“Başqa bir ölkənin nümayəndəsi gəlib bizə burada diqtə edə bilməz ki...”
Məlum olduğu kimi, “Sputnik-Azərbaycan”ın rus dili versiyasının redaktorları – Zülfiyə Qurbanova, Cəmilə Əfəndiyeva, Yelena Starostina və Gülzar Mustafayeva istefa verib. Buna redaktorlardan Azərbaycanın mövqeyinə qarşı materialın verilməsinin tələb edilməsi səbəb olub. Belə ki, redaktorlardan Müdafiə Nazirliyinin “Qisas” əməliyyatı ilə bağlı Azərbaycanın rəsmi mövqeyini təkzib edən Rusiya Müdafiə Nazirliyinin rəsmi bəyanatını vermək tələb edilib. Adıçəkilən redaktorlar isə bundan imtina edib və istefa ərizələrini yazaraq rəhbərliyə təqdim edib.
Müsahibimiz Gülzar Mustafayeva ilə bu məsələ ətrafında danışdıq.
- - Gülzar xanım, istefa ərizənizi rəhbərlik qəbul edib, yoxsa sizi fikrinizdən daşındırmağa çalışırlar ki, qayıdın?
- - Avqusun 4-də istefa ərizəmizi yazıb “Sputnik-Azərbaycan”ın yeni direktoru Vitali Denisova təqdim etdik. Sözsüz ki, o bizim istefa ərizəmizi qəbul edib. Bizim istefa ərizəmizi qəbul etməkdən başqa çarəsi də yox idi. Avqustun 5-də işə çıxmamışıq.
- - Sizdən Müdafiə Nazirliyinin “Qisas” əməliyyatı ilə bağlı Azərbaycanın rəsmi mövqeyini təkzib edən Rusiya Müdafiə Nazirliyinin rəsmi bəyanatını vermək tələb edilib, lakin siz bundan imtina edib istefa vermisiniz. Bu ilk hal idi, yoxsa əvvəllər də analoji tələblər olurdu? Sizdən Azərbaycanın mövqeyinə əks mövqe yaymağınız tələb olunurdu?
- - Əvvəllər də bizə Azərbaycanın əleyninə, dövlətçilik mövqeyimizə, maraqlarımıza zidd materiallar təqdim ediləndə biz buna etiraz edirdik və onlarla mübahisə edib o materialların yayılmasına imkan vermirdik. Amma bu dəfə direktor çox sərtliklə tələb etdi ki, Azərbaycanın mövqeyinə zidd material yayılsın. Bundan sonra istefa barədə qərara gəldik. Çünki artıq bu cür tələblərə dözmək istəmədik. Direktor yenidir deyə özünü rəhbər kimi göstərmək istəyirdi. Biz başa düşdük ki, daha bu halla mübarizədən yorulduq.
- - Belə görsənir ki, dördünüz də bu qərara birdən-birə gəlməmisiniz?
- - Bəli. Bizim mübarizəmiz çoxdan idi ki, davam edirdi. Biz bu quruma redaktor təyin ediləndən sona qədər Azərbaycanın maraqlarını müdafiə etmək işi ilə məşğul olduq, bu istiqamətdə mübarizə apardıq. Amma iş yerimizi ona görə tərk etmirdik ki, biz getsək və yerimizə Rusiya yönümlü adamlar gəlsə anti-Azərbaycan mövqeli materiallar çox olacaq, qətiyyən bunu istəmirdik. O üzdən burada qalıb daxili mübarizəmizi aparırdıq. Bizim üçün hər şeydən əvvəl Azərbaycanın milli dövlətçilik maraqlarının müdafiəsidir ki, biz həmişə bu yolda olduq.
- - Dördünüzün də bu addımınız sosial şəbəkələrə geniş müzakirə olundu və sizin hərəkətiniz, etirazınız çox yüksək səviyyədə qarşılandı. Bu dəstək sizə necə təsir etdi?
- - Əlbəttə, çox xoşdur ki, ictimaiyyətdən, sosial şəbəkə istifadəçilərindən, həmkarlarımızdan belə dəstək gördük. Biz bu addımı atamda bunun bu qədər rezonans doğuracağını düşünmürdük. Bu dəstək adamı doğrudan da çox kövrəldir, eyni zamanda qol-qanad verir. Çox sağ olsun dostlar, həmkarlar bizimlə maraqlanırlar, kömək təklif edirlər. Allaha şükür, bir-iki dənə iş təklifi də oldu. Bir az dincələk, fikirlərimizi bir yerə toplayaq və sonra işimizi davam etdirməyə başlayaq.
- - Səhv etmiriksə, istefa edənlərdən biri də milliyətcə rusdur. Yelena Starostina necə oldu ki, sizinlə həmrəylik nümayiş etdirdi?
- - Bəli, o etnik rusdur. Lakin etnik rus olsa da, özünü azərbaycanlı hesab edir. Yelena da başdan bəri bu kimi hallara qarşı narazılıq edirdi, öz sözünü deyirdi, Azərbaycanın maraqlarını öz maraqları kimi qoruyurdu. Hamımız Azərbaycan vətəndaşıyıq, başqa cür ola bilməz. Bir yerdə də, ayrılıqda da olsaq hər birimiz axıra qədər vətənpərvərlik borcumuzu yerinə yetirəcəyik. Bir yerdə işləyəcəyik, işləməyəcəyik, deyə bilmərəm, amma bizi bir yerdə işlə bağlı görüşlərə çağırırlar, gedib baxarıq, dəyərləndirərik, alınsa niyə də birgə işləməyək? Bizim üçün birgə işləmək həmişə xoş olub, indən sonra da uyğun iş olarsa heç birimiz birgə işləməyə etiraz etmərik.
- - “Sputnik Azərbaycan”ın rus redaksiyasında işləyən müxbirlərdən də istefaya getmək istəyənlər varmı? Bu gözlənilə bilərmi?
- - Biz, ümumiyyətlə, uşaqları istefaya çağırmadıq. Bu hər kəsin şəxsi işidir. İndi maddi vəziyyət elədir ki, hər kəsin problemi var, ipoteka, kredit və sair baxımdan. Biz heç vaxt kimisə bu işə təşviq edə bilmərik ki, sən də bizimlə gəl. Bu hər kəsin şəxsi işdir. Amma dörd redaktor biz özümüz öz aramızda qərara gəldik və bu addımı atdıq. Çünki biz redaktor olaraq materialların cavabdehliyini daşıyırdıq. Azərbaycan əleyhinə olan materialın cavabdehliyini daşımaq istəmədiyimiz üçün istefa ərizəsi yazıb işdən çıxdıq. Jurnalist bu məsələdə elə də məsuliyyət daşımır, onun başının üstündə redaktor var deyə jurnalistin vəziyyəti daha yumşaqdır.
- - “Sputnik Azərbaycanda” neçə il idi işləyirdiniz?
- - Mən üç il idi işləyirdim, o biri qızlar məndən əvvəl işləyib. Azərbaycanın dövlətçilik maraqlarının əleyihinə material verməkdənsə istefa etməyi seçdik. Buna qətiyyən və qətiyyən təəssüflənmirik. Çünki Azərbaycanın maraqları bir vətəndaş kimi bizim üçün ən pioritet maraqlardır. Başqa cür ola da bilməz. Başqa bir ölkənin nümayəndəsi gəlib bizə burada diqtə edə bilməz ki, sən öz ölkən haqda belə yaz, ya başqa cür yaz.
İradə SARIYEVA
