Sky News-un jurnalisti terrorçu qruplaşmaya könüllü kimi müraciət edib və təşkilatın üzvləri ilə görüşə bilib. Baki-xeber.com-un xəbərinə görə, onun gəldiyi nəticə bu olub ki, qruplaşma artıq könüllüləri Suriyaya getməyə təşviq eləmir, onlara öz ölkələrində teraktlar həyata keçirməyi tövsiyə edir. Bunun üşün isə onlara hər cür dəstək vəd edir. İŞİD üzvləri onu da deyiblər ki, Britaniyada artıq bir neçə üzvləri terakt törətməyə hazır vəziyyətdə əmr gözləyir.
Bu arada jurnalistin aşıqlamaları ortaya qorxunc nəticələr çıxarıb. Bəlli olub ki, təşkilat bir çox ölkələrdə fəaliyyətini genişləndirir. Jurnalist sosial şəbəkədə iki akkaunt açaraq elə görüntü yaradıb ki, guya bu səhifələr kişi və qadına məxsusdur və onlar yazışmaqla öz aralarında İŞİD-ə qoşulmağın yollarını müzakirə edirlər. Bu yazışma "kiberxilafətin” diqqətini cəlb edir və qruplaşmanın 21 yaşlı üzvü Cüneyd Hussein onlarla əlaqəyə girir. Vaxtilə haker olan Cüneyd hazırda cihadçıdır və Suriyada İŞİD-in informasiya və təşviqat bölümünə rəhbərlik edir. ABŞ Federal Təhqiqat Bürosu onu ilk növbədə məhv edilməli olan İŞİD rəhbərlərinin ilk beşliyinə daxil edib. Britaniyalı "könüllü”lərlə əlaqəyə eyni zamanda Husseynin arvadı, qadınları qruplaşmaya cəlb etməklə məşğul olan britaniyalı Salli Cons da girir.
Onlar əvvəlcə sözügedən "könüllü”lərin varlığını dəqiqləşdirmək üçün bir neçə yoxlama aparırlar. Bu arada jurnalist işinin öhdəsindən gəlir və onları inandırmağı bacarır. Tezliklə ona xəbər verirlər ki, Suriyaya getmək lazım deyil, çünki burda da "işləri” var. Husseyn onlara qrup yaratmaq, tərəfdarlar cəlb etmək, terror hadisələri törətmək üçün vəsait toplamaq və İŞİD-in Britaniya bölüyünü yaratmaq üçün təlimat göndərir.
Salli Cons "könüllü qız”a iki variant təklif edir: partlayış təşkil etmək, ya da kiminsə başını kəsmək! Yazışma nəticəsində o da məlum olur ki, İŞİD-in Şotlandiyada da terrorçuları var və hər an hansısa hadisə törədə bilərlər. Jurnalist həm də onu öyrənir ki, İŞİD 15 avqust tarixində - Britaniyanın Yaponiya üzərində qələbəsinin ildönümündə Londonda terakt hazırlayır və dərhal bu barədə polisi məlumatlandırır.
Hazırlanan teraktlar barədə daha çox informasiya əldə etmək məqsədilə jutnalist Şanlıurfaya da səfər edir və burada İŞİD üzvləri ilə görüşməyə nail olur. Burada o öyrənir ki, qrupun 4 ya 5 üzvü terakt törətmək üçün artıq Böyük Britaniyaya gedib.
Sky News-un xəbərinə görə, "könüllü”lərlə terrorçuların yazışması ötən həftəyə kimi davam edib. Salli Consun son mesajı isə bu sözlərdən ibarət olub: yerinə yetirin!
