Mətləb Salahov: “Baş verən müharibə İranla məhdudlaşmayacaq, daha dağıdıcı proseslər qarşıdadır”
“İran və İsrail arasındakı raket müharibəsi olduqca kritik həddə çatıb. İş o yerə çatıb ki, tərəflərdən birinin raket ehtiyatlarının tükəndiyi barədə artıq mətbuat yazmağa başlayıb. əslində bu gözləniləndir. Çünki hərbi qarşıdurma hava zərbələri ilə müşahidə olunur. Lakin məsələnin ən pis tərəfi budur ki, yaxın vaxtlarda ABŞ-ın da prosesə qoşulması ilə daha dağıdıcı müharibə fazasına keçilə bilər”. Bu barədə “Bakı Xəbər”-ə açıqlamasında jurnalist-ekspert Mətləb Salahov deyib. M.Salahov qeyd edib ki, artıq həm Donald Tramp administrasiyası, həm də İran rəhbərliyi arasında açıq söz müharibəsi başlanıb və bu proses istər-istəməz ABŞ-ı müharibəyə çəkməkdədir. M.Salahovun qənaətincə rəsmi Vaşinqton da İranla hərbi qarşıdrumaya meyllidir və bunun arxasında Yaxın Şərq üçün hazırlanan ciddi planları gerçəkləşdirmək istəyi dayanır. “Donald Tramp elan edir ki, İran dini liderinin gizləndiyi yeri bilirlər və ona qarşı əməliyyat keçirmək hər an baş verə bilər. Üstəlik İran rəsmiləri də bu gün elan etdilər ki, onlar D.Trampın təslim olmaq şərtlərini qəti qəbul edəsi deyillər. Sanki bilərəkdən müharibəni alovlandırmaq və bölgədəki digər dövlətləri də bu yanan ocağın içinə çəkmək istəyirlər. Açıq-aydın görünür ki, bu müharibə İranla məhdudlaşmayacaq. Görünən odur ki, Yaxın Şərq üçün yeni xəritə hazırlanıb və o xəritənin reallaşması üçün raketlər işə salınıb. Bölgənin dağıdıcı proseslər qarşısında olduğu qaçılmazdır”.
Namiq Quliyev
