin sözlərinə görə, bəzi KİV-lərdə qarşı tərəfin mövqeyi nəzərə alınmır: "Qərəzli məlumatların yayılmasına maraq var. Son vaxtlar yayılan informasiyaların media aləminə heç bir aidiyyəti yoxdur. Bəzi "reket" saytlar müxtəlif şantaj xarakterli məlumatları tirajlamaqla məşğuldur. Hadisələrə etik media kontekstindən qiymət veriləndə məlum olur ki, burada heç bir etik prinsipə əməl olunmur. Bəzən bir sıra saytlar fəxrlə yazır ki, biz filan nazirin filan vaxtı azad olunacağı barədə məlumatı yaymışıq. Açıb həmin məlumata baxırsan görürsən ki, bu cür məlumatlar qərəzli xarakter daşıyır. Bu əməllər yığışdırılmalıdır. Əgər qanunun sərt üzü göstərilsə, o zaman xeyli media nümayəndəsi məsuliyyətə cəlb oluna bilər. Son vaxtlar dəb düşüb ki, bəzi "reket" saytlar bir neçə adlarla fəaliyyət göstərir. Hər hansı məlumatı pul qarşılığında saytdan çıxardıqdan sonra dərhal digər saytlara da qoyulur və oradan da çıxarılması üçün pul tələb olunur".

"Xalq Cəbhəsi" qəzetinin baş redaktoru Elçin Mirzəbəylinin fikrincə, dəqiqləşdirilməmiş, şantaj xarakterli məlumatlar yayan saytın işində cinayət əməli varsa, hüquqi addımlar atılmalıdır: "Belə əməllərlə məşğul olanlar şəbəkələşmiş formadadırlar. Ona görə də onların üzərinə fərdi formada getmək lazım deyil. Onların üzərinə kütləvi şəkildə getmək lazımdır. Bu günə qədər belə qrupların əməlinə diqqət yetirilməməsi onların himayə olunması ilə bağlıdır. Bu saytlar təsadüfən peyda olmayıblar. Ola bilər ki, bu saytlar vaxtilə hansısa qurum tərəfindən himayə olunub. Belə saytların nüfuzlu şəxsləri necə şantaj etdiyinin şahidi olmuşam. Hətta özümə qarşı da olub".

"525-ci qəzet"in baş redaktoru Rəşad Məcid yalan məlumat yayan saytların adlarının açıqlanmasını təklif etdi. O bildirdi ki, həmin saytların adları açıqlanmalıdır və ciddi tədbirlər görülməlidir: "Reket" qəzetlər və saytlarla bağlı tədbirlər görülməlidir. Onların bəziləri Mətbuat Şurasının rəhbərliyini, üzvlərini, məmurları təhqir edir. Bunların fəaliyyətini dayandırmaq, qadağa qoymaq lazımdır. Qəzet köşklərinə baxırsan, onların qəzetləri öndədir. Belə olmamalıdır".

"Azərbaycan" qəzetinin baş redaktoru Bəxtiyar Sadıqovun sözlərinə görə, "reket" media qurumlarının aşkarlanmasında internet saytlara güzəşt edilib: "Biz dedik ki, həmin saytlar "qara siyahı"ya düşsə, onların ev alması mümkün olmayacaq. Biz ürəyiyumşaqlıq etdik. Amma bundan sonra Mətbuat Şurası monitorinq edib nəticəyə uyğun olaraq tədbir görməlidir. Bu gün tədbirdə iştirak edənlər də Şuranın imeilinə "reket" hesab etdiyi saytların adlarını yazıb göndərsin".

KİV DF sədri Vüqar Səfərlinin sözlərinə görə, hamı bilir ki, o saytlar kimlərdir: "Biz bu gün ciddi məsələnin həlli ilə bağlı yığışmışıq, amma bəziləri buna qeyri-ciddi yanaşır. Hamı bilir ki, o saytlar kimlərdir. Hamı danışır, heç kim ad çəkib özünü pis etmək istəmir. Əli müəllimin açıqlamasında qeyd olunduğu kimi bu işi Mətbuat Şurası tənzimləməlidir.

Təklif edirəm ki, xüsusi monitorinq qrupu yaradılsın və müəyyən vaxt ərzində bəlli saytlar monitorinq nəzarətinə götürülsün. Monitorinq keçirməlidir, nəticələr açıqlanmalıdır və onlara qarşı ciddi tədbirlər görülməlidir. Mənə rabitə sahəsində işləyən vəzifəli şəxslər zəng edib deyirlər ki, onlar şantaja məruz qalırlar. Hələ həbs edilməyən vəzifəlilərə saytlardan zəng edib deyiblər ki, sənin haqda MTN olayları ilə bağlı ciddi materiallar var. Biz görüşüb bu məsələni həll etməliyik. O adam görüşmədiyi üçün səhəri gün saytda onun şəkillərini MTN-də tutulanlarla yanaşı verib yazırlar ki, bu adamlar hələ də həbs edilməyib. Hamınız əzbər bilirsiniz ki, onlar kimdir və arxalarında kim dayanır. Əzbər bilirsiniz ki, kimlərə arxalanıb bunu edirdilər və hələ də davam etdirirlər".

Vüqar Səfərlinin təklifi çıxışçılar tərəfindən dəstəkləndi.

"Səs" qəzetinin baş redaktoru Bəhruz Quliyev isə yalan xəbər yayan saytları dövlətçilik mövqeyi ortaya qoymağa çağırdı. Bildirdi ki, belə hallar dövlətə və xalqa ziyan gətirirsə, ona dur demək lazımdır.

Sonra digər mətbuat nümayəndələri çıxış edərək öz fikirlərini bildirdilər. Elxan Şükürlü, Taleh Şahsuvarlı və başqaları çıxış etdilər.

Vidadi ORDAHALLI

DİGƏR XƏBƏRLƏR

Tarix: 30.10.2026 / 06:41

Yəhudilər erməni monastırına tüpürdülər

Tarix: 29.10.2026 / 17:00

Bir Millət, İki Dövlət, Bir Ürək: Türkiyə Cümhuriyyətinin 103-cü ildönümü münasibətilə İctimai Nəzarət Təşkilatının Təbrik Bəyannaməsi

Tarix: 28.10.2026 / 12:51

ROZA TÖREKULOVNA AYTMATOVANIN ƏZİZ XATİRƏSİNƏ

Tarix: 28.10.2026 / 08:35

Türkiyədəki “sərmayə olayı” Pasifik Holding-i də vurdu - aktivləri donduruldu

Tarix: 28.10.2026 / 06:26

Türkiyədə səs-küylü “Starlink əməliyyatı” - 85 nəfər saxlandı

Tarix: 27.10.2026 / 13:54

"Bakı bu cür beynəlxalq forumlar vasitəsilə mədəniyyətlərarası dialoqa mühüm töhfə verə bilər" - Ozodbek Nazarbekov

Tarix: 27.10.2026 / 13:30

Penitensiar Xidmətə yeni rəis təyin edildi

Tarix: 27.10.2026 / 10:28

Dubay məhkəməsi Rusiya neftinin satışından 700 milyon dollardan çox vəsaiti dondurub - işin içində azərbaycanlılar da var…

Tarix: 26.10.2026 / 06:58

Vuçiç seçkidə məğlubiyyətini rəsmən bəyan etdi

Tarix: 24.10.2026 / 08:38

Serbiyada etirazlar pik həddə - gənclər Vuçiçi devirməyə qərarlıdır

Tarix: 22.10.2026 / 15:01

44 günün fövqündə: milli iradənin və tarixi yaddaşın təntənəsi

Tarix: 20.10.2026 / 22:19

İran XİN sözçüsü Azərbaycana tövsiyə verməyə qalxdı - həm də insan haqları mövzusunda…

VİDEO

Tarix: 17.10.2026 / 17:10

Aydın Quliyev Mətbuat Şurasında seçkilərə qatılmamasının səbəblərini qurultayda açdı... - VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 02.11.2026 / 23:02

Bunu səfir Birol Akgünə açıq məktubum kimi də oxuya bilərsiniz - Aydın QULİYEV yazır...

Tarix: 29.10.2026 / 17:35

Məhkəmə hakimlərinin yeni "Etik Qaydaları"nda bir vacib məqam unuduldu...

Tarix: 29.10.2026 / 17:05

Ramiz Mehdiyevin təltiflərdən məhrum edilməsinin hüquqi mexanizmləri var...

Turizm regionlarımızın inkişaf mənbələrindən birinə çevrilir...